Mazmur 35
Pa’pudianna Daud. O PUANG, ualii tu to unnualina’, sia rarii tu to urrariina’.
ToeKomi balulang sia pakolong, ke’de’Komi untunduina’.
Tetangi tu doke sia la’bo’ amMi ampangi tu lalanna to unnula’na’. Kuanni te deatangku: Akumo pakarimmanammu!
Melo ke kasirisanni sia lele bekoi tu to undaka’ lalan la ungka’tu sunga’ku, sia la sorong boko’ sia natoding siri’ tu mintu’ to undakaranna’ kakadakean.
Da’ito anna susi nasang ta’pian napentiaran angin, anNa lolai Malaeka’Na PUANG.
Da’ito anna malillin sia malangngo’ tu lalanna tau iate mai, anNa ula’i Malaeka’Na PUANG.
Belanna tae’ bannangna anna tananni bunina’ poyana, sia tae’ bannangna anna garaganni patuang lambe’ tu deatangku.
Da’ito narampoi kasanggangan tang nakanandai, sia ia kalena naala poya natanan buni, da’ito anna tobang tama kasanggangan.
Iatu deatangku mela’tek dio PUANG, sia la sende paiman diona kadilendokan lu dio mai Kalena.
Mintu’ kaleku sae tama bukungku la ma’kada kumua: O PUANG, mindara tu sitinti batumMi, urrampanan to mandasa dio mai to ussau’i, ondongpi to mandasa sia to bongko dio mai to umpangrampai?
Bendanmo ba’tu pira-pira sa’bi bulituk, untanda’na’ diona apa tang kutamai.
Napapakkanni kakadakean tu gau’ meloku; sia sisayuranna’ anak, kuurunganni makarorrong.
Apa iatu aku tonna masaki tau iato mai, ma’pakean karoro’na’, umpandasana’ kaleku ma’puasa, sia tu’tun tama ara’ku tu ulungku massambayang.
Iatu gau’ku lako susi lako sangmaneku ba’tu siulu’ku; tukkuna’ ma’pote dibolong, butung to untingayo pandana mendadianna.
Apa iatongku tilende’, parannumi ma’balole’-lole’ tu tau iato mai; to passiboboran tu tae’ kutandai umbalole’na’; tau iato mai tang tore ungkada-kadaina’.
Susi to tang mekaaluk patelle-telle sia umbarakki kande mammi’, ussangiranna’ isi.
O PUANG, sangapapoKomi la untiro-tiro bangi? Lendokammi tu deatangku dio mai kasangganganna, sia rampananni tu sunga’ tungga’ku dio mai mintu’ anak singa.
La kupudiKomi lan kombong kalua’, sia la kupakala’bi’Komi lan tinimbu malambe’.
Da anna parannu tu to tae’ bannangna nanii unnualina’, sia da maro’ Mieloranni tu to ungkabiri’ punala bangna’ untelle-tellena’ pa’kidi’ matanna.
Belanna tangia kamarampasan napokada tau iato mai, sangadinna untangnga’ apa tang tongan, lako mintu’ to rapa’ lan tana iate.
Nabakkak tongan tu sadangna umpengangaina’, anna ma’kada, kumua: Ha, ha, natiromo matangki.
Mitiromo to, o PUANG, da Mima’pakappa bang; o Puang, da Mitoyanganna’.
Ke’de’Komi sia ingaranni ussanda tongannina’, diona kara-karaku, o Kapenombangku sia Puangku.
O PUANG, o Kapenombangku, paolaina’ salu sitinaya kamaloloamMi. Da anna poparannui tau iato mai tu diona a’gangku.
Da anna ma’kada lan penaanna, kumua: Ha! susimo pa’poraiangki to! Sia da anna ma’kada kumua: Kiampello’mo!
Da’ito anna kasirisan sia maila’ tu mintu’ to umposende kamandasangku, da’ito naputu’i siri’ sia kaburerean, tu to umpamatampo kalena lako kaleku.
Melo ke mela’tekki sia sende paimanni tu mintu’ to umporai tu kaunnolaiangku salu; sia la tontong napokada kumua: Kapua paanNa tu PUANG. Tu umporai taunNa ke unnappa’i kasalamaran.
La nasa’bu’ tongka’ dililaku tu kamaloloamMi, sia kadipudiamMi kiallo-kiallo.