Kejadian 2

Susimoto tu langi’ sola lino sia mintu’ issinna mangka dipatepu.

Iatonna allo ma’pempitu tonNa patepumi Puang Matua tu pengkaranganNa tu mangka Nakarang, Natorroimi tonna allo ma’pempitu ungkarangi tu mintu’ pengkarangan mangka Nakarang.

Napassakkemi Puang Matua tu allo ma’pempitu sia Napamadatu, belanna ia Nanii untorroi ungkarang pekaranganNa tu mangka Nakarang tonNa padadii.

Susimoto tu ulelean diona tipamulanna langi’ sola lino, tonna mangka dipadadi. IatonNa garagai tipamulanna PUANG Kapenomban tu langi’ sola lino,

– anna mintu’ kayu dao kuli’na padang tonna tae’pa lan lino sia mintu’ tananan dao kuli’na padang tonna tang mentarukpa, belanna tae’pa anNa pasaei PUANG Kapenomban tu uran tama lino sia tae’pa tau la umposara’i tu litak,

sangadinna kendek tu ambun diong mai padang anna sakka’i tu mintu’ kuli’na padang –,

Nakombongmi PUANG Kapenomban tu tolino dio mai litak, Napamurru’i tama to’tok illongna tu penaa napotuo, susimoto tu tolino mendadi misa’ a’gan tuo.

Nagaragaomi PUANG Kapenomban tu Pa’lak dio Eden, dio rampe matallo, indemoto Napannianni tu tolino mangka Nakombong.

Indeto dio Nanii PUANG Kapenomban umpatuo ma’rupa-rupa kayu, naporai tau untiroi sia melo la dikande, sia den duka tu kayu katuoan, lan tangnga pa’lak iato, sia kayu kapaissanan diona melo na kadake.

Dio mai Eden nanii lolong salu la ussakka’i pa’lak iato, indemoto nanii tipa’a’pa’ tu salu.

Iatu salu bunga’na disanga Pison, ussalungku tondok Hawila, tu nanii bu’tu bulaan.

Iatu bulaanna padang iato matasak tongan, sia den duka dio tu lite busarungngu’ sia ake’ ido.

Iatu salu ma’penduanna disanga Gihon, iamo ussalungku tondok Etiopia.

Iatu salu ma’pentallunna disanga Hidekel, iamo lolong lu tama rampe matallona Asyur, na iatu salu ma’penna’pa’na disanga Efrat.

Naalami PUANG Kapenomban tu tolino, Napalanni pa’lak Eden, kumua anna posara’i sia anna kampai.

Ma’kadami PUANG Kapenomban lako tolino Nakua: Iatu buanna mintu’ kayu lan te pa’lak, ma’din mukande unturu’ pa’poraiammu,

apa iatu kayu kapaissanan diona melo anna kadake da mukandei, belanna randuk allo iato ke mukandei, la ma’lalan mateko.

Sia ma’kada tu PUANG Kapenomban susite: Tae’ anna melo, ke misa-misa bangri tu tolino. La Kukombongan to umbalii, tu nasangkalammaran.

Belanna iatonna mangkamo Napadadi PUANG Kapenomban tu mintu’na olo’-olo’ dao kapadanganna sia mintu’ manuk-manuk dao lu langi’ dio mai litak, Napopentingayo nasangmi lako tolino, la Natiro umba nakua tolino la ussangai; umba nasanganni tolino tu mintu’ a’gan tuo, susi dukamoto tu sanganna.

Nasangaimi tolino tu mintu’ patuoan sia mintu’ manuk-manuk dao lu langi’ sia mintu’ olo’-olo’ dio lu kapadanganna, apa iatu tolino tae’ anna appa’i tu to nasibalian tu nasangkalammaran.

Napamamma’ kalupi-lupiammi PUANG Kapenomban tu tolino, anna leppeng Naalami tu usukna sangbamban, Napakemunni duku’ tu pangalaian.

Nakombongmi PUANG Kapenomban misa’ baine tu usuk Naala lan mai kalena tolino, Nasolanni lako tolino.

Nakuami tolino: Buku lu dio pale’ mai bukungku sia duku’ lu dio mai duku’ku; la disanga baine, belanna diala dio mai muane.

Iamoto anna la untampe ambe’na sia indo’na tu muane anna la’ka’ lako bainena, anna mendadi sangbatang kale sola duai.

Ma’kale-kale bang sola duai ma’baine tu tolino, apa tae’ namasiri’.