:
To umpoperinding pala’ Puang Matua 1 Minda-minda umpoperinding pala’ To Patodoranna, tau iato mai Nakulambu taruno To umpoissan angge maritik.
2 Ma’kadana’ lako PUANG kukua: Kamumo tu pentilindungangku sia tambakukungku, iamo Kapenombangku tu kuposande’.
3 Belanna ia la urrampanangko dio mai poyana to mamoya, sia dio mai ropu mesabu’i.
4 Iamo la unnonganniko pani’Na, sia diong kalepakNa munii mentilindung; kamarurusanNa tu mupobalulang sia mupokararran.
5 Da’omo ammu kataku’ metakuranna kebongi, ba’tu tinaran sumayo ke kulla’i allo.
6 Ba’tu ropu tu lu lako lu dio mai ke malillinni, ba’tu rammun pasanggangan ke ma’tangngai allo.
7 Sangsa’bu tau tibambang dio sa’demu, sia sanglampa dio kananmu. apa tae’ nala ullambi’ko.
8 La mutiro bangri mata ba’rummu, ammu kitai tu pakkanna lako to tang mekaaluk.
9 Belanna kamuri, o PUANG, perinding pala’ku, mutonno’mo tu patodoranna mupopentilindungan.
10 Moi misa’ kamandasan tae’ la urrampoiko, sia moi misa’ parri tae’ la urrandan len tendamu.
11 Belanna la Nakuan tu mai malaeka’Na diona iko anna rinding pala’ko dio lu lalanmu.
12 La narande pala’ko’ da natitodo tu lentekmu lako batu.
13 La mulullu’ tu singa sia ula’ rame, ondongpi iatu anak singa sia saa la mulullu’ parapa.
14 Belanna la’ka’ tongan lako Kaleku, iamoto angKu la urrampananni, sia belanna natandai tu sangangKu, iamoto angKu la urrinding pala’i.
15 Ianna meongli’ ussa’bu’na’, la Kubalii; sia la Kurondong lan mintu’ kamandasanna, la Kurampanan sia la Kupamala’bi’.
16 La Kupeliui kamalamberan sunga’ tu penaanna, sia la Kupakitan kasalamaran lu dio mai Kaleku.