Imamat 25
Ma’kadami tu PUANG lako Musa dao buntu Sinai Nakua:
Ma’kadako lako to Israel sia kuanni kumua: Iake tamakomi tondok tu la Kukamaseangkomi, la melayo tu mai pa’pa’lakan, iamotu attu katorroan dipamadatuan PUANG.
Annan taunna la munii unnambo’i tu pa’lakmu sia annan taunna la munii umpetakke’-takke’i tu garonto’ anggoro’ lan pa’lakmu, ammu rampunni tu burana,
apa iake taun ma’pempitu la den tu attu katorroan madatu tongan tu pa’pa’lakan iato, iamotu attu katorroan dipamadatuan PUANG; da muambo’i tu pa’lakmu sia da mupetakke’-takke’i tu garonto’ anggoro’ lan pa’lakmu.
Iatu umbu’ tuo lan pa’lakmu da muka’ta’i sia iatu buanna garonto’ anggoro’mu tu tang dipetakke’-takke’i da murampunni; iamoto tu taun kapelayoanna pa’pa’lakan iato.
Iatu bura padang lan attu katorroan la mipokande: la iko la iatu kaunanmu muane sia baine, la to sumaromu sia to sae, tu musisolan.
La napokande duka patuoammu sia mintu’ olo’-olo’ lan padangmu tu mintu’ bura padang iato.
La muia’ tu pitung taun katorroan, iamotu pempitu ke sipitung taun; naurunganni iatu attu pitung taun katorroan patangpulo ngkasera taunna.
Attu iato la mupannoni tu tarompe’ pua tiku lao lan bulan ma’pempitu, ke allo ma’pessangpulona; ke allo kadiseroian kasalan la minii umpannonii tu tarompe’ pua tiku lao dio lu mintu’ tondokmi.
Iate taun ma’limangpulo la mipamadatu, ammi petamba-tambanni tu kadirampanan lan tondok lako mintu’ to umpa’tondokki, la mipotaun Yobelmo tu attu iato; attu iato pantan la sulekomi umpeloloi apammi sia pantan la sulekomi lako pa’rapuammi.
La mipotaun Yobel te taun ma’limangpulo; attu iato da mimangambo’ sia da mika’ta umbu’ sia da mirampunni tu buanna garonto’ anggoro’ tang dipetakke’-takke’i.
Belanna la mipotaun Yobel, la mipomadatu; iatu apa mennumbu’, iamo la mipokande.
Lan te taun Yobel pantan la sulekomi umpeloloi apammi.
Iake umbalukko apammu lako sangbangsamu ba’tu unnalli apanna, da misiparugi.
Diagian tu taun undampi’ pole’i tu taun Yobel, ammu allii tu apanna sangbangsamu; anna balukki lako kalemu siagi tu mintu’ taun la dinii umpeburai.
Kabudanna taunna la minii umpasiagii tu kabudanna pangallimmu sia ianna sosso’ tu taunna la sosso’ duka tu pangallimmu, belanna iaranna manna tu burana nabalukan lako kalemu.
Da misiparugi len, sangadinna la ungkataku’ko Kapenombammu, belanna Akumo tu PUANG, Kapenombammi.
Iamoto la mituru’ tu mintu’ aluk Kupondok sia la mikaritutui tongan tu atorangKu, ammi tuo marampa’ lan tondok.
Sia iatu padang la umbenkomi burana sia la mikande sadia’mi, ammi tuo marampa’ lan tondok.
Iake mikua: Apa la kikande lan to taun ma’pempitu, tonganna anna tae’ kima’din mangambo’ sia unnala bura padangki,
manassa la mesuaNa’ anna rampoikomi kamauparan lan to taun ma’pennannan, anna iatu padang umpakendekangkomi burana siagi lan tallung taun.
Lan tu taun ma’pengkarua la minii mangambo’, apa la mikande siapa tu bura padang taun dolo sae lako taun ma’pengkasera; sae lako mialanna tu bura padang taun iato, tontongpa mikande tu bura padang taun dolo.
Iatu padang iato tae’ na la dibaluk sae lakona, belanna padangKu sia kamu to sae sia to mentiruran tu torro dio padangKu.
Dio lu mintu’ padang, iatu mipoapanna, la mieloran anna dila’bak.
Iake kalala’mi tu siulu’mu, nadiparuku umpamalei tu misa’ barang apanna, la sae tu siulu’ marengke’na ulla’bakki, sia ia la ulla’bakki tu apa mangka napamale siulu’na.
Iake tae’i tau ulla’bakanni, apa silasa siamo pandaka’na kalena, anna appa’i tu apa la napangla’bakan,
anna iatu taun-taun lendu’mo randuk dio mai dipamalena diia’, anna iatu torronapa dibaya’ sule lako tu to dinii umpamalei, kumua anna alai sule tu apanna.
Apa iake tae’i pa’pabu’tunna, tu silasanna la napasuleanni, manassa iatu apa napamale napoapa to unnallii sae lako taun Yobel; apa lan taun Yobel la tilendokmo sia la sule lako puangna siamo.
Iake den tau umpamale misa’ banua lan kota dibenteng tembo’, ma’din la nala’bak, ke ganna’mi sangtaun temponna napamale; lan sangtaun ma’din nanii ulla’bakki.
Apa iake tae’i nala’bakki, ke ganna’mi sangtaun, iatu banua lan kota dibenteng tembo’ iato, napoapa tontongmo to unnallii sae lako bati’ siosso’na; tae’ natilendok lan taun Yobel.
Apa iatu banua lan kampong, tu tae’ nadibenteng tembo’ la dipasangbilangan sola pa’pa’lakan, iamoto nama’din dila’bak sule, sia tilendok lan taun Yobel.
Iatu kota nanii to Lewi, iatu diona banua lan kota tu napoapa – iatu to Lewi tontong dieloran la ulla’bakki.
Iake misa’ to Lewi unnallii tu banua iato, na iatu banua dipamale torro lan kota napokota, la tilendok lan taun Yobel; belanna iatu mintu’ banua lan lu kota nanii to Lewi, iamo umpoapai dio lu to Israel.
Na iatu padang kariuan tiku lao kotana tau iato mai tae’ nama’din dipamale, belanna napomana’ matontongan.
Iake kalala’mi tu siulu’mu, anna tae’mo tu pandakaranna, la mutundui, susito sae sia to mentiruran, anna tuo musisolan.
Da mupedenne’i ba’tu umpesaroi, sangadinna la ungkataku’ko Kapenombammu, anna iatu siulu’mu tuo musisolan.
Da mupedenne’i, ke mubenni doi’mu sia da mupeburai, ke mubenni kandemu.
Akumo tu PUANG, Kapenombammi, tu ussolangkomi tassu’ lan mai tondok Mesir, angKu kamaseangkomi tondok Kanaan, kumua anna Aku dadi Kapenombammi.
Iake kalala’mi tu siulu’mu tu musisolan anna sandang lako kalemu, da musuai ungkarang pengkarangan kaunan.
Sangadinna la torro dio kalemu susito sumaro sia susito mentiruran; sia la umpengkarangangko sae lako taun Yobel.
Attu iato la tilendok dio mai kalemu la ia la iatu mai anakna, nasule lako pa’rapuanna sia la umpoapai sule tu mana’na nene’ to dolona.
Belanna tau iato mai taungKu, tu Kusolan lan mai tondok Mesir; tae’ nama’din dibalukan, susito umbaluk kaunan.
Da mumakarra’ umparentai, sangadinna la mukataku’ tu Kapenombammu.
Apa iatu kaunanmu muane sia baine tu mururanni la lu dio mai mintu’ bangsa tiku lao; dio mai tau iato la mialli tu kaunan muane ba’tu baine.
Dio duka mai anakna to mentiruran tu torro misisolan sia dio mai pa’rapuanna tu misisolan, tu nadadian lan tondokmi, la minii unnallii tau iamoto mai tu la mipotau.
La misorong tu tau iato mai lako anakmi la napokaunan garonto’, anna pomana’i; la miposuan tontongmo tu tau iato, apa iatu siulu’mi, iamotu to Israel, da nasiparenta makarra’.
Iake den to sae ba’tu to mentiruran, tu torro dio lu tu muninna, kerangngan tu iananna, anna sandang lako to sae iato ba’tu to mentiruran iato tu torro dio lu tu muninna, ba’tu lako misa’i bati’na to sae,
manassa, ianna sandangmo, ma’din la dila’bak, ma’din la nala’bak sala umbanna mintu’ siulu’na.
Ba’tu pa’amberanna, ba’tu anakna pa’amberanna ma’din ulla’bakki ba’tu sangdadian marengke’na dio mai sangrara sangbukunna la ulla’bakki, ba’tu iake ganna’mi tu pandaka’na, ma’din nala’bakan kalena.
La naagian sola tu to unnallii randuk tu taun nanii sandang lako kalena sae lako taun Yobel, na iatu doi’ allinna dipasireken bilanganna taun nanii mengkarang; susito sumaro dio kalena.
Iake budapi tu taunna, la napasule tu doi’ pangla’bakna dipasipatu tu doi’ diallianni.
Iake sidi’mira tu taunna sae lako taun Yobel, la naagian melo sola tu tau unnallii, anna pasulei tu doi’ pangla’bakna; la napasule tu doi’ pangla’bakna dipasipatu taunna.
Iamoto la susitu to sumaro nasolan ke taunoi; tae’ na la umparenta makarra’i dio pentiromu.
Apa iake tae’i nadila’bak susito, nalambi’i taun Yobel, la tilendok tu tau iato, la ia la iatu mai anakna.
Belanna iatu to Israel Kupotau; taungKu tu tau iato mai tu mangka Kusolan dio mai tondok Mesir; Akumo tu PUANG, Kapenombammi.