Hakim-hakim 7

Iatu Yerubaal, iamotu Gideon, millik kale’ sola mintu’ surodadu nasolan, anna ma’tenda sikandappi’ kalimbuang Harod; iatu naninna ma’tenda to Midian daanna lu inanna Gideon, sikandappi’ tanete More, diong lombok.

Ma’kadami tu PUANG lako Gideon, Nakua: Buda maro’pa tu tau musolan, ke la Kusorongmi tu to Midian tama kuasanna; dako’ manii anna massattuan tu to Israel, umbaliNa’ nama’kada, nakua: Limangku kalena aku ullendokanna’.

Totemo metambamoko, anna patananni talinga to buda kumua: minda-minda tu mataku’ sia selang, melo ke sulemi namessepang dio mai buntu Gilead. Attu iato sulemi tu to buda duangpulo ndua sa’bu, na iatu torronapa sangpulo sa’bu.

Apa ma’kada tu PUANG lako Gideon Nakua: Buda maro’pa tu tau; suai tu tau iato rokko to’ uai, nadiong Kunii umpileangko. Minda-minda tu Kupokadangko kumua: iamote tu la musolan male, iamoto tu la musolan, apa minda-minda tu Kupokadangko kumua: iate tae’ mula ussolanni, iamoto tu tang la male.

Nasuami Gideon tu tau male rokko to’ uai, nama’kada tu PUANG lako, Nakua: Minda-minda umpasirrokki lilana tu uai susito asu, la mupatorro senga’, susi dukato tu mintu’ to malinguntu’ mangiru’.

Iatu to massirrok diong mai pala’ limanna den talluratu’, apa iatu mai senga’na malinguntu’ mangiru’.

Ma’kadami tu PUANG lako Gideon Nakua: Tete diomo te to talluratu’ tu massirrok la Kunii ullendokangkomi sia Kusorong tu to Midian tama limammu; apa iatu mai to senga’ ma’dinmo sule, pantan sule lako inanna.

Mangkato naalami tu kinallona sia napiri tandukna to buda nabaai; nasuai tu mai to Israel senga’ pantan sule lako to’ tendana; apa iatu to talluratu’ napatorro. Iatu to’ tendana to Midian rampe rokkona diong lombok.

Bongi iato ma’kadami tu PUANG lako Gideon, Nakua: Millikmoko, murokko ullaoi tama tu to’ tenda surodadu, belanna Kusorongmo tama limammu.

Iake mataku’pako solo’ sia tama, melo ke solo’ko sola Pura, taummu, rokko to’ tenda surodadu;

perangii tu apa napokada; mangkato la dipamawatangko, ammu tama ullaoi tu to’ tenda surodadu. Attu iato malemi rokko sola Pura, taunna, sae lako to’ pa’kampan salianna to parari lan to’ tenda surodadu iato.

Iatu mintu to Midian sia to Amalek sia mintu’ suku dio mai matallo ma’tenda diong lu lombok, lendu’ budanna susito batik, sia iatu untana tang dikemba’ dibilang, iatu budanna susi bang to karangan dio lu biring tasik.

Iatonna saemo tu Gideon, sirupang den misa’ tau unnulelean misa’ tindo lako solana, nakua: Mangkamo’ ma’tindo; kutiro den misa’ roti dalle sisikan malepong melolin-lolin tama to’ tendana to Midian, anna rampo lako tenda, nalolinnimi anna songka tibalittua’, naurungan tipessambak tu tenda iato.

Mebalimi tu solana, nakua: Tae’ senga’na sangadinna pa’dangna Gideon, anakna Yoas, to Israel; Nasorongmo Puang Matua tu to Midian sola mintu’ to’ tenda surodadu tama limanna.

Iatonna rangimi Gideon tu uleleanna tindo iato sola sembangna, tukkumi menomba anna sule lako to’ tenda surodadunna to Israel, anna ma’kada, nakua: Millikmokomi, belanna Nasorongmo PUANG tu to’ tenda surodadu tama limammi.

Iatu tau talluratu’ napatallung kaponan napada umpapantanni napiri tanduk simisa’ na busso lo’bang simisa’ na simisa’ bia’ lan busso iato.

Ma’kadami lako tau iato mai, nakua: La mitirona’, ammi turu’i tu apa kupogau’. Iangku rampomo lako randan salianna to’ tenda iato, la mipogau’ duka susitu kupogau’na.

Iangku pannonii tu napiri tanduk iato sola mintu’ to kusolan, la mipannoni duka tu napiri iato tiku lao mintu’ to’ tenda surodadu, ammi unnarrak mikua: Belanna PUANG sia belanna Gideon.

Rampomi tu Gideon si iatu to saratu’ nasolan lako randan salianna to’ tenda iato, tonna randukmo attu pa’kampan tangnga bongi, tonna sirupang tau umpasirundunan to ma’kampa. Pakalan napannonimi tu napiri tandukna, natessei tu busso natoe.

Susimoto tu tau tallu kaponan umpannoni napiri tandukna sia untesse bussona; iatu bia’ natoe lima kairinna sia lima kananna untoe napiri tandukna la napannoni sia unnarrak-arrak, nakua: Iamote tu pa’dangna PUANG sia Gideon!

Pantan bendanmi tu tau iato mai dio lu inanna untikui to’ tenda surodadu, apa iatu mintu’ surodadu sisarambuan male mallai sia sipelallakan.

Iatonna marassan tu tau talluratu’ umpannoni napiri tandukna, pantan Napapatuimi PUANG pa’dang ke simisa’oi ualinna siea lan lu mintu’ inan tenda surodadu iato, naurungan mallai tu surodadu iato lako Bet-Sita, ma’palulako Zerera sae lako lili’ dio tampakna Abel-Mehola, sikandappi’ Tabat.

Attu iato ditambaimi sirampun tu mintu’ to Israel dio mai Naftali sia dio mai Asyer sia dio mai mintu’ Manasye, anna undi unnula’i tu to Midian.

Nasua pole’mi Gideon tu to disua lako mintu’ buntunna Efraim, nakua: Solo’komi ammi ampangi tu to Midian sae lako Bet-Bara, da nalambanni tu kalambanan dio, iamotu dio Yordan. Attu iato ditambaimi sirampun tu mintu’ to Efraim, anna male unnampangi tu to Midian, sae lako Bet-Bara, da nalambanni tu kalambanan dio, iamotu dio Yordan.

Narampami tu datu Midian da’dua, iamotu Oreb sia Zeeb. Iatu Oreb napatei dao buntu batu Oreb na Zeeb napatei lan panglulluran anggoro’ Zeeb. Naula’mi tu mintu’ to Midian, na iatu ulunna Oreb sia Zeeb nabaan Gideon sambalinna lu Yordan.