Hosea 4
Perangii tu kadanNa PUANG, e to Israel, belanna den apa Napasalanni PUANG tu pa’tondokan, belanna tae’mo kamarurusan, tae’mo kamamasean sia tae’mo kapaissanan diona Puang Matua lan tondok iato.
Ma’tampakki ropu, mo’rang, papatean, boko sia pasandak salu lako rampanan kapa’! Kamasa’garan sia kaumpatibolloan rara situru’-turu’.
Iamoto anna makarorrong tu tondok sia mintu’ apa lan silayuan sia sipa’du’dunan, la mintu’ olo’-olo’ dio lu padang, la manuk-manuk dao lu langi’; ondongpi ia duka tu bale lan lu tasik siaangan mate.
Da naden misa’ tau ma’parapa’ sia da naden misa’ tau ma’ta’tan, belanna pa’parapa’Ku diona iko, e to minaa.
La songkako, ke allona, sia la pada songkako tu nabi, ke bonginnai, sia la Kusanggang tu indo’mu.
Iatu taungKu la sanggang, belanna tae’ kapaissananna. Belanna mutumpu tu kapaissanan, iamoto angKu tumpuko, damo mutoe toean to minaa dio oloKu; belanna tae’mo mukilalai tu Sukaran alukNa Kapenombammu, iamoto natae’ dukamo Kula ungkilalai tu bati’mu.
Sabuda-budanna tu tau iato mai, samandu-mandunna kasalan lako Kaleku. Iamoto angKu popembalii kamatunan tu kamala’biranna.
Tau iato mai unnappa’ kandena dio mai kasalanna taungKu sia iatu kamoraianna ma’palulako kakelokanna.
La dipapada to minaa tu to buda. Iamoto Kula unnukungi diona tu kedona sia la Kupapakkanni tu penggauranna.
La kumande tu tau iato, apa tae’ anna dia’, la ma’gau’ sala, apa tae’ namemba’ka’, belanna tae’mo namakaritutu menomba lako PUANG.
Iatu gau’ sala sia uai anggoro’ sia uai anggoro’ ba’ru umpapusa penaa.
Iatu taungKu mekutana lako kayunna, natekkenna ma’patudu. Belanna misa’ penaa ma’patudu lako gau’ sala umpapusa tau iato mai, naurunganni ma’gau’ sala umboko’i Kapenombanna.
Umbaa pemala’ dao lu bottona mintu’ buntu sia umpennoloan pemala’ ditunu dao lu mintu’ tanete, iamo tu diong to’ garonto’ pallin, libne sia tarpin, belanna masakka’ naonganni. Iamoto anna ma’gau’ sala tu anakmi baine sia pasandak salu tu minintummi baine.
Tae’ angKu la umpapakkanni tu gau’ salana tu mai anakmi baine sia tu pasandak salunna tu mai minintummi baine. Belanna ia kalena tu tau iato mai male senga’ ussolan baine bualang, sia umpennoloan pemala’ sola to ma’gau’ sala dio to’ dipa’deatainna. Susimo to tu bangsa tae’ inaanna manassa la sanggang.
Iake la moraikomi ma’gau’ sala, e to Israel, da anna lakoi sala tu to Yehuda! Da milao lako Gilgal, sia da milao lako Bet-Awen, sia da mipalao sumpa dio, kumua: La lelukraka tuoNa PUANG!
Belanna iatu to Israel tang sopati susi sapi tang sopati. Ma’dinraka la Nakambi’ PUANG susi misa’ domba dio lu padang kalua’?
Iatu Efraim manda’ mengkale’pe’ lako rapang-rapang dipodeata. Elo’na ia!
Iake tae’mo namalango, umpogau’omi gau’ kadake tang untandai siri’. Iatu balulangna tau iato mai ungkamali’ tongan kamatunan.
Natalimbungmo pani’ angin tu tau iato mai sia la kasirisan diona mintu’ pemala’na.