Hakim-hakim 17

Denmi misa’ muane dao mai buntu Efraim, disanga Mikha.

Ma’kadami lako indo’na nakua: Iatu salaka sangsa’bu saratu’ sikele’, tu diboko dio mai kalemi sia umpokadamokomi tampak ropu diona to tama pa’perangingku, manassa iatu doi’ iato dio sia kaleku, akumo unnalai. Ma’kadami indo’na nakua: Napamasakke-sakkemoroko PUANG, e anakku.

Napasulemi tu salaka sangsa’bu saratu’ sikele’ lako indo’na. Apa ma’kada tu indo’na nakua: Manassa iatu doi’ iato kupamarimbanganammo PUANG sia doi’ iate kusorongmo lako anakku la dipopegaragai misa’ rapang-rapang dipasisumbung pa’pa’ na pa’pati’no’. Iamoto angku pasuleangko.

Apa napasule pole’ tu doi’ iato lako indo’na, naalai indo’na tu doi’ iato duaratu’ sikele’ salaka, nabenni pande bulaan, tu unggaragai misa’ rapang-rapang dipasisumbung pa’pa’ na pa’pati’no’, tu dipabendan lan banuanna Mikha.

Belanna naampuimo Mikha tu misa’ banua Kapenomban. Nagaragaimi tu epo’ sia balo’ tau anna tokkoi tu anakna misa’, nadadi to minaanna.

Attu iato tae’ datu dio Israel, pantan napogau’ bangmi tu nasanganna melo.

Denmi misa’ pia muane lu dio mai Betlehem lili’na Yehuda, dio mai lili’ pa’rapuanna Yehuda; tau iato to Lewi sia torro to sae dio.

Tassu’mi lan mai kota Betlehem, lili’na Yehuda la mempue umba-umba tu nasanga melo; lan to kalingkanna rampomi lako buntunna Efraim dio to’ banuanna Mikha.

Ma’kadami tu Mikha lako nakua: Umbara munii sae? Mebalimi nakua: To Lewina’ dio Betlehem, lili’na Yehuda, saena’ inde te mai la mempue umba-umba tu kusanga melo.

Ma’kadami tu Mikha lako nakua: Tatorro bangmo sola, angku poambe’komi sia angku potominaakomi; angku benkomi sangpulo sikele’ salaka sia sangpasang pakean ke sangtaunoi sia la kupakandekomi.

Napasituru’mi tinde to Lewi torro sola tu tau iato; iatu pia muane iato butung to anak dadianna.

Natokkomi Mikha tu to Lewi; iatu pia muane iato dadimo to minaanna, anna torro lan banuanna Mikha.

Attu iato ma’tangnga’mi tu Mikha nakua: Totemo kutandaimo kumua iatu PUANG ungkasokannina’, belanna misa’ to Lewi dadimo to minaangku.