SURA’ BUNGA’NA: (PA’PUDIAN 1–41); Dalle’na to malambu’ sia to tang mekaaluk1
Maupa’ tu to tang untamai bisaranna to tang mekaaluk, sia tang unnola lalanna to kadake gau’, sia tang tongkon lan kombonganna to pabe’se,
2
sangadinna iatu kasendeanna lan manna Sukaran alukNa PUANG, sia unnannung Sukaran alukNa keallo kebongi.
3
Belanna sangtinti ia kayu, ditanan dio to’ randan lalan uai, tu membua ke nalambi’mi attunna, sia tang malayu tu daunna, sia mintu’ tu mai napogau’na, umpabu’tuanni kameloan.
4
Iatu to tang mekaaluk tang ten ia a’ganna to, sangadinna sangtinti ta’pian nasarombonan angin.
5
Iamo bannangna to anna tang untananni to tang mekaaluk umpennoloi kombong kalua’, sia iatu to kadake gau’ tang natanan duka umpennoloi tinimbu malambe’na to malambu’.
6
Belanna Natandai PUANG tu lalanna to malambu’, apa iatu lalanna to tang mekaaluk ma’palulako kasanggangan.