Maleakhi 1

Inde sia misa’ kada Napa’petanggungan Puang Matua, iamotu kadanNa PUANG lako Israel nalopian Maleakhi.

Kukaboro’ikomi, kadanNa PUANG. Apa ma’kadakomi mikua: Umbara Mikua umpapayanni tu pa’kaboro’Mi? Tae’raka nasiulu’na Yakub tu Esau? kadanNa PUANG. Moi nasusito, Kukaboro’i tu Yakub,

apa iatu Esau Kukabiri’ sia iatu buntunna Kupopendadi lo’bangmo sia iatu taa mana’na Kusa’biangan lako serigala dio padang pangallaran.

Iake ma’kadai tu Edom nakua: Mangkamokanni disanggangi, apa la kibangun sule tu inan daun lauan – manassa inde sia tu kadanNa PUANGna mintu’ ma’dandan maritik, Nakua: Moi nabangunni tu kotana, apa inang la Kusanggang; la nasangai tau tu tau iato mai: lili’ katangmekaalukan, sia: bangsa narua kasengkeanNa PUANG tontong sae lakona.

Iake natiroi matammi tu iannato, la ma’kadakomi mikua: Pasareongan tu PUANG, moi nadio duka lu salianna lili’na Israel.

Iatu pia muane ungkasiri’ ambe’na, sia misa’ kaunan ungkasiri’ puangna. Iate Aku te, ke misa’Na’ Ambe’, umbanii tu pa’pakaraya lako Kaleku? Sia iate Aku te ke misa’Na’ Puang, umbanii tu kamatakuran lako Kaleku? kadanNa PUANGna mintu’ ma’dandan maritik lako kalemi, e mintu’ to minaa, tu umpamatuna sangangKu. Moi susito, ma’kadakomi mikua: Apara kipotete umpamatuna sangamMi?

Umbaakomi pemala’ kadake langngan inan pemalarangKu. Ammi ma’kada kumua: Apara kipotete ma’gau’ tang melo lako Kalemi? Belanna mikua: Iatu medaNa PUANG apa dipamatuna.

Na iake umbaakomi misa’ patuoan buta dipopemala’, tae’raka nakadake to? Iake umbaakomi misa’ patuoan gento, ba’tu masaki, tae’raka nakadake to? Iake mipennoloanni lako to maraammi tu apa susito, la nakalo’ siarokomika penaanna, ba’tu matanaraka untirokomi? kadanNa PUANGna mintu’ ma’dandan maritik.

Iamoto, pamalinomi tu penaaNa Puang Matua, anNa katuru-turuiki’! Denmo tu gau’mi susito. Umbanii apa Na la matana untirokomi moi misa’ duka! kadanNa PUANGna mintu’ ma’dandan maritik.

Melo ke den misa’ tau dio kalemi, tu untutu’ ba’ba, kumua da mipadukku punala bang api dao inan pemalarangKu! Tae’ nakalo’komi penaangKu, kadanNa PUANGna mintu’ ma’dandan maritik, sia tae’ Kuporai tu pemala’ natangke limammi.

Belanna dio mai tu inan nanii berre’ mata allo sae lako naninna lambun, pasareongan tu sangangKu dio lu mintu’ bangsa, sia dio mintu’ inan dinii umpennoloan dupa sia pemala’ masero tu sangangKu, belanna pasareongan sangangKu dio lu mintu’ bangsa, kadanNa PUANGna mintu’ ma’dandan maritik.

Apa mipamatuna tu sangangKu, belanna mikua: Iatu medaNa PUANG apa tang melo, sia iatu apa dao, iamotu kande, iamo dipamatuna to.

Sia ma’kadakomi mikua: Tiromi, lendu’ ia tu sara’! Mipessa’da-sa’dai, kadanNa PUANGna mintu’ ma’dandan maritik; mipennoloan tu apa dirampa, apa sondo’, sia apa masaki. Iammi pennoloanni tu pemala’ susito, la nakalo’raka penaangKu untarimai diong mai limammi? kadanNa PUANG.

Tampak ropu duka lako tu to ma’pakena, ke denni misa’ patuoan laki lan tuntunanna, tu mangka nadandi lan pangallonanna, apa napennoloan tu misa’ patuoan tu den tattanna lako PUANG! Belanna Aku te, Datu pasareongan, kadanNa PUANGna mintu’ ma’dandan maritik, sia metakuran tu sangangKu dio lu mintu’ bangsa.