Kejadian 21

Nabuaimi PUANG lako Sara to apa mangka Naalluranni sia Napogau’ PUANG lako susitu kadanNa.

Belanna ma’tambukmi tu Sara, anna padadianni misa’ pia muane tu Abraham tonna matuamo, iamoto attu mangka Napamanassa Puang Matua lako kalena.

Nabenmi sanga Abraham tu anakna, dadi dio kalena tu napadadianni Sara, nasanga Ishak.

Nasunna’mi Abraham tu Ishak, anakna, tonna karuamo allona dadinna susitu pepasanNa Puang Matua lako kalena.

Iatonna didadian tu Ishak, saratu’mo taunna tu Abraham.

Nakuami Sara: Napopetaana’ Puang Matua, naurunganni mintu’ tu to urrangii la kusolan metaa.

Sia nakua siapa: Mindara la ma’din umpokadai to lendu’namo lako Abraham, kumua la umpasusu pia-pia’ tu Sara? Na kupadadian duka siai misa’ pia muane lan attu matuanna.

Iatu pia sakapua-puana nasumarak susu. Iatonna sumarak susumo tu Ishak, umpogau’mi pa’maruasan kapua tu Abraham.

Natiromi Sara tu anakna Hagar, baine to Mesir, tu mangka napadadian Abraham marassan ma’be’se.

Iamoto anna kua Sara lako Abraham: Rambai lao te baine sabua’ iate sola anakna, belanna iate anakna baine sabua’ iate, tae’ nama’din la sidulu mana’ anakku Ishak.

Iate kada iate lendu’ kadakena nasa’ding Abraham, diona tu anakna.

Apa ma’kada tu Puang Matua lako Abraham: Da na kadake musa’ding diona te pia iate sia diona kaunanmu; iatu mintu’ napokadanna Sara perangii, belanna lan Ishak la dinii ussa’bu’i tu bati’mu.

Na iatu anakna te baine kaunan la Kupadadi misa’ bangsa, belanna bati’mu duka.

Millikmi tu Abraham tonna melambi’, naalai tu roti na misa’ kiriba’ nanii uai lan, nabenni Hagar, napatoppo’i dao palempengna, naben dukai tinde pia, anna suai male. Malemi, anna pusa lan padang Bersyeba.

Iatonna puramo tu uai lan kiriba’ napamamma’mi tu pia dio to’ kakayuanna.

Malemi unno’ko’ lako to’ sipatunna agi-agi sangpassumpiran, anna ma’kada nakua: Tang kusara untiroi te pia mate. Unno’ko’mi sipatu pia iato lako, anna tumangi’ ma’urrukan.

Iatu gamaranna tinde pia narangi Puang Matua, Nametamba tu Malaeka’Na Puang Matua dao mai suruga ma’kada lako Hagar Nakua: Matumbaroko Hagar? Da mumataku’, belanna Naperangiimo Puang Matua tu gamaranna tinde pia dio mai to’ inanna.

Ke’de’ko, mubangunanni tu pia, mutoei, belanna iatinde pia la Kupopendadi misa’ bangsa kapua.

Nabungka’mi Puang Matua tu matanna Hagar; anna tiroi tu misa’ bubun, malemi umponnoi uai tu kiriba’, napairu’i tinde pia.

Narondongmi Puang Matua tinde pia, naurunganni kapua, natorro ma’tondok lan padang pangallaran mendadi to ma’pana.

Untorroimi padang Paran, naalammi indo’na misa’ baine dio mai tondok Mesir, la napobaine.

Ma’kadami tonna attu iato lako Abraham tu Abimelekh sola Pikhol, pa’baraninna, nakua: Iatu kamu narondongkomi Puang Matua lan mintu’ penggauran mipogau’.

Iamoto menggatakomi totemo lako kaleku ussa’bu’ sanganNa Puang Matua kumua tae’ ammi la ungkadakean lenna’ penaa, ba’tu bati’ku, ba’tu rapungku, sangadinna la mipogau’ lako kaleku sia lako tondok minii mempue lan, tu sitinayanna kameloan mangka kupogau’ lako kalemi.

Ma’kadami tu Abraham nakua: Kumenggatamora.

Naparapa’mi Abraham lako Abimelekh tu diona bubun mangka narampa solana Abimelekh.

Nakuami tu Abimelekh: Tae’ aku kuissanni minda mangka umpogau’i tu penggauran iato. Sia tae’ duka ammi pokadan lenna’, sia tae’ duka kurangi lenni tu iannato, sangadinna iamira te totemo.

Naalami Abraham ba’tu pira-pira tu domba sia bembe’ sola sapi, anna benni Abimelekh. Sibassemi sola duai.

Nasarakkimi Abraham tu pitu domba birang dio mai mintu’ domba.

Ma’kadami tu Abimelekh lako Abraham nakua: Apa la dipapatui te pitu domba birang, tu mangka mipopessarak?

Mebalimi Abraham: Iate pitu domba la mikarang dio mai limangku la kupotananan sa’bi, kumua aku umbo’bokki te bubun iate.

Iamoto anna sangai tau Bersyeba tu inan iato, belanna inde to nanii mangka sibasse sola duai.

Susimoto tu kasibasseanna dio Bersyeba sola duai; mangkato, ke’de’mi tu Abimelekh na Pikhol, pa’baraninna, nasule lako tana Filistin.

Natananmi Abraham tu sangto’ kayu esele dio Bersyeba anna menomba ussa’bu’ sanganNa PUANG, Kapenomban matontongan.

Torromi tu Abraham dio padang to Filistin ba’tu pirang-pirang allo.