Hakim-hakim 20

Ta’kala pada sunmi tu mintu’ to Israel; randuk dio mai Dan sae lako Bersyeba sia dio duka mai tondok Gilead sirampun sae butung to misa’ri, mennolo lako PUANG dio Mizpa.

Iatu pangulunna mintu’ bangsa iato, iamotu mintu’ suku to Israel umpangului kombonganna taunNa Puang Matua; a’pa’ ratu’ sa’bunna tu tau lumingka, tu ma’din parari.

– Narangimi to Benyamin kumua sae nasang tu to Israel lako Mizpa. – Ma’kadami tu mintu’ to Israel nakua: Uleleanni umbara nakua to kakadakean iato.

Mebalimi tu to Lewi, iamotu muanena tu baine dipatei nakua: Rampona’ sola gundi’ku lako Gibea, lili’na Benyamin, la ma’bongi dio.

Pada ke’de’mi tu to Gibea la unneana’ sia untalimbung tamai tu banua kunii ma’bongi la ungkadakeina’; lanmo penaanna la umpateina’, sia narongkong tu gundi’ku namate.

Kualami tu gundi’ku, kuta’tak-ta’takki, angku pakatui tiku lao lako mintu’ lili’na padang mana’na Israel, belanna napogau’mo tau iato mai tu misa’ apa megi’giran sia kabagan mesirisan dio lu to Israel.

Totemo inde nasangmokomi, e to Israel. Iamoto patassu’mi inde te tu pa’tangarammi sia pa’timbangammi.

Pada ke’de’mi tu mintu’ bangsa butung to misa’ri, anna ma’kada nakua: Moi misa’kanni tae’ tu la sule lako tendana, moi misa’kanni tae’ tu la sule lako banuanna.

Inde sia tu apa la tapogau’ lako Gibea: La ke’de’ki ullaoi sia ulloterei.

La tapasun sangpulo tau ke saratu’oi, sisaratu’ tau ke sangsa’buoi, sisangsa’bu ke sangpulooi sa’bunna dio mai mintu’ suku to Israel la undakaranni kinallo tu to buda, kumua ianna rampomo tu tau iato mai, la lao umpapakkanni tu kabagan mesirisan lako to Gibea, lan lili’na Benyamin, tu mangka napogau’ dio lu to Israel.

Susimoto tu kasirampunanna mintu’ muane to Israel, butung to misa’ri kasiturusanna ullaoi tu kota iato.

Mesuami tu mintu’ suku to Israel lako ba’tu pira-pira tau, male ullelei tu suku Benyamin sia ma’kada nakua: Matumbari tu kakadakean dadi dio lu sukummi?

Totemo sorongi lako kaleki tu mintu’ to bulituk dio Gibea, angki patei sia kiputtai tu kakadakean dio mai to Israel. Apa tae’ namorai to Benyamin umperangii tu mintu’ kadanna siulu’na, iamotu to Israel.

Sangadinna sirampunora tu mintu’ to Benyamin dio mai kota senga’ lako Gibea la sirari to Israel.

Allo iato nabilangmi to Benyamin tu tau dio mai kota senga’: den duangpulo nnannan sa’bunna muane, tu ma’din parari; senga’ ia tu to lan Gibea, tu nabilang pitu ratu’ muane ditonno’.

Dio mai tu mintu’ surodadu iato den pitu ratu’ muane pa’tonno’, to kairi, manarang nasangi ma’kolak, moi nabeluak sanglamba’ tae’ nasalai.

Dibilang dukami tu mintu’ muane to Israel; senga’ ia tu to Benyamin a’pa’ ratu’ sa’bu muane, tu ma’din parari: mintu’na te surodadu nasang.

Ke’de’ nasangmi tu mintu’ to Israel lako Betel, tu nanii mekutana lako Puang Matua, nakua: Mindannarakanni la male dolo sirari to Benyamin? Mebalimi tu PUANG Nakua: Yehuda dolo.

Ke’de’mi tu mintu’ to Israel tonna melambi’, anna ma’tenda sitingoan Gibea.

Tassu’mi tu to Israel la sirari to Benyamin; ma’pampangammi tu to Israel unneai tu tau iato mai sikandappi’ Gibea.

Tassu’mi tu to Benyamin lan mai Gibea, anna mangsanni tu to Israel natibambang rokko padang duangpulo ndua sa’bunna allo iato.

Apa iatu surodadu, iamotu to Israel, umpabatta’ penaanna, anna ma’pampangan pole’ dio inan tu nanii mangka ma’pampangan iongi’.

Malemi tu to Israel, anna tumangi’ dio oloNa PUANG sae lako makaroenna, anna mekutana lako PUANG nakua: Ma’dinra’ka la male pole’ sirari bati’na Benyamin, siulu’ku? Nakuami PUANG: Ke’de’mokomi urrarii.

Iatonna allo ma’penduan nareke’omi to Israel tu to Benyamin,

tassu’mi tu to Benyamin lan mai Gibea tonna allo ma’penduan ullaoi tu tau iato mai, anna mangsanni pole’i tu to Israel natibambang rokko padang sangpulo karua sa’bunna; mintu’na te to ma’takin pa’dang nasang.

Mangkato malemi tu mintu’ to Israel, iamotu mintu’ bangsa, anna rampo lako Betel; torromi inde to dio anna tumangi’ dio oloNa PUANG, nama’puasa allo iato sae lako makaroenna sia umpemalaran pemala’ ditunu pu’pu’ sia pemala’ kasalamaran dio oloNa PUANG.

Mekutanami tu to Israel lako PUANG, belanna allo iato inde to dio tu patti basseNa Puang Matua,

na Pinehas, anakna Eleazar, anakna Harun, tu umpogau’ toeanna allo iato dio oloNa Puang. Anna ma’kada tu tau iato mai nakua: Ma’dinra’ka la male pole’ sirari bati’na Benyamin, siulu’ku, ba’tu la kutorroimoraka? Ma’kadami tu PUANG Nakua: Ke’de’mokomi belanna masiang la Kusorong tu tau iato mai tama limammi.

Ta’kala napatikuimi to Israel ba’tu pira-pira to mangamu’ tu Gibea.

Iatonna allo ma’pentallun ke’de’mi tu to Israel urrarii to Benyamin, anna ma’pampangan ullaoi Gibea, susito lendu’na.

Tassu’mi tu mintu’ to Benyamin ullaoi tu surodadu iato; moi anna tileakmo tu tau iato mai lan mai kota, apa naparanduk duka umpatei ba’tu pira-pira surodadu susito lendu’na, agi-agi tallungpulo to Israel, dio lu batatta lompo, misa’ ma’palulako Betel, na iatu misa’ urra’ta’ padang lu lako Gibea.

Ma’tangnga’mi tu to Benyamin nakua: Tatalomo tu tau iato susito dolona. Apa ma’kada tu to Israel nakua: Da’ito tamallai, anta a’panni lan mai kota lako batatta lompo.

Iamoto ke’de’mi dio mai inanna tu mintu’ to Israel, anna ma’pampangan dio Baal-Tamar, tonna marassan tu to Israel mangamu’ ke’de’ dio mai inanna, dio mai rante sikandappi’ Geba,

sia rampo sitingoan Gibea, iamotu sangpulo sa’bunna to ditonno’ dio mai mintu’ to Israel. Masarrangmi tu kasirarian, apa tae’ naissanni to Benyamin, kumua mandappi’mo tu kasanggangan lako kalena.

Nakamaseimi PUANG kapataloan tu to Israel, namallai tu to Benyamin dio mai tingayona, anna patei to Israel tu to Benyamin duangpulo llima sa’bu ssaratu’ allo iato; iatu mintu’nato, to ma’takin pa’dang nasang.

Natiromi to Benyamin kumua natalomo to Israel. Iatonna sorong boko’mo tu to Israel dio mai tingayona to Benyamin – belanna narannuan tau iato mai tu to mangamu’ tu napadio Gibea la ullaois-

madomi’mi ke’de’ tu to mangamu’, anna laoi tu Gibea, sia lumingka tarru’ untaloi tu kota, anna patei pa’dang tu mintu’ tau lan.

Iatu to Israel mangkamo siallu’ tu to mangamu’, kumua la napakendek tu rambu makamban lan mai kota.

Iatonna tibalikmo tu to Israel lan kasirarian sia iatonna parandukmi to Benyamin umpatei ba’tu pira-pira to Israel, agi-agi tallungpulo tau, belanna nasanga lan penaanna, kumua: Iatu tau iato mai tatalo tarru’mo, susi lan kapararian lendu’namo.

Attu iato ta’pa randukmi tu rambu kendek lan mai kota susi misa’ lentong. Iatonna messaile tu to Benyamin, natiromi kumua iatu mintu’ kota nasitutu’imo rambu.

Tibalikmi tu to Israel, anna tiramban tu mintu’ to Benyamin, belanna natiromo tau iato mai, kumua iatu kasanggangan mandappi’ lako kalena.

Mallaimi tu tau iato dio mai tingayona to Israel ma’palulako padang pangallaran, apa tae’ nalessu’ dio mai kalena tu rari; na iatu to lu dio mai mintu’ kota umpatama limbui, anna patei.

Napatama limbumi tu to Benyamin, naula’ sumpui sia nasanggang sae lako tingo Gibea, dio rampe matallona.

Iatu to Benyamin den sangpulo karua sa’bu tibambang mate, mintu’nato surodadu nasang.

Na iatu senga’na sepang namallai lako padang pangallaran lako buntu batu Rimon. Dio lu batatta lompo denpa dipatei limangsa’bu tu tau iato mai, anna male tu to Israel unnula’i sae lako Gideom, anna pateipi duangsa’bu.

Iatu mintu’ to Benyamin tu mate allo iato duangpulo llima sa’bu, to ma’takin pa’dang, mintu’nato surodadu nasang.

Apa annan ratu’ tu muane sepang mallai lako padang pangallaran, lako buntu batu Rimon, natorro dao buntu batu Rimon patang bulan.

Apa iatu to Israel tibalik sule lako to Benyamin, anna patei pa’dang, la tau la patuoan sia mintu’ tu apa nakabu’tui. Sia ia duka tu mintu’ kota naappa’ dio, naballa api.