Mazmur 71
O PUANG, Mati’ kunii mentirerung; da maro’ angku kasirisan!
Rampananna’ sia lendokanna’ tete dio kamaloloamMi; tanannina’ talinga, sia rinding pala’na’.
Sangapaoi anna Kamu kupobuntu batu pentirerungan, angku tang ka’tu male lako; tu mangkamo Midullu la kupoinan makarimman, belanna Kamumo buntu batungku sia tambakukungku,
o Puang Matua, rampananna’ dio mai limanna to tang mekaaluk, dio mai lisu pala’na to patua’ ba’tang sia to kelok.
Belanna Kamuri kapa’rannuanangku, Puangku PUANG. Tu kuposande’ tempon bitti’ku.
Mati’ri Kalemi kunii sande’ tempon ditibussanangku, sia Kamuri tu umpatibongso’na’ lan mai pa’tambukanna indo’ku; mati’ri Kalemi nanii tontong kapa’pudi-pudiangku.
Iatu aku butung misa’ a’gan napomangngamo buda tau, apa Kamumo pentirerungan matoto’ku.
Iatu sadangku buke kapa’pudian lan lako Kalemi, sia untendeng kamala’biramMi kiallo-kiallo.
Da Mitibena’, ke matuamo’, sia da Mitampena’, ke moro’mi tu bukungku.
Belanna mintu’ ualingku ussipakulu-kuluina’, sia iatu to undaka’ sunga’ku sama turu’ undaka’ lalan.
Nakua: Natampemo Puang Matua, ulai’i sia tingkanni, belanna tae’mo misa’ To patunduanna.
O Puang Matua, da dikka’ amMi toyanganna’; o Kapenombangku, madomi’Komi untunduina’.
Da’ito anna kasirisan sia sanggang tu to undaka’ sunga’ku; sia da’ito nakabu’i siri’ sia pebe’se tu mintu’ to undakaranna’ kakadakean.
Apa la tontongna’ marannu, sia la kupasakendek-kendeknapa tu kadipudi-pudianMi;
La nasa’bu’ tongka’ dililaku tu kamaloloamMi, sia kasalamaran lu dio mai Kalemi kiallo-kiallo, belanna tang kukemba’ kuia’ tu bilanganna.
La kupakalelean tu penggauran toto’Na Puangku PUANG, sia la kupa’peissanan tu kamaloloamMi, inang ia manna tu kamaloloamMi.
O Puang Matua, Miada’imo’ tempon dio mai bitti’ku, nasae lako totemo kupa’peissanan tu mintu’ penggauran kalle-kalleamMi.
Iamoto da Mitampena’ sae lako matua indukku, sia ma’lullung bura-buraku, o Kapenomban, angku pa’peissananni tu kamawatangamMi lako to dadi totemo. Sia kuasamMi lako mintu’ osso’na to dadi undi.
Iatu kamaloloamMi sumpu langngan langi’, o Puang Matua, tu mangkamo umpogau’ ba’tu pira-pira penggauran kapua; o Puang Matua, mindaora ussitintibatuangKomi?
Kamumo tu mangka umpatiroina’ buda kamandasan sia kamaparrisan, Kamu duka sia la umpatuona’, sia la unnendekanna’ sule diong mai mangapi’na tana.
Kamumo la untompoi kataromposangku, sia umpakatanana’ sule.
Aku duka te la kupudiKomi dandi, tu kamarurusamMi, o Kapenombangku; sia la kupakendekangKomi pa’pudian dipasiala katapi, o Puang maindanna Israel.
La mela’tek tu lilaku, ke kupakendekangKomi pa’pudian, ten duka deatangku to tu mangka Milendokan.
Sia la ussa’bu’ kamaloloamMi, tu dara’ lengko lilaku kiallo-kiallo, belanna mintu’ tu to undakaranna’ kadake kasirisan nasangmo sia malotong lindona.