Hosea 10

Iatu Israel misa’ garonto’ anggoro’ loboran; satarri’-tarri’na tu buanna, sanarangngan-rangnganninna tu inan pemalaranna, samelo-melona tu padangna, sanaballo-balloinna tu batu dipodeata.

Mo’rang tu penaanna, totemo la napassan tu bua kasalanna: la Nasanggang Puang tu inan pemalaranna sia la Naro’pok tu mintu’ batu dipodeatanna.

Inang ma’kada tu tau iato mai totemo, nakua: Tae’ datunta – apa iake tae’i takataku’ PUANG, apara ma’din napogaurangki’ tu datu.

Tau iato mai ma’kada tang kebattuan: umpalao sumpa tang tongan sia untanan punala basse. Sia la bu’tu tu ukungan susi lelating tuo lan lu gorri’ pa’lak.

Belanna anak sapi dio Bet-Awen anna selang tu to umpa’tondokki Samaria; ondongpi iatu to buda mario-rio tu diona to, sia silallakan to minaa umpengkaolai rapang-rapang dipodeata, belanna sisayurammo kamala’biranna.

Ondongpi iatu kalena dibaa duka lako Asyur, la dipennoloan lako datu Passirarian. La matuna tu Efraim sia la kasirisan tu Israel napobua’ pa’tangngaranna.

La disanggangmo tu Samaria; iatu datunna susi to bulisak naangan uai male.

La disanggang tu inan madao dinii memala’ dio Awen, tu napokasalan Israel. La nakabu’ duri sia a’da’ tu inan pemalaranna. Anna ma’kada tu tau iato mai lako buntu, kumua: Samboikan sia lako tanete, kumua: I’pinnikanni!

Tempon allonapa Gibea, mupogau’mo kasalan, e Israel. Tontong bangkomi umpengkaolai tu iannato. Tang nalambi’raka dio Gibea tu tau iato mai tu kasirarian unneai tu to tang mekaaluk unturu’ pa’poraiangKu?

Manassa la Kupandasa, anna sirampun tu mintu’ bangsa unneai, sia la dipandasa tu tau iato mai natumang tu kasalanna da’dua.

Iatu Efraim misa’ sapi mangura diada’imo, tu moraimo dipanglulluran: apa Kukasayangi tu sokkong melona. La Kuayokai tu Efraim, sia la dipa’tengkoan tu Yehuda sia la dipassalagan tu Yakub.

Mangambo’komi situang kamalamburan, mebura padangkomi situang kamamasean, bungka’komi padang ba’ru. Iake susito, nalambi’mo attunna la undaka’ PUANG, kumua anNa sae sia umpasaeangkomi uran kamaloloan.

Untengkomokomi katangmekaalukan sia urrampunmokomi kakadakean; ungkandemokomi bura padang kamo’rangan, belanna murannuammo tu lalanmu sia kabudanna to lalongmu.

Iamoto anna dadi tu kamarukkan unnea bangsamu, sia la disanggang tu mintu’ kota bentengmu, susi Salman ussanggang Bet-Arbel, tonna bendan kasirarian, tonna pessambakanni tu indo’ sola anakna.

Iatu iannato buntu tumangna Betel sia pa’pobua’na kaliuan kadakemi. Ianna tilalekmo masiang, iatu datu Israel la disabu’imo.