Nahum 3

Upu’ allona tu kota umpatibollo rara, tu buttok manna lan, naponnoi pa’kasanggang, sia tae’ upu’na mangrampa.

Perangiimi tu oni pebamba! perangiimi tu oni lentenan karetana, sikane’tekan! Mintu’ darang sipa’tetta’-tettaran sia iatu mintu’ kareta sitibuang-buang.

Na iatu darang metteba’, sia mintu’ tu pa’dang pandila-dila sia mintu’ doke dukku-dukku; lendu’ budanna tau dipatei sia buda tu to mate, sia tae’ upu’na tu batang rabuk, anna potitodoanni tau iato mai.

Natumang kabudanna gau’ salana baine bualang, tu melo pantarisanna, manarang ma’patama-tamai, tu umbalukan ba’tu pira-pira bangsa tete dio pa’gau’ salana, sia ba’tu pira-pira pa’rapuan tete dio pa’patama-tamainna.

Manassa la Kulaoiko! kadanNa PUANGna mintu’ ma’dandan maritik, la Kupoli’ tu tampak dodomu sae langngan lindomu sia la Kupasombo tu kama’kambelangammu lako mintu’ bangsa sia kasirisammu lako mintu’ kadatuan.

Kuleba’ko apa masarepa sia la Kupamatunako sia la Kupadadiko pengkitan,

naurunganni minda-minda untiroko, la mallai ma’dondo untampeko sia ma’kada, nakua: Sanggangmo tu Niniwe! Mindara la untangi’i? Umbara la kunii undakarangko pa’pakatana?

Mandu melorokoka na iatu No-Amon, tu dio biring salu kapua, tu natikui uai, tu umpobenteng tasik sia umporinding tembo’ uai?

To Etiopia sia to Mesir tang dikemba’ diia’ iamo kamatotoranna, to Put sia to Libia iamo patunduammu.

Moi nasusito, inang mangka dukamo male dipali’, sia iatu mintu’ pia-pia’na dipessambakan dio lu mintu’ tetuk lalan sia diloterei tu mintu’ to la’bi’na sia mintu’ to kapuana dirante.

Iko duka la malango sia limpu-limpu, sia la undaka’ko pembunian dio mai uali.

Mintu’ tambakukummu susi garonto’ ara, tu membua bunga’; iake digoyakki ronno’mi tu buanna tama sadangna to la ungkandei.

Manassa iatu mintu’ muane lan lu tangngamu dadimo susi baine; mintu’ tu babangan tondokmu tungangnga’ lako ualimmu, sia mintu’ salli’ babangammu napuraimo api.

Timbako uai, mupakei ke dipatama limbuko, pematoto’i tu mintu’ bentengmu, pelleseiko litak pitti’ sia lullu’ko losso’ pitti’, ammu toei tu pandiri batu tela.

Inde to dio la nanii ungkandeko api sia nasabu’iko pa’dang, susi batik pa’ampello’ dipisanni. Moi ammu memba’ka’ susi batik pa’ampello’, moi ammu memba’ka’ susi batik,

– mupopemba’ka’ tu to ma’baluk-balukmu na iatu bintoen dao langi’ – apa iatu batik pa’ampello’ umballa’ pani’na anna male mettia’.

Iatu mintu’ tau la’bi’mu susi batik sia iatu to diala pareamu susi sangtuntunan batik londong, tu ma’kaponan dao lu rinding tembo’, ke attu madingin, iake bu’tumi allo, malemo mettia’, naurungan tae’mo ditandai tu inanna. Umbamira nanii?

Mintu’ tu to mangkambi’mu mamma’mo, e datu Asyur, sia iatu to kapuammu timbambangmo; iatu taummu tisambo’mo dao lu mintu’ buntu, sia moi misa’ tau tae’mo urrampunni.

Tae’mo kameloanna tu kale le’tomu, tae’mo na la mondo tu bangkemu. Iatu mintu’ to urrangi karebammu, ussa’pa-sa’pa pala’na diona iko, belanna mindara tu tang la tontong narampoi tu kakadakeammu?