Imamat 18
Ma’kadami tu PUANG lako Musa Nakua:
Ma’kadako lako to Israel sia kuanni kumua: Akumo tu PUANG, Kapenombammi.
Da mipogau’i tu aluk napogau’ tau lan tondok Mesir, tu mangka minii torro; da mipogau’i tu aluk napogau’ tau lan tondok Kanaan, tu inan Kunii ussolangkomi; da mituru’i tu aluk napondok tau iato mai.
Sangadinna la mipogau’ tu mintu’ atorangKu sia mikaritutui tu aluk Kupondok, ammi turu’i: Akumo tu PUANG, Kapenombammi.
Manassa la mikaritutui tu aluk Kupondok sia mintu’ atorangKu; minda-minda umpogau’i la napotuo: Akumo tu PUANG.
Moi misa’ tau da nareke’ sangdadian marengke’na la sangampa’ sola: Akumo tu PUANG.
Da mukillang kasirisanna ambe’mu, iamotu da musangampa’ indo’mu; belanna iamoto tu indo’mu, da musangampa’ sola.
Da musangampa’ sola tu baine napobaine ambe’mu; belanna ungkillangko kasirisanna ambe’mu.
Iatu siulu’mu baine dio ambe’mu, ba’tu dio indo’, tu dadi lan banuanna ambe’mu, ba’tu salianna, da musangampa’ sola.
Iatu ampomu baine dio anakmu muane ba’tu dio anakmu baine, da musangampa’ sola, belanna iko umposiri’i tu iannato.
Da musangampa’ sola tu baine nadadian bainena ambe’mu, tu napadadian ambe’mu, belanna iamo anak darammu – da musangampa’ sola.
Da musangampa’ sola pa’indorammu dio ambe’, belanna sangrara sangbuku ambe’mu.
Da musangampa’ sola pa’indorammu dio indo’, belanna sangrara sangbuku indo’mu.
Da mukillang kasirisanna pa’amberammu dio ambe’; da mureke’i tu bainena, belanna iamo pa’indorammu.
Da musangampa’ manintummu baine, belanna napobaine anakmu, da musangampa’ sola.
Da musangampa’ sola bainena siulu’mu, belanna mangkamo sangampa’ siulu’mu.
Da musangampa’ sola misa’ baine sia iatu anakna baine; da mualai tu ampona baine iato dio anakna muane ba’tu dio anakna baine, la musangamparan, belanna sangrara sangbukuko; sala belanna to sikande rara bangpa.
Da mupobaine misa’ baine mupa’da’duai siulu’na, ammu pasisondai musisangamparan, ke tuopi bainemu.
Da musangampa’ misa’ baine, ke nalambi’i bulanna.
Da musangampa’ bainena padammu ma’rupa tau, miurunganni pada maruttak.
Da musorongi moi misa’ tu anakmu la dipennoloan lako Molokh, anna da mupamatunai tu sanganNa Kapenombammu: Akumo tu PUANG.
Da musangampa’ padammu muane, susi baine, belanna iamoto tu misa’ apa megallian.
Sia da muruttakki kalemu ungkaromok olo’-olo’; sia misa’ baine da nabendan sipatu misa’ olo’-olo’ la sikaromok sola, belanna iamo gau’ sala megi’giran tongan to.
Da miruttakki kalemi napobua’ tu mintu’na te, belanna tete dio tu mintu’na te naruttakki kalena tu mintu’ bangsa, Kurambai dio mai tingayomi.
Iatu tondok iato diruttakki sia Kupabala’i tu kakadakeanna, iamoto naluai padang tu mintu’ to umpa’tondokki.
Sangadinna la mikaritutui tu mintu’ aluk Kupondok sia mintu’ atorangKu, sia moi misa’ tu apa megallian da mipogau’i, la to Israel dadi lan tondok la to sae tu misisolan.
Belanna mintu’ te apa megallian tu napogau’ tau lan tondok, tu dolo na kamu lan tondok iate, naurungan maruttak te tondos-
dikua anna da naluakomi tu tondok iate, ke miruttakki, susi tu bangsa dolo na kamu mangka nalua.
Belanna minda-minda umpogau’i te apa megallian iate, iamo la disabu’i dio mai bangsana.
Iamoto la mikaritutui tu atoran Kubenkomi, kumua da mipogau’i tu aluk dipondok megallian, tu napogau’ tau dolo na kamu, kumua da miruttakki tu kalemi tete dio apa iato. Akumo tu PUANG, Kapenombammi.