Mazmur 75

Lu lakona pangala sengo. (Unturu’ baenan sengo:) Dandi’ bala’-bala’i. Misa’ sengo. Pa’pudianna Asaf. (75-2) KipudiKomi, o Puang Matua, inang kipudiKomi, belanna mandappi’ sia tu sangamMi, sia mintu’na penggauran kalle-kalleamMi naulelean tau.

(75-3) Iake Kulambi’mi tu allu’na, tae’ nasalai tang Kupaolai maloloi salunna:

(75-4) Moi anna tigega’ tu lino sola issinna, apa Akumo tu umpabantangi tu mai parandanganna! Sela

(75-5) MangkaMo’ ma’kada lako to matampo kumua: Da mimatampo. Sia lako to tang mekaaluk kumua: Da miumpatarangga tandukmi!

(75-6) Sia da mipalayang tandukmi, sia da mitumonga-monga ma’kada.

(75-7) Belanna tang lu dio mai matallo, tang lu dio mai matampu’, ba’tu lu lo’ mai padang aak nanii bu’tu kama’pakalayukan.

(75-8) Sangadinna Puang Matuari tu ma’paolai salu, Iamo la umpasosso’ lu rokkoi tu misa’, anna pakendek lu langnganni tu misa’.

(75-9) Belanna lan limanNa PUANG den tu irusan nanii uai anggoro’ re’de-re’de, tu ponno anggoro’ dibuli; sia Ia untua’i lan mai, apa mintu’ tu to tang mekaaluk lan lino ummimmi’i tu garoppa’na anna iru’i.

(75-10) Apa iate aku la tontong bang kupa’peissanan tu iannato, sia umpakendekan pa’pudian Kapenombanna Yakub.

(75-11) Mintu’ tandukna to tang mekaaluk la Natepokki, apa mintu’ tandukna to malambu’ la dipatarangga.