Mazmur 109
Lu lakona pangala sengo. Pa’pudianna Daud. O Puang Matua, tu kupobannang ma’pudi-pudi, da Mibituk bang.
Belanna iatu sadangna to tang mekaaluk sia lando pa’du napengangaimo’; sia nalangdona’ tongka’ lila mo’rangna.
Nalimbuina’ napokadan kada mapalla, sia tae’ silalanna nanii urrariina’.
Napapakkanni kasiualian tau iato mai tu mamaseku, apa tontong bangna’ massambayang.
Napapassannina’ kakadakean napapakkanan, kameloangku, sia kamabirisan napapakkanan mamaseku.
Patulangdanni tu misa’ to tang mekaaluk la umbisarai, sia da’ito anna ke’de’ dio kananna tu misa’ to ma’parapa’.
Ianna dibisara, nake dipasalai, sia nake naposalai tu passambayangna.
Nake madenge’i tu sunga’na, sia nake napasayu’i tau tu toena.
Nake biungi tu mai bati’na, sia balui tu mai bainena.
Nake salamba salaoi sia kapala’-pala’ tu mai bati’na, sia diula’i dio mai to’ banua daun lauan.
Nake nasisikki to ma’peindan tu mintu’ apanna, sia da’ito narampai to salian lembang tu apa nakara’ta’i.
Da naden misa’ tau nenne’ bang ungkamasei, sia da naden misa’ tau masseng lako pia biungna.
Sangapaoi anna diroto’i tu tarukna; anna iatu sanganna dipa’dei dio papa’ sidampi’na.
Sangapaoi anna bantang lan karangan inaanNa PUANG tu kakadakeanna to dolona, sia da nadipai’pinni batu mapipang tu kasalanna indo’na.
Sangapaoi anna tontong dio pentiroNa PUANG tu mintu’nato, anna dipa’dei lan mai lino tu kadikilalaianna tau iato mai.
Tu belanna tae’ anna kilalai la umpa’pekitanan kamamasean, sangadinna unnula’ sumpu to mandasa sia to mase-mase sia to bonnong penaanna, samatena.
Nakabarii tu tampak ropu – da’ito narua pissanni; sia tae’ anna kabarii karongkosan – da’ito nasitoyangan pissan.
Napotamangkalemo tu tampak ropu butung bayu sielle’na – da’ito natama batang kalena tu tampak ropu susito uai, sia tama mintu’ buku lampana ten to minna’!
Dai’to tu tampak ropu anna butung tamangkale napengkalemu’, sia butung tambeke’ tu tontong bang napotambeke’.
Sangapaoi anna mintu’na te Napa’papakkanan PUANG lako mintu’na balingku, sia lako mintu’ to ullangdona’.
Apa iatu Kamu, o PUANG Puangku, alanna’ sara’ tete dio sangamMi sia rampananna’ belanna tang tore tu kamasokanamMi.
Belanna iatu aku te mandasa sia mase-mase, sia bangke tu penaangku lan ba’tengku.
Potonna’ butung bayo-bayo ma’erru’ ke la botoi tu allo, sia tipentia’ lenna’ butung batik.
Paruninin tu guntu’ku, belanna tang umpoinaana’ kande sia iatu batang kaleku madokopa sia marangke.
Sia nabe’semo’ tau iato mai, iake natirona’ unniling-ilingmi.
Tunduina’, o PUANG, Kapenombangku, sia lendokanna’ sitinaya kamasokanamMi.
Anna issanni tau iato mai kumua lalan limamMi te, sia Kamumo, o PUANG, tu mangka umpogau’i.
Moi anna ma’tampakki ropu tu tau iato mai, apa iatu Kamu ma’passakke, moi anna untendeng kalena-inang la kasirisan, apa melo ke sende paimanni te aku taumMi.
Sangapaoi anna umpotamangkale kamatunan tu mai balingku, sia sangapaoi anna pengkalemu’ siri’na butung parramba’.
La umpekapuaina’ gamarangku umpudi PUANG, sia la kupudi nanian lan to’ to buda.
Belanna la bendan dio to’ kananna to mase-mase, la ullendokanni dio mai tu to umpasalai.