Imamat 27

Ma’kadami tu PUANG lako Musa Nakua:

Ma’kadako lako to Israel sia kuanni kumua: Iake denni tau umpangallonni misa’ pangallonan, situru’ tu muanggaran to disorong lako PUANG,

la muanggaranni tu misa’ muane randuk duangpulo taunna sae lako annan pulona taunna, iatu la muanggaranni limangpulo sikele’ salaka, tu pada sikele’ lan inan maindan.

Apa iake misa’ baine, la muangga’ tallungpulo sikele’.

Apa iake tau silimang taunmo sae lako duangpulo taunna, ianna misa’ muane la muangga’ duangpulo sikele’ sia ianna misa’ baine sangpulo sikele’.

Iake pia sisangbulan sae lako limang taun, la muangga’ tu misa’ pia muane lima sikele’ salaka sia iake misa’ pia baine tallu sikele’ salaka.

Iake to annanmo pulona taunna ba’tu la’bi, ianna misa’ muane la muangga’ sangpulo lima sikele’ sia ianna misa’ baine sangpulo sikele’.

Iake tang nabelai tu muanggaranni, belanna kalala’, la nabaa tau napopennolo lako to minaa, na tominaa iato la unnangga’i; pada tu la nabelanna tu to mangallonan iato, la naanggaranni to minaa.

Iake diala dioi mai tu patuoan dipemalaran lako PUANG, iatu mintu’na patuoan iato tu dipennoloan lako PUANG dio mai patuoan iato, la maindan.

Tae’ nama’din tu tau ussondai ba’tu la untuka’i, iamotu melona nasondai kadakena, ba’tu kadakena nasondai melona. Apa iake napasituka’i tu misa’ patuoan, manassa iate patuoan dipamanassa sia iatu tuka’na la maindan.

Iake denni misa’ patuoan maruttak, tu tae’ nama’din dipemalaran lako PUANG, la dipopennolo dio olona to minaa,

sia la naangga’ to minaa napasipatui tu melona sia kadakena; susitu naanggaranni to minaa, la susimoto.

Ianna den tau la morai ulla’bakki la narangnganni pissan taa pellimanna tu angga’na.

Iake den misa’ tau umpamaindan banuanna la dipamanassa maindan lako PUANG, la naangga’ to minaa la dipasipatui tu melona sia kadakena; susitu naanggaranni to minaa, la susi dukamoto.

Apa iatu to umpamaindanmo banuanna, ke morai ulla’bakki, la narangnganni pissan taa pellimanna angga’na; anna poapai sule tu banuanna.

Iake denni misa’ tau umpamaindanan PUANG sangtaan padang mana’na, iatu muanggaranni sitinaya amboranna iamotu sangome’ dalle sisikan diambo’ diangga’ limangpulo sikele’ salaka.

Iake napamaindanni tu pa’lakna, tempon dio mai taun Yobel, iatu dianggaranni la tontong bang.

Iake napamaindanni tu pa’lakna, ke lendu’mi tu taun Yobel, la naia’ to minaa tu doi’ sipatunna taun torronapa sae lako taun Yobel, sia la napasosso’ dio mai tu doi’ dianggaranni.

Iake la morai tu to umpamaindan pa’lakna nala’bakki sule, manassa la narangnganni tu doi’ dianggaranni pissan taa pellimanna, natontong umpoapai tu pa’lak iato.

Iake tae’i nala’bakki tu pa’lak iato sia iake nabaluk lakoi to senga’, tae’mo nama’din ulla’bakki,

sangadinna iatu pa’lak iato, ke tilendokmi lan taun Yobel, la dipamaindan lako PUANG, susitu pa’lak dipa’pemalii, anna poapai to minaa.

Iake napamaindananni PUANG tu misa’ pa’lak naalli, tu tangia pa’lak mana’na,

iatu doi’ dianggaranni la naiaran to minaa sae lako taun Yobel, anna sorongi te doi’ dianggaranni to allo iato, butung misa’ apa dipamaindanan PUANG.

Iake taun Yobel la dipasule tu pa’lak lako to dinii unnallii, iamotu lako to umpomana’i tu padang iato.

Iatu mintu’ dianggaranni la situru’ sikele’ lan inan maindan, iamotu duangpulo gera, ke sangsikele’i.

Apa iatu mintu’ anak bunga’na patuoan, tu belanna anak bunga’na, iamoto napoapai PUANG, moi misa’ tau da napamaindanni tu iannato, la sapi la domba sia bembe’; iatu iannato apanNa PUANG.

Apa iatu mintu’ patuoan maruttak, sipatu dila’bak sitinaya dianggaranni anna dirangnganni pissan taa pellimanna, sia iake tae’i nadila’bak, ma’din dibaluk sitinaya dianggaranni.

Apa iatu mintu’ apa napa’pemalian tau lako PUANG dio mai mintu’ apanna la tau ba’tu patuoan ba’tu padang, moi misa’ tae’ nama’din dibaluk, ba’tu dila’bak; iatu mintu’ dipemalianna, iatu iannato tarru’ maindan lako PUANG.

Iatu mintu’ dipopepayuan, iamotu pepayuammo dio lu to lino, moi misa’ tae’ nama’din dila’bak; manassa inang la dipatei.

Mintu’ tu sangtaan sangpulona bura padang, iamotu polean padang sia mintu’ bua kayu, iamo apanNa PUANG; iatu iannato maindan lako PUANG.

Apa iake den misa’ tau la ulla’bak sangtaan sangpulona bura padang, la narangnganni pissan taa pellimanna.

Mintu’ sangtaan sangpulona sapi ba’tu domba sia bembe’, tu lendu’ diongna lu tekken, iatu sangtaan sangpulona, iamoto tu maindan lako PUANG.

Da natiroi tau tu melona ba’tu kadakena sia da napasituka’i; iake den tau umpasituka’i, manassa iate patuoan sia iatu tuka’na la maindan lako PUANG: tae’ nama’din dila’bak.

Iamote tu pepasan Napa’bengan PUANG lako Musa dao buntu Sinai, la naparampo lako to Israel.