Kejadian 42
Iatonna rangimi Yakub kumua den gandung dio Mesir, nakuami lako anakna: Ma’apari ammi sitiro-tiro bangra?
Sia nakua: Kurangimo kumua den gandung dio Mesir, iamoto malekomi rokko mialliangki’ dio mai anta tuo, da tamate.
Ke’de’mi tu siulu’na Yusuf sangpulo tau, lao unnalli gandung rokko Mesir.
Apa iatu Benyamin adinna Yusuf tae’ nasuai Yakub lao sola mintu’ siulu’na, belanna nakua Yakub: Matumba-matumbai manii.
Saemi tu mai anakna Israel unnalli gandung sola mintu’ tu to saemo, belanna masang duka tu ra’pak padang dio tana Kanaan.
Iatu Yusuf ma’parentamo dio tana iato, ia kalena duka umbalukan gandung lako to sae unnalli gandung. Susito sae dukami tu mintu’ siulu’na Yusuf anna tukku sae rokko padang dio olona.
Iatonna tiroi Yusuf tu mai siulu’na natandaimi, apa naangga’i tang untandai, nasarabai lako nakua: Bu’tu lu umbakomi nii? Mebalimi nakua: Lu diokan mai tana Kanaan, sae la unnalli kande.
Iatu Yusuf natandai tu siulu’na, apa tae’ ia natandai siulu’na.
Nakilalaimi Yusuf tu tindo napopa’tindo diona tau iato mai nama’kada lako nakua: Kamu te sola nasang to masserre’i saekomi la ummanta-mantai umbanna te tana tu tang di kampai.
Ma’kadami tu tau iato mai lako nakua: Tae’ ia, puang, sangadinna kami te saekan la unnalli kande.
Kami sola nasang te sangambe’rakan sia kami te to malambu’, tangiakanni to masserre’i.
Nakuami tu Yusuf: Tae’ sangadinna kamu te saekomi ummanta-mantai umbanna te tana tu tang dikampai.
Nakuami tu tau iato mai: Kami te sangpulo duakanni massiulu’, misa’ ambe’rakan dio tana Kanaan, iatu bongsunna totemo torro sola ambe’ki, na iatu misa’na’ pa’demo.
Nakuami tu Yusuf lako: Tongan siamo tu kadangku mati’ kumua kamu te to masserre’i!
Inde la disudiangkomi: Susitu katanglelukanna Firaun, tae’ mima’din tassu’ indete, sangadinna ke saemi tu adimmi inde.
Suai misa’ ba’tu mindammi lao unnala adimmi, apa iatu kamu te dipattangkomi indete, kumua anna iatu kadammi diissan disudi, ba’tu la to manappa’komi. Apa iake tae’i, susi katanglelukanna Firaun, manassa to masserre’i siamokomi!
Napatamami pa’tarungkuan sola nasangi tallung allo.
Iatonna ma’tallung alloammo nakuami Yusuf lako: Pogau’i te ammi tuo, belanna ungkataku’na’ Puang Matua.
Iake tongannai to malambu’komi, melo ke misa’i siulu’mi torro dipattang lan te pa’tarungkuan, ammi male sola nasang umbaa gandung, belanna sipangeloammo tu tau dio banuammi.
Iake mibaammo’ sae tu adimmi, manassa tongan tu kadammi sia tae’ mila dipatei. Napogau’mi susito.
Ta’kala nasipa’kadamo sola nasangi nakua: Manassa kita te sola nasang kasalangki’ lako adinta tu tatiro pu’du’ tu penaanna tonna mengkamase-mase lako kaleta, apa tae’ taperangii, iamoto anna rampoiki’ te kapu’duran.
Mebalimi Ruben nakua: Tangkupokadan rokomika kukua: Da mipogau’ kasalan lako te to mangura! Apa tae’ mimorai umperangii; iamoto tiromi: totemo dituntun tu bala’na rarana!
Tae’ naissanni kumua natandai Yusuf tu kadanna, belanna iatu Yusuf umpake duru basa misa’.
Mallaimi tu Yusuf natumangi’, undinna namane sule sipa’kada-kada; naalami tu Simeon namesua umpungoi dio tingayona sola nasangi.
Mangkato nasuami Yusuf tu tau umpatamai gandung tu mintu’ karungna sia pantan dipasule tama karungna tu doi’na sia naben kinallo la napokinallo lako lalan. Susimoto napogau’ tau lako kalena.
Napalangnganmi keledainna tu gandung, anna ke’de’ dio mai.
Denmi misa’ umbungka’ karungna dio to’ banua pa’bongian la umben kande keledainna, natiromi tu doi’na, lan sia baba karungna.
Nakuami lako siulu’na: Dipasulemo tu doi’ku, tiromi lan sia karungku! Selangmi sola nasangi sia tiramban anna sipa’kada-kada, nakua: Apamora te Napogau’ Puang Matua lako kaleta?
Rampomi lako Yakub, ambe’na, dio tana Kanaan, anna uleleanni lako tu mintu’na apa urrampoi kalena nakua:
Iatu puang ma’parenta lan tondok iato makarra’ tu kadanna lako kami, nasangakanni to lao usserre’i tondok.
Apa kikua ma’kada lako: To malambu’kan kami, tangiakan to masserre’i.
Iate kami te sangpulo duakan massiulu’, misa’ ambe’rakan, misa’mokan tu pa’de na iatu bongsunna torro sola ambe’ki totemo dio tana Kanaan.
Nakua tu puang ma’parenta lan tondok iato lako kami: Iamote tu ma’din kunii unnissankomi kumua to malambu’komi, torrokomi misa’ ammi male umbanni kande tu to dio banuammi, belanna sipangeloammo.
Sia banna’ dio mai tu adimmi, angku issanni kumua tangiakomi to masserre’i, sangadinna to malambu’komi; kumane umpasuleangkomi tu siulu’mi sia ma’din dukamokomi sumalong lan te tondok.
Iatonna pasun nasangi tu issi karungna, oh... anna pantan lan sia karungna tu poro’-poro’na nanii doi’; iatonna tiroi sia natiro duka ambe’na tu poro’-poro’ doi’na, mataku’mi.
Nakuami lako tu Yakub, ambe’na: Mipasisayuranna’ anak, belanna pa’demo tu Yusuf sia Simeon duka; totemo la miala pole’omo tu Benyamin. Mintu’nate napasumpu tonganna’!
Nakuami tu Ruben lako ambe’na: Patei tu anakku muane da’dua, ke tae’i angku solanni sule lako kalemi te to mangura. Patage’i bangmo’ manassa la kusolan lako kalemi sule!
Apa nakua tu Yakub: Iate anakku tae’ na la lao sola kamu, belanna iatu kakanna matemo na misa-misa mira totemo; iake matumba-tumbai lako lalan tu la miolainna, manassa la mipatama liang tu ubanku natumang kamapa’diranna penaangku.