Mazmur 103

Pa’pudi-pudian lako Puang Matua tu sumpu mamase sia sa’pala buda 1

Pa’pudianna Daud. Pudimi tu PUANG, e sumanga’ku, sia sanga maseroNa, e mintu’na lan tondon to batangku;

2

Pudimi tu PUANG, e sumanga’ku, sia da naden misa’ mukalupai tu pa’kamaseNa.

3

Tu umpa’dei mintu’ salamu, sia umpamondo mintu’ sakimmu.

4

Tu ullendokan sunga’mu diong mai lamunan, sia ummakotaiko kamasokanan sia kamamasean,

5

Tu umpaguntu’i kameloan tu deatammu, muurunganni mellomo butung to langkan maega.

6

Iatu PUANG umpalolang kamaloloan Sia ussanda tonganni to dipandasa.

7

Mangka dukamo Napokada lako Musa tu mintu’ lalanNa, sia mintu’ penggauranNa Napokada lako to Israel.

8

Iatu PUANG sumpu mamase sia sa’pala buda, kalando pesuka’ sia kapua kamasokananNa.

9

Tae’ anNa tontong bang unggagaiki’, sia tae’ Nala tontong bang sengke.

10

Tae’ anNa gau’ki’ sitinaya tu mai kasalanta, sia tae’ anNa pakkanniki’ sitinaya tu mai gau’ kadaketa.

11

Belanna susi sikalangka’na langi’ anna lino, susi dukamoto tu kapuana kamasokananNa lako mintu’ to ungkataku’I

12

Pada sikambelanna matallo anna matampu’, pada duka mambelanna to Nanii Puang umpatoyangi dio mai kaleta tu salata.

13

Susi misa’ ambe’ unnala mase anakna, susi dukamoto tu PUANG unnala mase mintu’ to ungkataku’I.

14

Belanna Naissan tu garaganta, sia Nakilalai kumua kita te losso’ bangri.

15

Iatu tolino susi bang riu katuoanna, sia susi bunga-bunga dio lu padang, susi dukamo ia menta’bi to.

16

Ianna iri’i angin, pa’demi, naurunganni tae’mo anna peamu’i inanna.

17

Apa iatu kamasokananNa PUANG tempon dio mai landa’ lako attu situran, lako mintu’ to ungkataku’I, sia iatu kamaloloanNa untaranak lanto mimi’na.

18

Iamotu lako mintu’ to ungkaritutui basseNa Puang, sia to ungkanannangi tu parentaNa anna turu’i.

19

Napatunannangmo PUANG tu isungan kapayunganNa lan suruga, sia iatu kadatuanNa umparenta mintu’ angge maritik.

20

Pudimi tu PUANG, e mintu’ malaeka’Na, e mintu’ to lalong, tu umpogau’ kadanNa. Sia umperangii kadanNa!

21

Pudimi tu PUANG, e mintu’ pa’baraninNa, e mintu’ lentek maringanNa tu umpogau’ pa’poraianNa!

22

Pudimi tu PUANG, e mintu’ panampaNa, Dio lu mintu’ lili’ parentaNa. Pudimi tu PUANG, e sumanga’Ku!