Keluaran 40
Ma’kadami tu PUANG lako Musa Nakua:
Iake allo bunga’na lan bulan tipamulanna la mupabendanmo to tu kema, iamotu tenda kasitammuan.
La mupatama tu patti kasa’bian, parerungi kulambu.
Sia iatu meda la mubaa tama sia pasirundunanni dao tu apa sipato’ mupalenna’, sia baa dukai tama tu tongkonan palita, ammu padaoi tu mintu’ palitanna.
Iatu inan pemalaran bulaan dinii untunu dupa la mupadio tingayo patti kasa’bian. Ammu toke’i tu kulambu ba’ba kema.
Iatu inan pemalaran pantunuan la mupadio tingayo ba’ba kema, iamotu tenda kasitammuan.
Iatu pembasean la mupadio alla’na tenda kasitammuan na inan pemalaran, ammu issii uai.
Undinnato la mupabendan tu tenda tarampak tiku lao, ammu toke’i tu kulambu dio ba’ba tarampak iato.
Mumane unnalai tu minna’ dipa’minnakan sia dipa’tokkoan, ammu minnakki tu kema sia mintu’ barang apa lan sia pamaindanni sola tu mai pareananna, anna maindan.
Sia la muminnakki tu inan pemalaran sia pantunuan sola tu mai pareananna, sia la mupamaindan tu inan pemalaran iato anna tarru’ maindan.
La muminnakki tu pembasean sola lette’na sia pamaindanni.
Mangkato musuai tu Harun sola tu mai anakna mentireke’ lako ba’ba tenda kasitammuan, ammu dio’i.
Ammu papakei pakean maindan tu Harun sia mubolloi minna’ busarungngu’, ammu pamarimbanganni, la ungkarangi tu toean to minaa lako Kaleku.
Sia suai tu anakna anna sae mentireke’, ammu papakei tu pakean lanna lu.
La mubolloi minna’ busarungngu’ tu tau iato susitu ambe’na mangkamo mubolloi, anna karangi tu toean to minaa lako Kaleku; la dadimo tu iannato, kumua iatu kadibolloianna minna’ la dadimo lako kalena tu katominaan tu tontong nasiosso’i.
Napogau’mi Musa tu mintu’na te; susitu Napepasanan PUANG, susimo napogau’ to.
Iatonna bulan tipamulanna, taun ma’penduan tonna allo bunga’na, napabendanmi tau tu kema iato.
Napabendanmi Musa tu kema, napadioi inanna tu lentekna, napale’ke’mi tu mintu’ papanna, sia napale’ke’ tu pesa’pi’na sia napabendan tu lentongna.
Naballa’mi tu kulambu daona lu kema anna samboi tenda kema daona lu, susitu Napepasanan PUANG lako Musa.
Naalami tu kasa’bian, napalanni patti, napalakoi pebulle tu patti iato, nasamboi tutu’ pebase kasalan tu patti iato.
Nabaami tama kema tu patti iato, anna toke’i tu kulambu dipa’rerungan, narerungi tu patti kasa’bian, susitu Napepasanan PUANG lako Musa.
Iatu meda napatama tenda kasitammuan, napadio rampe daanna lu kema, naboko’ kulambu.
Napalenna’mi tu roti dao, napasirundunan melo dio oloNa PUANG, susitu Napepasanan PUANG lako Musa.
Iatu tongkonan palita napatama tenda kasitammuan napasitingoanni meda, rampe sau’na kema.
Napadao nasangi tu palita iato dio oloNa PUANG, susitu Napepasanan PUANG lako Musa.
Iatu inan pemalaran bulaan napatama tenda kasitammuan napadioi tingayo kulambu.
Natunumi tu dupa dao, susitu Napepasanan PUANG lako Musa.
Natoke’mi tu kulambu ba’ba kema.
Iatu inan pemalaran pantunuan napadio sikandappi’ ba’ba kema, iamotu tenda kasitammuan, anna pennoloanni tu pemala’ ditunu pu’pu dao sia kande dipemalaran, susitu Napepasanan PUANG lako Musa.
Iatu pembasean napadio alla’na tenda kasitammuan na inan pemalaran, anna issii uai la dipembase.
Iatu uai lan nabasean limanna sia lentekna Musa sola Harun sia iatu mai anakna muane.
Iake tamami tenda kasitammuan sia iake urreke’i tu inan pemalaran, nabasei tu kalena susitu Napepasanan PUANG lako Musa.
Napabendanmi tu tenda tarampak untikui kema iato sia napabendan duka tu inan pemalaran, anna toke’i tu kulambu dio ba’ba tarampak. Susimoto tu Musa umpalanda’i tu pengkarangan iato.
Nasamboimi gaun tu tenda kasitammuan na iatu kamala’biranNa PUANG parrang ussitutu’i tu kema iato,
naurungan iatu Musa tang nakulle tama tenda kasitammuan, belanna naniimo gaun sia nasitutu’imo kamala’biranNa PUANG tu kema iato.
Iake sulemi langngan tu gaun diong mai kema iato, ke’de’omi tu to Israel dio lu kalingkanna.
Apa iake tae’pi nasule langngan tu gaun, tae’ duka nake’de’ dio mai tu tau iato mai sae lako sulena pole’ langngan tu gaun.
Belanna iatu gaunNa PUANG ussamboi kema, ke allona, sia nanii api ke bonginna dio pentirona mintu’ to Israel lan mintu’ kalingkanna.