Keluaran 37

Nagaragaimi Bezaleel tu patti dio mai kayu simmin, duang siku ssangtangnga landona sia babana sangsiku ssangtangnga sia langka’na sangsiku ssangtangnga.

Nakallasa’ bulaan massang tongan tu lanna lu sia salianna sia nagaragan sa’pi’ bulaan tiku lao.

Sia napati’noran komba bulaan a’pa’, napale’ke’i lako a’pa’ lette’na, da’dua dio sangsesena na da’dua pole’o dio sangsesena.

Sia kayu simmin nagaraganni tu pebullena, anna kallasa’i bulaan.

Naulumi tu pebulle tama komba iato dio sa’dena patomali, anna ma’din dibulle tu patti iato.

Nagaragaimi tu tutu’ pebase kasalan dio mai bulaan massang tongan, duang siku ssangtangnga landona sia babana sangsiku ssangtangnga.

Nagaragaimi tu da’dua karubion bulaan, iamotu bulaan pa’kombong nagaragai, dao tampakna patomali tu tutu’ pebase kasalan,

misa’ karubion dao tampak sangsesena na misa’ pole’o dao tampak sangsesena. Iatu tutu’ pebase kasalan sola tu karubion dao tampakna patomali napasikande natampa.

Iatu karubion iato umballa’ patomali pani’na langngan, anna samboi pani’na tu tutu’ pebase kasalan sia sitingoan tu lindona; namentiro rokko tutu’ pebase kasalan.

Nagaragaimi tu meda kayu simmin, duang siku landona, babana sangsiku na langka’na sangsiku ssangtangnga.

Nasapu’i bulaan massang anna garaganni sa’pi’ bulaan tiku lao.

Nagaragai pesa’pi’ tiku lao sangpala’ lua’na, sia nasa’pi’ bulaan tiku lao tu pesa’pi’ iato.

Sia napati’noran komba bulaan a’pa’, napale’ke’i tu komba iato lako a’pa’ lentekna dio tu tetukna a’pa’.

Sikandappi’ pesa’pi’ iato tu naninna komba, tu diului pebulle tama la dibulleanni tu meda iato.

Iatu pebulle iato kayu simmin nagaraga, anna sapu’i bulaan, la dibulleanni tu meda iato.

Sia nagaraga tu mintu’ pareanan la dipadao meda iato, iamotu piringna sia pindanna sia balubunna sia sere’na tu dipa’bolloan; iatu apa iato bulaan massang nagaraga.

Nagaragammi tu tongkonan palita dio mai bulaan massang; iatu tongkonan palita bulaan pa’kombong nagaraga, susi dukato tu tongkonanna sia batangna; iatu bunga tiballa’na sia kalopakna sia bunganna napasikande natampa.

Annan tangkena sun dio sa’dena patomali: tallu tu tangkena tongkonan palita sun dio sa’dena sangbali na iatu tallu sun dio sa’de sangbalinna.

Iatu tallu bunga tiballa’ susi bunga badam rupanna dio sangtangke sola kalopakna sia bunganna sia tallu bunga tiballa’ susi bunga badam dio sangtangkenao sola pusona sia bunganna; susimoto tu annan tangke sun lan mai batang tongkonan palita iato.

Nadio batangna tongkonan palita den a’pa’ bunga tiballa’ susi bunga badam rupanna sola kalopakna sia bunganna.

Sia misa’pa kalopak diongna lu tangke tu sun patomali lan mai; iatu misa’ kalopak diongna lu tangke tangngana tu sun patomali lan mai na iatu misa’ pole’o kalopak diongna lu tangke sun patomali lan mai; susimoto tu annan tangkena sun lan mai batang tongkonan palita iato.

Mintu’ kalopakna sia mintu’ tangkena sun dio mai batangna; mintu’na dipasikande ditampa dio mai bulaan pa’kombong massang.

Nagaragammo pitu palita sia pesipi’na sia inan dinii umpa’dei dio mai bulaan massang.

Iatu tongkonan palita sola mintu’ pareanna sangtalenta bulaan massang digaragai.

Iatu inan pemalaran pantunuan dupa kayu simmin nagaragai; sangsiku tu lambe’na na sangsiku tu sangka’na, massulapa’ a’pa’, sia iatu langka’na duang siku; iatu tandukna sikande dio.

Nasapu’ bulaan massang, la papan daona lu, la rindingna tiku lao sia iatu mintu’ tandukna, sia nagaragai sa’pi’ bulaan tiku lao.

Nagaragammi komba bulaan diongna lu sa’pi’ siduanan dio sa’dena patomali, dinii unnulu pebulle, anna bullei tau.

Iatu pebulle kayu simmin nagaraga, anna kallasa’i bulaan.

Sia nagaragapa tu minna’ maindan la dipa’minnakan sia dipa’tokkoan sia dupa massang busarungngu’, susi panggaraga to pande ma’bangki’.