Keluaran 35

Nasuami Musa sirampun tu mintu’ kasirampunan to Israel, anna ma’kada lako tau iato mai nakua: Iamote tu mintu’ kada Napepasanan PUANG, kumua naturu’i tau iato mai.

Sipatu lan annan allona la dinii mengkarang, apa iake allo ma’pempitu la mipoattu maindan, iamo misa’ allo katorroan sundun lako PUANG: minda-minda tu mengkarang allo iato, la dipatei.

Iake allo katorroan da mipadukku api lan mintu’ banuammi.

Sia nakuapa Musa lako to Israel: Iamote tu kada Napepasanan PUANG Nakua:

Dio mai tu apammi la miala pira ammi pa’durukanni lako PUANG; mintu’i tu tau la umbaai butung pamengan lako PUANG situru’ kamasorokan penaanna: Iamotu bulaan sia salaka sia tambaga,

sia parada lango-lango sia lango-lango makaseda sia karamisi sia lenang melo sia bulu bembe’,

sia kuli’ domba laki pa’damorro’ mararang sia kuli’ taka’ sia kayu simmin,

sia minna’ la ma’pamasiang sia bangki’ la dirauan minna’ la dipa’minnakan sia dipa’tokkoan sia la ditunu dipodupa;

sia ake’ ido sia parimata la dipa’matan epo’ sia pesambo ara’.

Mintu’ tu pande dio lu kalemi pada la sae unggaragai tu mintu’ apa Napepasanan PUANG:

Iamotu kema sola tendana sia pesambona sia pekadangna sia papanna sia pesa’pi’na sia lentongna sia lette’na;

sia iatu patti sola pebullena sia tutu’ pebase kasalan sia kulambu dipa’rerungan;

sia iatu meda sola tu pebullena sia mintu’ pareananna sia roti dipennoloan;

sia iatu tongkonan palita la ma’pamasiang sia la dipasakka’ tu mintu’ pareananna sia palitanna sia iatu minna’ la napadukku;

sia iatu inan pemalaran pantunuan dupa sola pebullena, sia minna’ la dipa’minnakan sia dipa’tokkoan sia dupa busarungngu’; sia kulambu la digaragan kulambu ba’ba kema,

sia iatu inan pemalaran dinii mantunu sola sala’bi’ tambagana sia pebullena sia mintu’ pareananna, sia iatu pembasean sola lentekna;

sia tenda dio lu tarampak sola lentongna sia lette’na sia kulambu ba’ba tarampak;

sia petana’ kema, petana’ tarampak sola ulangna;

sia pakean pangka’ la napake menomba lan inan maindan, iamotu pakean maindan la napake Harun to minaa sia mintu’ pakeanna anakna, la untoe katominaan.

Soro’mi tu mintu’ kasirampunan to Israel dio mai tingayona Musa.

Pada saemi tu mintu’ to tiakka’ penaanna sia masorok ba’tengna umbaa pa’duruk lako PUANG la dipake unggaragai tenda kasitammuan sia la dipake lan mintu’ kamenomban sia la digaraga pakean masero.

Pada saemi la muane la baine minda-minda masorok penaanna umbaa baba’ illong sia anting-anting sia sissin diparimatai sia manik ata sia ma’rupa-rupa pareanan bulaan. Iatu mintu’ muane tu umpennoloan bulaan dipopemala’ disorong ditarima sule lako PUANG,

sia mintu’ muane tu unnampui parada lango-lango sia lango-lango makaseda sia karamisi sia lenang melo sia bulu bembe’ sia kuli’ domba laki pa’damorro’ mararang sia kuli’ taka’ pada sae nabaa.

Minda-minda tu den salaka ba’tu tambaga la napopa’duruk, nasorong lako PUANG, sia minda-minda unnampui kayu simmin, tu la dipake lako pengkarangan kamenomban, nasae umbaai.

Mintu’ tu baine manarang ma’karidi’ kalena, nabaai tu pa’karidi’na: lango-lango sia lango-lango makaseda sia karamisi sia lenang melo,

sia mintu’ tu baine manarang sia tiakka’ penaanna, ungkaridi’ bulu bembe’.

Iatu mintu’ pangulu umbaamo parimata ake’ maido, sia parimata dipa’matan epo’ sia pesambo ara’,

sia pebangki’ sia minna’, iamotu minna’ la dipatama palita sia pebangki’ la digaragai minna’ dipa’minnakan sia dipa’tokkoan sia digaragai dupa.

Mintu’ muane sia baine tu tiakka’ penaanna la umbaai tu apa la dipopengkarangan tu Napa’pesuan PUANG nalopian Musa – mintu’ to Israel umpopa’langngo’ penaanna umbaai to la napopamengan lako PUANG.

Undinnato nakuami Musa lako mintu’ to Israel: Tonganna Natambai PUANG tu Bezaleel tu Nasa’bu’ sanganna, iamotu anakna Uri, anakna Hur, dio mai suku Yehuda,

sia Naponnoi penaanNa Puang Matua, iamotu kakinaan, pa’inaan sola kapaissanan lan mintu’ pengkarangan,

la untangnga’i tu pandiri sia unggaragai bulaan tu natampa sia salaka sia tambaga susitu pandiri iato;

sia ussura’ parimata sia umpale’ke’ parimata; sia ussura’ kayu sia unggaragai tu mintu’ napandirinna.

Sia Nakamasei Puang kamanarangan lan penaanna la mangada’ lako to senga’, la ia la Aholiab, anakna Ahisamakh dio mai suku Dan.

Naponnoimi kamanarangan sola duai tu ba’tengna la ungkarangi tu mintu’ pengkarangan pande sia pande paliu, sia to manarang ma’tannun paruki’ dio mai bannang lango-lango sia lango-lango makaseda sia karamisi sia lenang melo, sia to manarang ma’tannun: manarang ungkarang ma’rupa-rupa pengkarangan sia manarang unggaragai pandiri.