Mazmur 86

Passambayang umpalaku pa’tunduan 1

Passambayangna Daud. O PUANG, palempeKomi talingamMi, perangiina’, belanna aku te mandasana’ sia mase-mase:

2

Rinding pala’i tu deatangku, belanna aku te to mengkaola; o Kamu, Kapenombangku, lendokanni tu taumMi tu umposande’Komi.

3

Katuru-turuina’, o Puang, belanna mati’ Kalemi kunii mengkamoya kiallo-kiallo.

4

Pasendei tu penaanna taumMi, belanna iatu penaangku kupalumati’ Kalemi, o Puang.

5

Belanna Kamu to masokan, o Puang, sia malangngo’ penaamMi umpa’dei salana tau, sia kapua kamaturu-turuamMi lako mintu’ to umpengkamoyaiKomi.

6

O PUANG, tananni talinga tu passambayangku, sia perangii tu pengkamoyaku.

7

Iake mandasana’ meongli’na’ mati’ Kalemi, belanna tae’ amMi tang umperangiina’.

8

Iatu mintu’ deata tae’ ussitinti batuangKomi, sia moi misa’ tae’ ussilioan panggaragamMi.

9

Mintu’na bangsa tu mangka Mikombong la sae menomba dio oloMi, o Puang, sia umpakala’bi’ sangamMi.

10

Belanna Kamumo tu pasareongan umpogau’ kalle-kallean, Kamu manna tu Puang Matua.

11

O PUANG, ada’ina’ tu lalanMi, angku pengkaolai kamanapparamMi; pakalebui tu penaangku angku kataku’ sangamMi.

12

O Puang, Kapenombangku, la ponno penaangku umpudiKomi, sia la kupakala’bi’ tu sangamMi sae lakona.

13

Belanna kapua kamasokanamMi lako kaleku, sia Mirampanammo tu deatangku dio mai posi’na lino to mate.

14

O Puang Matua, mintu’ to matampo ke’de’mo umbalina’, sia kombonganna to masa’ga’ la ungka’tu sunga’ku. Sia tae’mo nakilalaiKomi lan penaanna.

15

Apa kamu, o Puang, tu Kapenomban sumpu mamase sia sa’pala buda, sia kalando pesuka’ sia kapua tu kamasokanamMi sia kamarurusamMi.

16

Sailena’ sia katuru-turuina’, benni kamatotoramMi tu taumMi, sia lendokanni tu anakna kaunanMi baine.

17

Pogauranna’ misa’ tanda napotanda tasikna kameloan, kumua anna ta’pai matanna mintu’ to ungkabiri’na’ anna kasirisan, belanna Kamumo, o PUANG, tu mangka untunduina’ sia umpakatanana’.

alkitab.me