Hosea 8
Padioi pudukmu tu napiri tanduk. Susi misa’ langkan maega tu kasanggangan sae urrampoi banuanNa PUANG! Belanna natengkaimo tau iato mai tu basseKu sia nabali-bali tu Sukaran alukKu.
Tau iato mai metamba lako Kaleku, nakua: O Kapenombangku. Kami te, to Israel, kitandaiKomi.
Untibemo maelona tu to Israel; iamoto anna ula’i uali.
Unnangka’mo datu, apa napasalianNa’, sia unnangka’ arung, natae’ Kuissanni. Iatu mai salakana sia bulaanna nagaragamo rapang-rapang dipodeata napourunganni dipisanni.
Iatu anak sapimmu apa megi’giran, e Samaria! Dukku tu kasengkeangKu la urrampoi tu tau iato mai. Sangapapira tu tau iato mai tang la ma’din diseroi?
Tonganna bu’tu dio duka mai Israel, tu misa’ apa nagaraga pande, apa tangia misa’ kapenomban. Tonganna la dinisak-nisak tu anak sapi Samaria.
Belanna unnambo’mo angin tu tau iato mai, tae’ duka nasalai tang talimpuru’ napolean: la langko tu gandung, iamo tananan, tu tang la umpaden ta’pung; moi naden issinna, to tama sae la unnampello’i.
Diampello’mo tu Israel. Totemo diomo lu mintu’ bangsa susi misa’ pareanan, tu moi misa’ tau tae’mo umporai.
Belanna malemo lako Asyur. Iatu misa’ keledai lampung messarak ia, apa Efraim umpatassu’ pamengan la napa’gau’ – salan.
Moi anna tarima pamengan dio lu mintu’ bangsa, manassa la Kurampun tu tau iato mai; sidi’ri la naappa’ kenarannuanni tu kada pangra’ta’na datunna mintu’ arung.
Manassa budamo tu inan pemalaran napabendan Efraim la umpogau’ kasalan; mintu’ inan pemalaran iato napake la umpogau’ kasalan.
Moi angKu surasanni pessangpulo sa’bunna tu Sukaran alukKu, apa inang nasanga iate apa iate lu dio mai to tama sae.
Umpennoloan pemala’ tu tau iato mai, iamo tu duku’, anna kandei. Apa tae’ nakalo’i penaanNa PUANG to; totemo Nakilalaimo Puang tu kakadakeanna tau iato mai sia Naukungi diona tu kasalanna; la sule tu tau iato mai lako Mesir.
Ondongpi nakalupaimo Israel tu To tumampana sia umpabendan tongkonan layuk, tonna marassan to Yehuda umpebudai kota ditambakuku. Apa la Kupasonglo’ tu api tama kota iato mai, anna purai nakande tu mintu’ tambakukunna.