Ezra 3

Iatonna lambi’mi bulan ma’pempitu, tonna lanmo lu mintu’ kotana tu to Israel, sirampunmi tu bangsa iato butung to misa’ri dio Yerusalem.

Ke’de’mi tu Yesua, anakna Yozadak, sola mintu’ siulu’na, iamotu mai tominaa, sia ia duka tu Zerubabel, anakna Sealtiel sola mintu’ siulu’na, anna bangunni tu inan pemalaran Kapenombanna to Israel, kumua anna dao dinii umpemalaranni tu pemala’ ditunu pu’pu’, susitu disura’ lan Sukaran alukna Musa, taunNa Puang Matua:

Napabendanmi tu inan pemalaran iato dao parandanganna siamo, moi namataku’ tu to Israel lako mintu’ bangsa lan tondok iato, sia dao inan pemalaran iato dinii umpemalaranni lako PUANG tu pemala’ ditunu pu’pu’, iamotu pemala’ ditunu pu’pu’ melambi’ sia makaroen.

Napakaraya dukami tu pa’gauran pekalumban susitu mangka disura’, sia umpennoloan pemala’ ditunu pu’pu’ kiallo-kiallo pada tu dituntunna, sia pada tu dipamanassanna kiallo-kiallo.

Sia randuk to attu iato nanii umpemalaranni kiallo-kiallo tu pemala’ ditunu pu’pu’ sia pemala’ bulan ba’ru sia pemala’ pa’gauran maindan dipakarayan PUANG sia iake denni tau umbaa pemala’ tanning inaa lako PUANG.

Randuk allo bunga’na tonna bulan ma’pempitu nanii umparandukki tau iato mai umpemalaran pemala’ ditunu pu’pu’ lako PUANG, apa iatu parandangan Banua kabusunganNa PUANG tae’pa nadioton.

Nabenmi doi’ tau iato mai tu to ma’pa’batu sia pande kayu; sia kande sia diiru’na sia minna’ naben to Sidon sia to Tirus la umbaai tu kayu arasi’ dao mai Libanon tama tasik Yafo, susitu pangeloranna Koresh, datu Persia lako tau iato mai.

Iatonna taun ma’penduan, bulan ma’penduan tonna rampomo tu tau iato mai lako banuanNa Puang Matua dio Yerusalem, randukmi tu Zerubabel, anakna Sealtiel, sia Yesua, anakna Yozadak, sia mintu’ siulu’ senga’na, iamotu mintu’ to minaa sia to Lewi sia mintu’ tu to dipali’ tu rampomo lako Yerusalem, unnangka’ to Lewi, randuk dio mai duangpulo taunna ba’tu la’bi la untiroi tu pengkarangan dio banuanNa PUANG.

Attu iato pada ke’de’mi Yesua sia mintu’ tu anakna muane sia mintu’ siulu’na sia Kadmiel sola mintu’ anakna muane, iamotu to Yehuda, la untiroi tu to ungkarang pengkarangan dio banuanNa Puang Matua susi dukato tu anakna Henadad, sia anakna tau iato mai sia siulu’na, iamotu to Lewi.

Iatonna mangkamo naoton mintu’ pande tu parandangan Banua kabusunganNa PUANG, ke’de’mi dio to’ inanna tu mai to minaa ma’pakean pangka’, sitangke tarompe’na sia mintu’ to Lewi, iamotu bati’na Asaf, sitangke taa’-taa’, la umpudi-pudi PUANG susitu napa’patuduan Daud datu to Israel.

Sibali-balimi tu tau iato mai menani umpudi sia umpakaraya PUANG nakua: belanna masokan, sia belanna iatu kamasokananNa tang tileluk sae lakona lako to Israel. Mandumi siarrakan tu mintu’ to buda sia umpudi PUANG, belanna tiotonmo tu parandangan banuanNa PUANG.

Apa budai tu tominaa sia to Lewi sia pangulu rapu, tu matuamo, tu mangkamo untiroi tu banua bunga’na, siurrukan tumangi’, tonna diotonmo tu parandangan banua iato dio tingayona; apa buda dukai tu mandu siarrakan sia ma’marua’-rua’, belanna parannu penaanna.

Iamoto tang diissanmo umpasisengaranni tu gamara to unnarrak-arrak na gamara to tumangi’ belanna iatu to buda mandu unnarrak-arrak, naurunganni iatu gamaranna dirangi lako inan mambela.