Mazmur 94

Puang Matua umpapakkanni to umpandasa taunNa 1

O PUANG, Kapenomban ma’papakkanni, o Kapenomban ma’papakkanni, popengkillangi tu Kalemi.

2

Ke’de’Komi, o To ma’paolai salu lako te lino, parampoi pepakkan tu mintu’ to matampo.

3

O PUANG, la sangapapira tu to tang mekaaluk, la sangapapira tu to tang mekaaluk la sila’tekan?

4

Tau iato mai ma’be’se sia ma’kada matampo, mintu’i tu to umpogau’ kakadakean ussattuan kalena;

5

Tau iato mai umbala’-bala’ taumMi, sia umpandasa mana’Mi.

6

Napatei tu mai baine balu sia to sae, sia urrere’ pia biung.

7

Nakua: Tae’ Natiroi PUANG, sia tae’ anNa issanni Kapenombanna bati’na Yakub.

8

Palan ara’i, e to baga pu’pu’ lan bangsa iate, e to tang keinaa, piranra mimane la kinaa?

9

Ma’apai anna tang la parangi tu To ungkombong talinga? Ma’apai anna tang la patiro tu To umpadadi mata?

10

Ma’apai Ia tu To unnada’i mintu’ bangsa, anna tang la mangukung, Iamotu To umpatudu to lino?

11

Naissan PUANG tu mintu’ tangnga’na to lino, kumua iatu iannato tang kebattuan.

12

Maupa’ tu to Miada’, o PUANG, sia to Mipatudu lan mai sukaran alukMi.

13

Kumua amMi karimmanni dio mai attu kamaparrisan. Sae lako dibo’bokanna patuang lambe’ tu to tang mekaaluk.

14

Belanna tae’ anNa la ussuale pala’i PUANG tu taunNa, sia tae’ anNa la untampei tu mana’Na:

15

Belanna iatu pa’paolai salu la sule lako kamalamburan, sia mintu’ to bulo lollong la umpengkaolai.

16

Mindara tu la untunduina’ unnea to umpogau’ kakadakean? Sia mindara tu la umpessula’ina’ unnea to sakka’ gau’?

17

Iakenna tang PUANG mangka untunduina’, manassa sidi’mora anna lendu’ tama inan malalundun tu deatangku.

18

Iatongku kua: La tilende’ tu lentekku. – Nasande’na’ kamasokanamMi, o PUANG.

19

Iatonna sakerangngan-rangngannamo tu kamagiangan lan ba’tengku, napasendemi mintu’ pa’pakatanamMi tu penaangku.

20

Ma’apai amMi la siayoka isungan nanii tonang pasangganganna, tu melo salian naumpabu’tu kamaparrisan.

21

Tau iato mai sama turu’ la unnala sunga’na to malambu’, sia untiro kadake rarana to tang sala.

22

Apa PUANGmo tu kupotambakuku. Sia Kapenombangku kupobuntu batu pentirerungan.

23

Ia umpapakkanni kabulitukanna tau iato mai, sia Ia la ussabu’i sola nasangi lan kakadakeanna, pissanmito la Nasabu’i PUANG Kapenombanta tu tau iato mai.

alkitab.me