Kejadian 46
Ke’de’mi tu Israel sibaa tu mintu’ apa naampui, narampo lako Bersyeba; anna pemalaran ba’tu pira-pira pemala’ lako Kapenombanna Ishak, ambe’na.
Iatonna bongi ma’kadami tu Puang Matua lako Israel lan patiro mendeata Nakua: E Yakub, Yakub. Ma’kadami Yakub nakua: Inde siana’, Puang!
Ma’kadami Nakua: Akumo tu Puang Matua, Kapenombanna ambe’mu, da mumataku’ lao lako Mesir, belanna dio la Kunii umpadadiko misa’ bangsa kapua.
Aku la musolan rokko Mesir sia manassa la Kupasule poleko diong mai, sia iatu Yusuf iamo la ussamboi matammu.
Susito ke’de’mi tu Yakub dio mai Bersyeba. Nasolan anakna Israel tu Yakub, ambe’na sia iatu mai anakna sia iatu mai bainena ma’kareta tu napa’peanni Firaun la umbaai tu tau iato mai.
Sia nabaa duka tu mintu’ patuoanna sia mintu’ barang apanna tu napasidurukmo lan tana Kanaan, narampo lako Mesir, iamotu Yakub sia mintu’ bati’na nasolan duka.
Iamotu mintu’na anakna muane sia ampona muane nasolan, sia iatu mai anakna baine sia ampona baine tu nadadian anakna muane, sia mintu’ tu bati’na nasolan duka lako Mesir.
Inde sia tu sanganna tu mai anakna Israel tu male rokko Mesir, Yakub sola mintu’ anakna muane: Iatu pa’bunga’na Yakub iamotu Ruben;
iatu anakna Ruben tu muane iamo: Henokh, Palu, Hezron na Karmi;
iatu anakna Simeon tu muane iamo: Yemuel, Yamin, Ohad, Yakhin na Zohar na iapa tu Saul tu nadadian baine to Kanaan;
na anakna Lewi tu muane iamo: Gerson, Kehat, na Merari;
na anakna Yehuda tu muane iamo: Er, Onan, Syela, Peres na Zerah; apa iatu Er sola Onan mangka mate dio tana Kanaan; na anakna Peres tu muane iamo: Hezron na Hamul;
na anakna Isakhar tu muane iamo: Tola, Pua, Ayub na Simron;
na anakna Zebulon tu muane iamo: Sered, Elon na Yahleel.
Mintu’nai te muane nadadian Lea, tu napadadian Yakub dio Padan-Aram sia Dinapa, anakna baine. Mintu’ tu anakna muane sia baine tallungpulo ntallu sola nasangi.
Iatu anakna Gad tu muane iamo: Zifyon, Hagi, Syuni, Ezbon, Eri, Arodi na Areli;
na anakna Asyer tu muane iamo: Yimna, Yiswa na Beria, na Serah anak daranna; na anakna Beria iamo: Heber na Malkiel.
Iamote tu muane tu mai anakna Zilpa, tu napa’ben Laban lako Lea, anakna, iamo mintu’i sangpulo annan tau napadadianni tu Yakub.
Iatu muane nadadian Rahel, bainena Yakub, iamo: Yusuf na Benyamin.
Iatu lakona Yusuf dadi dio tana Mesir tu Manasye sola Efraim, tu napadadianni Asnat, anakna Potifera, to minaa dio On.
Iatu anakna Benyamin tu muane iamo: Bela, Bekher, Asbel, Gera, Naaman, Ehi, Rosh, Mupim, Hupim na Ared.
Mintu’i te iamo muane anakna Rahel, tu napadadian Yakub, mintu’i sangpulo a’pa’ tau.
Iatu anakna Dan muane iamo: Husim.
Iatu anakna Naftali tu muane iamo: Yahzeel, Guni, Yezer na Syilem.
Iamote tu muane, tu mai anakna Bilha, tu napa’ben Laban lako Rahel, anakna, iamo mintu’i pitu tau napadadianni tu Yakub.
Mintu’i tu bati’na Yakub tu sae dio Mesir, tu sun dikalena boko’ tu mai bainena anakna, annan pulona nnannan tau sola nasangi.
Iatu anakna Yusuf tu muane tu dadi dio Mesir da’dua tau; namintu’ to lan banuanna Yakub tu sae dio Mesir pitungpulo tau sola nasangi.
Nasuami Yakub tu Yehuda male dolo lako Yusuf la umpokadanni Yusuf kumua diomo Gosyen tu Yakub. Rampomi to mai tau dio tana Gosyen.
Napasakka’mi Yusuf tu karetana, namale lako Gosyen lao untammui Israel, ambe’na. Iatonna sitammumo naraka’mi Yusuf tu barokona sia tumangi’, mendoyang ba’tu sangapa dio barokona.
Nakuami Israel lako Yusuf: Totemo moi matemo’ to, tu kutiro siamo tu lindomu, kumua tuo siapoko!
Ma’kadami tu Yusuf lako mintu’ siulu’na sia lako to lan banuanna ambe’na: La malena’ umpaissananni Firaun sia la umpokadanni kumua mintu’ siulu’ku sia mintu’ to lan banuanna ambe’ku dio tana Kanaan, rampomo lako kaleku.
Iatu tau sola nasangi manglaa domba, belanna biasamo umpatuo patuoan sia nabaa duka tu dombana sia bembe’na sia sapinna sia mintu’ tu apa naampui.
Iake natambaikomi Firaun, anna kutanaikomi kumua: apara tu pandakarammi?
La mebalikomi susite: Iate kami sola nasang biasakan umpatuo patuoan randuk dio mai bitti’ki sae lako totemo, la kami la to doloki. La susito, ammi dieloran torro lan tana Gosyen, belanna iatu to umpatuo domba nakagalli to Mesir.