Imamat 16
Iatonna matemo tu da’dua anakna muane Harun, tu mate tonna mennolo lako PUANG, ma’kadami tu PUANG lako Musa.
Ma’kadami tu PUANG lako Musa Nakua: Pokadanni Harun, kakammu, kumua lan mintu’ attunna, da natama tu inan maindan dio boko’ kulambu tarru’ lako olo tutu’ pebase kasalan, tu dao patti iato, da namate; belanna ombo’Na’ lan gaun, tu dao tutu’ pebase kasalan.
Ia manna ke susite nasipatu Harun tama inan maindan, ke nabaai tu misa’ sapi laki mangura la diposuru’ pengkalossoran sia misa’ domba laki la dipopemala’ ditunu pu’pu’.
Bayu lanna lu tu maindan la napake, lenang digaragai sia ma’seppa lenang dio kalena sia la ma’pepori aak lenang sia la ma’passapu lenang; mintu’nate iamo tamangkale maindan tu la napake, ke mangkami mendio’.
Dio mai kasirampunan to Israel la naala tu bembe’ laki da’dua la diposuru’ pengkalossoran sia misa’ domba laki la dipopemala’ ditunu pu’pu’.
La napennoloan Harun tu sapi laki diposuru’ pengkalossoran, anna padenanni kadiseroian kasalan tu kalena sia to lan banuanna.
Mangkato namane unnalai tu bembe’ laki da’dua, anna pabendanni dio oloNa PUANG dio to’ ba’ba Tenda Kasitammuan,
sia Harun la ulloterei tu da’dua bembe’ laki iato; misa’ loterei umpatu PUANG, na misa’ loterei umpatu Azazel.
Mangkato la napennoloan Harun tu bembe’ laki nakanna lotereinNa PUANG, anna pasakka’i diposuru’ pengkalossoran.
Apa iatu bembe’ laki nakanna lotereinna Azazel, la dipabendan tuo dio oloNa PUANG, la umpadenan kadiseroian kasalan tete dio kalena, belanna dibaa lako padang pangallaran lako Azazel.
La napennoloan Harun tu sapi laki la naposuru’ pengkalossoran kalena, anna padenanni kadiseroian kasalan tu kalena sia to lan banuanna sia narere’ tu sapi laki diposuru’ pengkalossoran kalena.
Mangkato la naala tu peroyan ponno ruaya dao mai inan pemalaran dio oloNa PUANG, anna ponnoi dupa busarungngu’ tu pala’na, tu ditu’tuk sia nabaa nasangi tama boko’ kulambu.
Iatu dupa iato la napatama to’ api dio oloNa PUANG, naurunganni iatu rambu dupa ussamboi tutu’ pebase kasalan, tu daona lu kasa’bian, da namate.
La naoton tu rakka’na tama to’ rara sapi laki napi’pikki dao tutu’ pebase kasalan dio tingayona; nalako tu tingayo tutu’ pebase kasalan la napi’pikki rakka’na tu rara iato pempitu.
Mangkato la narere’ tu bembe’ laki naposuru’ pengkalossoran bangsa iato sia iatu rarana la nabaa tama lako boko’ kulambu, sia la napogau’ tu rara iato susitu rara sapi laki, iamotu la napi’pikan dao tutu’ pebase kasalan sia dio tingayona tu tutu’ pebase kasalan.
Napasusimoto umpadenanni kadiseroian kasalan tu inan maindan belanna kamaruttakanna mintu’ to Israel sia belanna mintu’ kapatodo-tintingan diona mintu’ kasalanna; sia la napasusi dukamoto tu Tenda Kasitammuan tu dio lu tau iato mai lan tangngana mintu’ kamaruttakanna.
Moi misa’ tau da nadioren lan Tenda Kasitammuan, ke tamai la umpadenan kadiseroian kasalan lan inan maindan, sae lako tassu’na sia sae lako mangkanna umpadenan kadiseroian kasalan kalena sia mintu’ to lan banuanna sia mintu’ kombongan to Israel.
Mangkato anna tassu’ lako inan pemalaran tu dio oloNa PUANG, anna padenanni kadiseroian kasalan, sia la naala tu rara sapi laki sia rara bembe’ laki, anna raranni tu mintu’ tanduk inan pemalaran tiku lao.
Sia la naoton tu rakka’na tama to’ rara, anna pi’pikki pempitu; sia la napamasero sia la napamaindan dio mai mintu’ kamaruttakanna to Israel.
Iake mangkami napadenan kadiseroian kasalan tu inan maindan sia Tenda Kasitammuan sia inan pemalaran, la napennoloan tu bembe’ laki tuo.
La naremme’ patomali Harun tu ulu bembe’ laki tuo, anna akui dao tu mintu’ kakadakeanna to Israel sia mintu’ kapatodo-tintinganna diona mintu’ kasalanna, sia la naparengnge’i tu ulu bembe’ laki, anna suai tu misa’ tau sakka’ la umpogau’i tu iannato, umbaai tu bembe’ laki lako padang pangallaran.
La susimoto tu bembe’ laki urrengnge’i tu mintu’ kakadakeanna tau iato mai lako padang tang malunak sia la narampanan tau iato tu bembe’ laki dio padang pangallaran.
Mangkato la tama Tenda Kasitammuan tu Harun, anna lendokanni tu pakean lenangna, tu napake, tonna tama inan maindan, sia la napatorro dio.
La mendio’ dio inan maindan, anna ma’pakean biasa; mangkato namane tassu’, anna pemalaranni tu pemala’ ditunu pu’pu’na sia pemala’ ditunu pu’pu’na bangsa iato sia umpadenan kadiseroian kasalan kalena sia bangsa iato.
Iatu lompo suru’ pengkalossoran la natunu dao inan pemalaran.
Iatu to male umbaai tu bembe’ laki, tu diban Azazel, la umbusukki pakeanna sia la undio’ kalena, namane ma’din tama to’ tenda.
Iatu sapi laki diposuru’ pengkalossoran sia bembe’ laki diposuru’ pengkalossoran, tu dibaa rarana la umpadenan kadiseroian kasalan lan inan maindan, la nabaa tau lako salian to’ tenda, naditunu pu’pu’ tu balulangna, duku’na sia tai lanna tambuk barinni’na.
Iatu to untunu pu’pu’i la umbusukki pakeanna sia mendio’, namane ma’din tama to’ tenda.
Iamote tu la dadi atoran matontongan lako kalemi kumua: Ianna bulan ma’pempitu sia allo bunga’na bulan iato la umpamadiongangkomi penaammi, da mimengkarang, moi misa’ pengkarangan da mikarangi, la to Israel, iamotu pa’tondokan, la to sae tu torro dio lu kalemi.
Belanna allo iato mila dipadenan kadiseroian kasalan, ammi dipamasero, miurunganni dipamasero dio mai mintu’ kasalammi dio oloNa PUANG.
Allo iato la dadi misa’ allo katorroan sundun lako kalemi kumua ammi pamadiongan penaammi; iamote tu misa’ atoran matontongan.
Iatu kadiseroian kasalan iato la napaden to minaa, tu dibolloi minna’ sia ditokko la untoe pentoean to minaa ussonda ambe’na; la ma’pakean lenang, iamotu pakean maindan.
La napadenan kadiseroian kasalan tu inan tarru’ maindan, sia iatu Tenda Kasitammuan sia inan pemalaran la napadenan duka kadiseroian kasalan, susi dukato tu mintu’ to minaa sia mintu’ to naala bilanganna kombongan iato la napadenan kadiseroian kasalan.
Iamote tu la dadi misa’ atoran matontongan lako kalemi, iamotu sipissan sangtaun la dipadenan kadiseroian kasalan tu to Israel belanna mintu’ kasalanna. (16-35) Napogau’mi susi tu mangka Napa’parentan PUANG lako Musa.