Imamat 3

Iatu pemala’na ke pemala’ kasalamaran, sia iake sapi napemalaran, la napennoloan lako PUANG tu misa’ sapi laki ba’tu birang tu tae’ tattanna.

La naremme’ tu ulu pemala’na sia la natunu dio to’ ba’ba Tenda Kasitammuan, sia iatu rarana la napa’pi’pikan to minaa, iamotu mai anakna Harun, tiku lao dao inan pemalaran.

Iatu pemala’ kasalamaran tu dipopemala’ pantunu la napennoloan lako PUANG tu kampipi’na sia mintu’ lompo dio lu tambuk barinni’ iato,

sia bale’ke’na da’dua sola lompona dio, sia iatu lompo aakna sia tampak atena; la naalai sola bale’ke’na.

Mintu’na to la natunu anakna Harun dao inan pemalaran, iamotu dao pemala’ ditunu pu’pu’, dao kayu, tu ditamben dao api, la dipopemala’ pantunu dipobau busarungngu’ dio oloNa PUANG.

Iatu pemala’na, ke misa’ domba ba’tu bembe’ napopemala’ kasalamaran lako PUANG, la napennoloan tu misa’ patuoan tae’ tattanna, iamotu lakinna ba’tu birangna.

Iake domba tu la napemalaran, la napennoloan dio oloNa PUANG,

sia la naremme’ tu ulu pemala’na, anna tunui dio to’ ba’ba Tenda Kasitammuan, sia iatu rarana la napa’pi’pikan anakna Harun tiku lao dao inan pemalaran.

Iatu pemala’ kasalamaran la napennoloan tu lompona dipopemala’ pantunu lako PUANG, iamotu mintu’ ikko’ malompona, tu sipatu nata’takki sikandappi’ buku boko’na, sia iatu kampipi’na sia iatu lompo dio lu tambuk barinni’ iato.

Ia duka tu bale’ke’na da’dua sola lompona dio, sia iatu lompo aakna sia balaan atena; la naalai sola bale’ke’na.

Mintu’nate la natunu to minaa dao inan pemalaran, la dadi kande dipopemala’ pantunu lako PUANG.

Iatu pemala’na ke misa’i bembe’ birang, la napennoloan dio oloNa PUANG;

la naremme’ tu ulunna, anna tunui dio to’ ba’ba Tenda Kasitammuan, sia iatu rarana la napa’pi’pikan anakna Harun tiku lao dao inan pemalaran.

Iatu iannato la napennoloan tu pemala’na, dipopemala’ pantunu lako PUANG, iamotu kampipi’na sia iatu lompo dio lu mintu’ tambuk barinni’ iato;

ia duka tu bale’ke’na da’dua sola tu lompona dio sia iatu lompo aakna sia balaan atena; la naalai sola bale’ke’na.

Mintu’nate la natunu to minaa dao inan pemalaran, la dadi kande dipopemala’ pantunu, la dadi bau busarungngu’; mintu’na tu lompo iamo dipapatuan PUANG.

Iamote tu misa’ apa dipondok matontongan la misiosso’i dio lu mintu’ inan minii torro, kumua da mikandei tu lompo sia iatu rara.