Keluaran 24
Mangkato ma’kadami tu Puang lako Musa Nakua: Kendekkomi umpennoloi PUANG la iko sia Harun sia Nadab sia Abihu sia pitungpulo to matua-tua to Israel, ammi tukku mambela.
Musa manna misa-misai tu la mentireke’ lako PUANG, apa iatu tau iato mai tae’ nama’din mentireke’ sia tae’ duka na la kendek tu to buda nasisolan.
Saemi tu Musa umpokadai tu mintu’ kadanNa PUANG sia atoran lako to buda, anna mebali tu to buda susito misari gamara nakua: Mintu’ te kada iate tu Napokada PUANG, la kituru’.
Napatamami sura’ Musa tu mintu’ kadanNa PUANG, anna pelambi’i nagaragai tu misa’ inan pemalaran sia naosok tu batu sangpulo dua situru’ bilanganna sangpulo dua suku to Israel.
Nasuami tu ba’tu pira to mangura to Israel, umposara’i tu pemala’ ditunu pu’pu sia umpemalaran sapi laki napopemala’ kasalamaran lako PUANG.
Napa’duami Musa tu rarana naparokkoi pindan, napa’pi’pikanni inan pemalaran tu torrona.
Anna alai tu sura’ pangallu’ iato, nabasanni tu tau iato mai; ma’kadami tu tau iato mai: Mintu’ te kadanNa PUANG la kipogau’ sia la kituru’.
Naalami Musa tu rara iato, napi’pikanni tu tau iato mai, anna ma’kada nakua: Tonganna iamote tu rara basse, tu Natanan PUANG misibassei tu menggaronto’ lan mintu’ kada iate.
Kendekmi tu Musa sola Harun sia Nadab sia Abihu na pitungpulo to matua-tua to Israel.
Natiromi tau iato mai tu Kapenombanna to Israel, na diong to’ lette’Na den susi sali batu parimata lasuri’, na iatu parrangna butung to langi’ maserrong.
Apa tae’ Naparumbui limanNa lako tu to kapua to Israel, sangadinna tonna tiromi tu Puang Matua, maneri kumande sia mangiru’ tu tau iato mai.
Ma’kadami tu PUANG lako Musa Nakua: Kendekko langngan buntu mennolo lako Kaleku sia torroko inde to, angKu benko papan batu, iamo sukaran aluk sia pepasan Kusura’ la unnada’i tu tau iato mai.
Ke’de’mi tu Musa sia Yosua, taunna anna kendek tu Musa langngan buntunNa Puang Matua.
Ma’kadami lako mintu’ pekaamberan iato nakua: Torromokomi inde te ungkampaikanni sasuleki lako kalemi; iatu Harun sola Hur la torrokomi sola; minda-minda den kara-karana la nabaa lako kalena sola duai.
Mangkato kendekmi tu Musa langngan buntu, anna samboi gaun tu buntu iato.
Unnisungmi tu kamala’biranNa PUANG dao buntu Sinai nasamboi gaun annan allona; na iatonna allo ma’pempitu metambami tu PUANG lan mai gaun lako Musa.
Iatu rupa kamala’biranNa PUANG dio pentirona mintu’ to Israel butung to api ma’kande dao potok buntu iato.
Malemi tu Musa tama gaun iato, nakendek langngan buntu; anna torro dao buntu iato patangpulo allona patangpulo bonginna.