Imamat 23

Ma’kadami tu PUANG lako Musa nakua:

Ma’kadako lako to Israel sia kuanni lako kumua: Iatu mintu’ attu pa’gauran dipamadatuan PUANG, tu mipetamban butung pa’kombongan masero, iamotu attu pa’gauran dipamadatuanNa’.

Annan allona la nanii tau mengkarang, apa allo ma’pempitu iamo sipatu allo katorroan madatu tongan, iamotu misa’ pa’kombongan masero; moi misa’ pengkarangan da mikarangi, belanna iamo misa’ allo katorroan dipamadatuan PUANG lan mintu’ inan minii torro.

Inde sia tu mintu’ attu pa’gauran dipamadatuan PUANG, iamotu pa’kombongan masero, tu la minii umpetambanni lan attu dipamanassa.

Lan bulan bunga’na, allo ma’pessangpulo a’pa’na bulan iato, ke makaroenni, iamo pa’pasa, dipamadatuan PUANG.

Lan allo ma’pessangpulo lima bulan iato den tu attu pa’gauran roti tang diragii dipamadatuan PUANG; la mikande tu roti tang diragii lan pitung allo.

Lan allo bunga’na la den tu pa’kombongan maseromi; allo iato da mikarangi tu dakaran kandemi.

Pitung allo la minii umpemalaranni tu pemala’ pantunu lako PUANG; iake allo ma’pempitu la den pa’kombongan masero; da mikarangi tu dakaran kandemi.

Ma’kadami tu PUANG lako Musa Nakua:

Ma’kadako lako to Israel, mukuanni kumua: Iake tamakomi tondok tu la Kukamaseangkomi ammi alai tu burana, iatu bunga’ pealammi sanguyun la dibaa lako to minaa,

anna sorongi natarima sule tu sanguyun bura padang iato dio oloNa PUANG, kumua Napopaimankomi Puang; masiangna allo katorroan to la nasorong natarima sule to minaa.

Iato allo minii ussorong untarima sulei tu sanguyun bura padang iato, la mipasakka’ tu misa’ domba sangtaunmo tu tae’ tattanna, la dipemalaran ditunu pu’pu’ lako PUANG,

sisola kande dipemalaran, iamotu ta’pung manisak duang taan sangpulona dipasigerok minna’, la dipopemala’ pantunu, la Napobau busarungngu’ PUANG, situang uai anggoro’ taa penna’pa’na misa’ hin dipopemala’ pantedok.

Da mikande roti ba’tu sara’buk ba’tu lise’ gandung sae lako mipemalaranna tu pemala’ lako Kapenombammi; iamote tu aluk dipondok matontongan lako bati’mi lan mintu’ inan minii torro.

Randuk dio mai allo sidampi’na allo katorroan, iamotu allo minii umpennoloan sanguyun bura padang la dipopemala’ disorong ditarima sule, la miia’ ganna’ pitung minggu;

sae lako allo sidampi’na allo katorroan ma’pempitu, la miia’ limangpulo allona; allo iato la minii umpennoloan kande dipemalaran tu ba’runna lako PUANG.

La umbaakomi da’dua roti pemala’ disorong ditarima sule; roti iato ta’pung manisak digaraga, diala duang taan sangpulona epa, diragii anna ditunu, iamotu bunga’ pealammi, la dipennoloan lako PUANG.

Sisola tu roti iato la mipemalaran tu pitu domba sisangtaunmo tu tae’ tattanna sia misa’ sapi laki mangura sia da’dua domba laki; mintu’nato la dipopemala’, ditunu pu’pu’ lako PUANG sola kande dipemalaran sia pemala’ pantedok, la dadi pemala’ pantunu Napobau busarungngu’ PUANG.

Sia la umpasakka’komi misa’ bembe’ laki la diposuru’ pengkalossoran sia da’dua domba sisangtaunmo la dipopemala’ kasalamaran.

Sia la nasorong sia natarima sule to minaa sisola tu roti bunga’ pealanna tau, dipopemala’ disorong ditarima sule dio oloNa PUANG sola tu da’dua domba; iatu iannato la dipamaindan lako PUANG, anna potaai to minaa.

Allo ia dukato la metambakomi ammi pogau’ pa’kombongan masero, sia da mikarang dakaran kandemi; iamote tu aluk dipondok matontongan lako bati’mi lan mintu’ inan minii torro.

Iake unnalakomi bura padangmi, da mupurai tu randanna muala sia da mururukki tu musalanna, sangadinna la mutampean bang to kalala’ sia to sae: Akumo tu PUANG, Kapenombammi.

Ma’kadami tu PUANG lako Musa Nakua:

Ma’kadako lako to Israel kumua: Lan bulan ma’pempitu lan bunga’na bulan iato la den tu allo katorroammi; la dipannoni tu tarompe’ pua umpaissanni tau tu iannato, iamotu pa’kombongan masero.

Da mikarang dakaran kandemi, sangadinna la umpemalarangkomi pemala’ pantunu lako PUANG.

Ma’kadami tu PUANG lako Musa Nakua:

Apa iake allo ma’pessangpulona bulan ma’pempitu iamoto tu allo kadiseroian kasalan: la den tu pa’kombongan maseromi, ammi pamadiongan penaammi sia umpemalaran pemala’ pantunu lako PUANG.

Allo iato da mimengkarang; belanna allo iato allo kadiseroian kasalan, la dipadenangkomi kadiseroian kasalan dio oloNa PUANG, Kapenombammi.

Iamoto minda-minda tu tae’ napamadiongan penaanna allo iato, la kusabu’i dio mai bangsana.

Minda-minda ungkarang moi ba’tu pengkarangan apa allo iato, la Kumangsanni dio mai bangsana.

Moi misa’ pengkarangan da mikarangi; iamote tu aluk dipondok matontongan lako bati’mi lan mintu’ inan minii torro.

Iatu allo iato allo katorroan madatu tongan lako kalemi, sia la umpamadiongangkomi penaammi. Lan to allo ma’pengkasera bulan iato, ke makaroenni, randuk dio mai makaroen sae lako makaroen, la mipakaraya tu allo katorroammi.

Ma’kadami tu PUANG lako Musa Nakua:

Ma’kadako lako to Israel kumua: Iake allo ma’pessangpulo limanna bulan ma’pempitu randukmi tu pa’gauran pekalumban dipamadatuan PUANG lan pitung allo.

Iatu allo bunga’na la den pa’kombongan masero, da mikarang dakaran kandemi lan allo iato.

Lan pitung allo la minii umpemalaran pemala’ pantunu lako PUANG; sia iake allo ma’pengkarua la den tu pa’kombongan maseromi sia la mipemalaran tu pemala’ pantunu lako PUANG; iamote tu allo dipamadatu, allo iato da mikarang dakaran kandemi.

Iamote tu mintu’ attu pa’gauran Napamanassa PUANG, tu minii umpetamban pa’kombongan masero la umpemalaran pemala’ pantunu lako PUANG, iamotu pemala’ ditunu pu’pu’, kande dipemalaran, pemala’ pangrere’, sia pemala’ pantedok, pantan unturu’ atoranna, ke nalambi’oi allona,

senga’pi tu allo katorroanNa PUANG sia senga’pi tu pamengan sia mintu’ pemala’ belanna pangallonanna sia mintu’ pemala’ tanning inaa, tu la miben PUANG.

Apa iake allo ma’pessangpulo lima lan to bulan ma’pempitu, ke urrampunmokomi mintu’ bura padangmi, la umpakarayakomi pa’gauran Napamanassa PUANG lan pitung allo; iake allo bunga’na la den katorroan sia iake allo ma’pengkaruanna la den duka katorroan.

Ianna allo bunga’na la miala tu buanna kayu melo, sia palapa koroma sia takke’-takke’ kayu umbalumbun sia takke’-takke’ araba nahala, ammi parannu-rannu dio oloNa PUANG, Kapenombammi lan pitung allo.

Iatu pa’gauran iato la mipakaraya mipamadatuan PUANG pitung allo lan sangtaun, iamotu aluk dipondok matontongan lako bati’mi; lan bulan ma’pempitu la minii umpakarayai tu iannato.

Pitung allo la minii torro lan lantang pekalumban; iatu mintu’ to Israel tongan la torro lan lantang pekalumban iato,

anna issanni mintu’ bati’mi, kumua Kusua tu to Israel torro lan lantang, tongKu solanni tu tau iato mai tassu’ lan mai tondok Mesir: Akumo tu PUANG, Kapenombammi.

Susimoto tu Musa umpa’peissananni lako to Israel tu attu pa’gauran Napamanassa Puang.