Sia inang tang kueloran rapa’ tu matangku, ba’tu umpara’ban bulu matangku,
5
Ke tae’i inan kuappa’ la Nanii PUANG, tu banua la Nanii torro Puangna Yakub, Puang Umpoissan angge maritik.
6
Tarangimo tu karebanna dio Efrata, sia taappa’mo dio padang Yaar.
7
Melo ke tamaki’ tendaNa, sia melo ke tukkuki’ menomba diong to’ pelleseanNa!
8
Ke’de’Komi, o PUANG, amMi male lako inan katorroamMi, la Kamu, la iatu patti kuasamMi.
9
Sangapaoi anna umpembungku’ kamaloloan tu mintu’ to minaamMi, sia sangapaoi anna sila’tekan tu mintu’ to masallo’Mi.
10
Tu bannang dio Daud, taumMi, da Mitananni boko’ tu to ditokkoMi.
11
Mangkamo tu PUANG umpalao sumpa kapua lako Daud, sia tae’mo anNa la ullesangi lampa kadanNa misa’i tu to sun dilassakmu la Kupaunno’ko’ dao isungan kapayungammu.
12
Iake nakaritutui bati’mu tu basseKu sia iatu kasabi’angKu tu Kupatuduanni, manassa iatu mai bati’na la unnissungi kapayungammu tontong sae lakona.
13
Belanna Napilei langsa’mo PUANG tu Sion, sia Naturo ta’bamo la Nanii torro.
14
Iamote tu inan matontongangKu sae lakona, sia indemote tu la Kunii reso’, belanna mangkamo Kuturo ta’ba.
15
La Kupamasakke kamemba’karan tu bura padangna, sia iatu to mase-masena la Kupabo’sai kande.
16
Sia iatu mai to minaanna la Kubungku’ kasalamaran, anna mintu’ to sallo’na la parannu paiman unnarrak.
17
Diomo la Kunii umpatuoanni misa’ tanduk tu Daud, sia Kuparandanammo palita tu to Kutokko.
18
Iatu ualinna la Kubungku’ siri’, apa iatu ia, la pandillak dao ulunna tu makotana.