Keluaran 29
Susite la mupogauranni tu tau iato mai, kumua nadipamarimbangan untoei tu katominaan lako Kaleku: Alai tu sapi laki mangura misa’ sia da’dua domba laki tu tae’ sayuanna;
sia roti tang diragii sia pa’ranggina tang diragii tu dipasirau minnak sia pa’ranggina manipi’ tu disapu’ minnak; mintu’nato ta’pung gandung mani’sa’ la mugaraga.
Patamai misa’ baka, ammu pennoloanni tu apa lan baka iato sola anak sapi sia iatu da’dua domba laki.
Attu iato la musua tu Harun sola tu mai anakna muane mennolo lako tenda kasitammuan, ammu dio’i uai.
Mangkato la muala tu pakean iato, papakei Harun tu bayu lanna lu sia bayu salianna epo’ sia epo’ sia pesambo ara’; ammu porii pepori epo’;
sia tali-bate’i tu ulunna sia pale’ke’i tu makota maindan dao tali bate’na.
Ammu alai tu minna’ dipa’minnakan sia dipa’tokkoan, ammu bolloanni dao ulunna; la susimoko to umminna’i.
Mangkato suai tu mai anakna muane sae mennolo ammu papasangi tu bayu lanna lu.
La mupatambeke’i pepori aak tu aakna tau iato mai, iamotu Harun sia mintu’ tu anakna, sia passapui tu ulunna, naiatu katominaan dadi misa’ atoran matontongan dio kalena; la susimo kamutokkoanna to tu Harun sola mintu’ anakna.
Mangkato la mupesuan umpopennoloi tu sapi laki lako to’ tenda kasitammuan, anna remme’i Harun sia mintu’ anakna muane tu ulu sapi laki mangura.
Ammu rere’i tu sapi laki iato dio oloNa PUANG dio tingayo ba’ba tenda kasitammuan.
Mangkato alai tu rara sapi laki iato, muotonni rakka’mu, muraranni tanduk inan pemalaran na iatu mintu’ rara torronapa la mubolloan rokko to’ lette’ inan pemalaran.
Sia la muala tu mintu’ kampipi’na sia balaan atena, sia bale’ke’na da’dua sia mintu’ tu lompona dio, ammu tunu pu’pu’i dao inan pemalaran.
Apa iatu mintu’ duku’ sapi laki sia balulangna sia lanna tambuk barinni’na la mutunu pu’pu dio salian to’ tenda; iamoto tu suru’ pengkalossoran.
Mangkato alai tu domba laki misa’, anna remme’i Harun sia mintu’ anakna muane tu ulu domba laki iato.
Ammu rere’i tu domba laki iato sia alai tu rarana, pi’pikki tu inan pemalaran tiku lao.
Ammu ta’tak-ta’takki tu domba laki iato ammu basei tu tambuk barinni’na sia gariginna, ammu patoppo’i dao duku’ senga’na sia ulunna.
Iatu domba laki iato la mutunu pu’pu’ nasang dao inan pemalaran; iamo pemala’ ditunu pu’pu’ lako PUANG, la dadi bau busarungngu’; iamoto tu pemala’ pantunu, dipemalaran lako PUANG.
Mangkato la muala tu domba laki misa’nao, anna remme’i Harun sola tu mai anakna muane tu ulunna.
Ammu rere’ dukai tu domba laki iato, sia alai tu rarana, ammu palakoi baba’ talinga kananna Harun sia dio baba’ talinga kananna tu mai anakna, susi dukato tu indo’ rakka’na lima kananna sia indo’ rakka’ lentek kananna; sia iatu rara torropa la mupa’pi’pikan inan pemalaran tiku lao.
Ammu alai tu rara dao inan pemalaran sia iatu minna’ dipa’minnakan sia dipa’bolloan, pa’pi’pikanni Harun sia pakeanna sia ia duka tu mintu’ pakeanna anakna, anna maindan tu kalena sia pakeanna sia ia duka tu anakna sia pakeanna anakna.
Mangkato la muala tu lompo domba laki sia ikko’na sia pa’ranggina manipi’ misa’ sia iatu kampipi’na sia balaan atena sia bale’ke’na da’dua sia mintu’ tu lompona dio sia pesese kananna, belanna domba laki iamote tu dipopemala’ pa’tokko;
sia roti misa’, pa’ranggina tu dipasirau minna’ misa’, lan mai baka roti tangdiragii tu dio oloNa PUANG.
Padaoi limanna Harun sia dao limanna anakna muane, sia la musua ussorongi sia untarimai sule, dadi pemala’ disorong ditarima sule dio oloNa PUANG.
La mutarima dio mai limanna tau iato mai, ammu tunu pu’pu’i daona lu pemala’ ditunu pu’pu’ la dadi bau busarungngu’ dio oloNa PUANG; iamoto misa’ pemala’ pantunu dipemalaran lako PUANG.
Ala dukai tu dada domba laki dipopemala’ pa’tokko lako Harun; sorongi sia tarimai sule dadi pemala’ disorong ditarima sule dio oloNa PUANG; iamoto tu la mupotaa.
La mupasusimoto mupamaindan tu dada pemala’ disorong ditarima sule sia pesesena diala dipamarimbangan, tu mangka disorong ditarima sule sia dipamarimbangan, diala dio mai domba laki dipopemala’ pa’tokko, dipa’tokkoan Harun sola anakna.
Iamote tu la natuntun Harun sola mintu’ anakna, misa’ apa dipondok matontongan lako to Israel, belanna iamote tu misa’ pemala’ dipamarimbangan; mintu’ to la diala dio mai to Israel dio mai pemala’ kasalamaran; iamote tu pemala’ dipamarimbanganan PUANG.
Mintu’ tu pakean maserona Harun la napomana’ anakna undinna, kumua anna popakei, ke dibolloi minna’ busarungngu’ sia ke ditokkoi.
Minda-mindai tu anakna ussondai dadi to minaa, ianna tama tenda kasitammuan la menomba lan inan maindan, manassa pitung allo la napopake.
Sia la muala lu duku’ domba laki pa’tokko ammu tollo’i lan to’ inan maindan.
Duku’ domba laki iamoto tu la nakande Harun sola tu mai anakna dio to’ ba’ba tenda kasitammuan sola tu roti lan baka.
La nakande tau iato mai tu mangka umpadenanni pengkalossoran, kumua anna tau iato mai ditokko sia dipamarimbangan, apa iatu to senga’ tae’ nama’din la ungkandei to, belanna iamoto tu misa’ apa maindan.
Ianna den torro tu duku’ pa’tokko sia roti sae lako melambi’na, manassa la mutunu pu’pu’, tae’ nama’din dikande, belanna misa’ apa masero.
La mupogau’ lako Harun sia lako mintu’ anakna muane susitu mintu’ pepasanKu mati’; pitung allo la munii untokkoi tu tau iato mai.
Sia la urrere’ko sapi laki kiallo-kiallo la diposuru’ pengkalossoran, la usseroi kasalan, sia la mupamasero dio mai kasalan tu inan pemalaran, belanna mupadenan kadiseroian kasalan, sia la mubolloi minna’ busarungngu’ la mupamaindananni.
Pitung allo la munii umpadenanni pengkalossoran sia la mupamaindanan tu inan pemalaran iato, anna tarru’ maindan; minda-minda ungkaka’i tu inan pemalaran iato la maindan.
Inde sia tu la tontong mupemalaran dao inan pemalaran iato kiallo-kiallo, iamotu da’dua anak domba tu sangtaunmo dadinna.
Iatu misa’ la mupemalaran ke melambi’i na iatu misa’, la mupemalaran ke makaroenni,
sisola taa sangpulona ta’pung mani’sa’ dipasigerok minna’ dilambuk, taa a’pa’ hin sia misa’ pemala’ pantedok taa a’pa’ hin uai anggoro’ la dipasisola tu anak domba misa’na.
Iatu anak domba misa’nao la mupemalaran ke makaroenni; susitu kande dipemalaran ke melambi’ sola pemala’ pantedok, la susi dukamoto la mupemalaran, dadi bau busarungngu’; iamoto tu misa’ pemala’ pantunu dipemalaran lako PUANG.
Iamote tu la tontong dadi pemala’ ditunu pu’pu’ la misiosso’i dio ba’ba tenda kasitammuan dio oloNa PUANG; na inde to dio la Kunii sae ussitammuangko la ma’kada lako kalemu.
Indeto la Kunii sae sitammu to Israel, anna kamala’birangKu umpamaseroi tu tau iato mai.
Aku la umpamaindanni tu tenda kasitammuan sia iatu inan pemalaran sia Aku la umpamaseroi tu Harun sola tu mai anakna muane, kumua anna ia untoei tu katominaan lako Kaleku.
La unnisungNa’ lan lu tangngana to Israel sia Aku la dadi Kapenombanna.
La naissan tau iato mai kumua Akumo tu PUANG, Kapenombanna, tu mangka ussolanni tassu’ lan mai tondok Mesir, kumua angKu unnisung lan lu tangnga: Akumo tu PUANG, Kapenombanna.