Mazmur 118

Pa’kurre sumanga’ lako Puang Matua, belanna Nalendokammo tu taunNa 1

Pudimi tu PUANG, belanna masokan Ia. Sia iatu kamasokananNa tang tileluk sae lakona.

2

Melo ke nasa’bu’i to Israel kumua: Iatu kamasokananNa tang tileluk sae lakona.

3

Melo ke nasa’bu’i bati’na Harun kumua: Iatu kamasokananNa tang tileluk sae lakona.

4

Melo ke nasa’bu’i mintu’ to ungkataku’ PUANG kumua: Iatu kamasokananNa tang tileluk sae lakona.

5

Iatongku illan kamaparrisan, meongli’mo’ langngan PUANG, anNa tanannina’ talinga sia Napamalosangmo’.

6

PUANG urrondongna’, anna tae’ kula mataku’, la napatumbara’ tolino?

7

Mintu’i tu to patunduangku, PUANGmo tu urrondongna’. Iamoto angku parannu untiroi tu kamandasanna mintu’ ualingku.

8

Mandu maelo ia, ke PUANG dipentionganNi, na iatu umposande’ tolino.

9

Mandu maelo ia, ke PUANG dipentionganNi, na iatu umposande’ to la’bi’.

10

Moi anna patama limbumo’ mintu’ bangsa, apa tete dio sanganNa PUANG angku pisanni nasangi.

11

Moi anna patama limbumo’ tau iato mai sia sae ussikapu’ina’, apa tete dio sanganNa PUANG angku pisanni.

12

Nasikarupuimo’ tau iato mai, susito enoan, apa pa’de poton susi api dio ranga’-ranga’; tete dio sanganNa PUANG angku pisanni.

13

Musumbanammo’ kumua angku tobang, apa Natunduimo’ PUANG.

14

PUANGmo tu oto’na kamatotorangku sia pa’pudiangku, sia Iamo Nanii bu’tu kamakarimmanangku.

15

Iatu arrak sia la’tek belanna kamakarimmanan marua’ lan tendana to malambu’ nakua: Iatu lima kananNa PUANG ungkarang gau’ masang,

16

ondongpi iatu lima kananNa PUANG mepamatande, sia ungkarang gau’ masang.

17

Tae’ angku la mate, sangadinna la tuona’, sia la umpa’peissananna’ penggauranNa PUANG.

18

Napa’dikki tonganna’ PUANG, apa tae’ anNa eloranna’ lako kamatean.

19

Bungkaranna’ tu mai ba’ba kamaloloan, la kuolai tama, la umpudi PUANG.

20

Iamote tu ba’baNa PUANG, mintu’ to malambu’ la unnolai tama.

21

KupudiKomi belanna Mitanannimo’ talinga, sia Kamumo oto’na kamakarimmanangku.

22

Iatu batu natibemo pande, Iamo mendadi batu petau.

23

Iatu iannato, PUANG umpogau’i, sia memangngan untiroi.

24

Indemo tu allo Napaden PUANG: Melo ke sila’tekangki’ sia tapoparannui!

25

O PUANG, benkan dikka’ kasalamaran, o PUANG, benkan dikka’ karongkosan.

26

Maupa’ tu to sae umpotete sanganNa PUANG! La kipassakkekomi lan mai banuanNa PUANG.

27

Iatu PUANG Iamo Puang Matua, sia Iamo umpatiroiki’ masiang. Ulangi tu pemala’ tu la ditunu lan pa’gauran sae lako to’ tanduk inan pemalaran.

28

Kamumo tu Kapenombangku, la kupudiKomi, o Kapenombangku, la kupakasalleKomi.

29

Pudimi tu PUANG, belanna masokan Ia, sia iatu kamasokananNa tang tileluk sae lakona.

alkitab.me