Mazmur 139

Mintu’ inan Nanii tongkon Puang Matua, sia untandai angge maritik 1

Lu lakona pangala sengo. Pa’pudianna Daud. O PUANG, Mitarru’mo’ sia Mitandaimo’.

2

Mitandai tu diona torro ke’de’ku; sia mambelapa Mitandaimi tu lalan tangnga’ku.

3

Mipelalan duka tu kalingkangku ba’tu kamatindoangku, sia mitandai tu mintu’ tengkaku.

4

Belanna tae’ misa’ tu tongka’ dililaku, tu tang Miissan, o PUANG,

5

Mitandimo tu tingayo boko’ku, sia Miremme’na’ limamMi.

6

Iatu kapaissanan iato lendu’ namangngaingku, sia lendu’ mandalanna, tang kulambi’.

7

Umbara la kuola untoyangan PenaamMi? Ba’tu umbara la kuola umpallaian oloMi?

8

Iake la lu langnganna’ langi’, na daoKomi; iake la umbambanganna’ kaleku lan lino to mate-anna lanKomi.

9

Iake la unnangkaranna’ pani’ passisinna randan langi’, angku torro dio tampak tasik,

10

inde dukato la nanii urrendenna’ limamMi. Sia natoena’ lima kananMi.

11

Iake kukuai kumua: Melo ke nasamboina’ malillin, anna bongi membali masiang untikuina’;

12

iatu malillin tae’ anna kullei urrerung apa dio mai Kalemi, sangadinna iatu bongi masero susi masiang, iatu malillin na masiang pada bang sia.

13

Belanna Kamu ungkombong nasangi tu lanna tondon to batangku, sia umpasanda rangka’na’ lan pa’tambukanna indo’ku.

14

KupudiKomi, belanna memangngan tongan tu kakombongangku; sia memangngan tu mintu’ penggauramMi. Nakanassai tongan penaangku tu diona to.

15

Iatu mai bukungku tae’ karerungan dio mai Kalemi, tongku digaraga buni, sia tongku dikombong lan atena padang.

16

Nata’pai dukamo matamMi tu a’gangku tongku mane kombong rara; sia tisura’mo lan luntara’Mi, tu mintu’ allo la dipaka’pananna’, tonna tae’ bangpa ma’rupa.

17

O Puang Matua, lendu’ ia kapuana gai’na lako kaleku tu mai lalan tangnga’Mi. Sia tang dikemba’ dibilang.

18

Iake la kubilangi mandu buda ia anna karangan; sia iake millikna’, tontong bangpoKomi kupalan penaa.

19

O Puang Matua, sabu’i tu mintu’ to tang mekaaluk – sia kamu, e to umpato’do rara, mallaikomi dio mai kalekus-

20

Tu pakelo sangka’ unneaKomi. Tu umpa’pakenan sangamMi, iamo ualimMi.

21

O PUANG, tang kukabiri’raka tu mintu’ to ungkabiri’Komi? Sia tang kukasorroraka tu mintu’ to umbaliKomi?

22

Lendu’ kukabiri’na liu tu tau iato mai, sia kupasangtinti uali.

23

Pelalan kummanna’, o Puang Matua, sia tandai tonganni tu penaangku, sudina’, sia tandai tu ba’tengku lan;

24

manta-mantana’, ba’tu tang denri lalan kadake bu’tu dio kaleku, amMi rendenna’ lako lalan matontongan!

alkitab.me