Nehemia 5

Ta’kala bu’tumi sarro kapua dio mai to buda sola bainena belanna to Yahudi, siulu’na.

Den tu tau ma’kada nakua: Buda tu anakki muane sia anakki baine, angki la morai unnalli gandung kikande angki potuoi.

Den duka tu ma’kada nakua: Kipa’pentoeammo tu pa’lakki sia pa’lak anggoro’ki sia banuangki, angki pangallianni gandung lan karorian.

Sia denmo tu ma’kada nakua: Unnindankan doi’ kipamayaran simangki lako datu, na pa’lakki sia pa’lak anggoro’ki kipaboro’.

Moi angki sangrara sangbuku tu siulu’ki sia moi na iatu anakki muane pada bangsia tu anakna muane, apa moi susito kipa’bengan bangmo tu anakki muane sia anakki baine dipotosandang sia ba’tu pira-pira tu anakki baine dipakasiri’ lan kasandangan natae’ kiissan tu apa la kipogau’; na iatu pa’lakki sia pa’lak anggoro’ki natoe dukamoto senga’.

Iatongku rangimi tu sarrona tau iato mai sia iatu mintu’nato, re’dekmi ara’ku.

Ma’tangnga’ melomo’ lan penaangku, angku pasalai tu to la’bi’ sia pangulu kukua: Pantan mesaro la’da’komi dio mai siulu’mi! Kupaden dukami misa’ kombongan kapua la untingoi tau iato mai,

angku ma’kada lako kukua: Mintu’ siulu’ta, iamotu to Yahudi, tu mangka dibaluk lako to kapere’, kila’bakmo sitinaya pakulleki; apa iatu kamu mibaluk tu siulu’mi, na iatu tau iato mai umbaluk kalena lako kaleki! Kappami tu tau iato mai sia tang naissan mebali.

Ma’kadamo’ kukua: Tae’ namelo tu apa mipogau’. Tae’raka mila lolang ungkataku’ Kapenombanta, anta toyang dio mai pebe’sena to kapere’, ualinta?

Iatu aku sola mintu’ siulu’ku sia mintu’ taungku umpaindanni doi’ sia gandung tu tau iato mai; apa tae’mo kila umpalakui tu pa’peindan iato.

Iamoto pasulemi totemo lako tau iato mai tu mintu’ pa’lakna sia pa’lak anggoro’na sia pa’lak saitunna sia iatu mai banuanna sia doi’ napa’uaian sia taeranni tu pa’peindanmi diona gandung, uai anggoro’ sia minna’.

Ma’kadami tu tau iato mai nakua: Manassa la kipasulemo sia tae’mo kila ussinga’ len apa dio mai tau iato mai, la kipogau’mo susitu kadammi. Kutambaimi tu mintu’ to minaa, angku suai tu tau iato mai umpalao sumpa, kumua napogau’i susitu dipokadanna.

Sia kupentambakan tu sepu’ bayu lamba’ku angku ma’kada kukua: Susi dukato Natibe Puang Matua lan mai banuanna sia dio mai iananna tu mintu’ tau tae’ napalanda’i tu pangallu’ iate, nasusito matambak male anna lo’bang. Ma’kadami tu mintu’ kombongan nakua: Amin, sia napudi tu PUANG. Naturu’mi mintu’ bangsana te kada iate.

Randuk allo iato naangka’mo’ datu Artahsasta dadi to maraa dio tondok Yehuda, randuk dio mai taun ma’penduangpulo kaparentanna sae lako taun ma’pentallungpulo ndua, den sangpulo dua taunna, tae’ kutarima len pa’kasian to maraa, la aku la mintu’ siulu’ku.

Iatu mintu’ to maraa tu dolona na aku umpamagasa passananna mintu’ tau sia untuntun roti sia anggoro’ dio mai tau iato mai, senga’pa to tu patangpulo sikele’ salaka. Sia ia duka tu taunna matampo lako bangsa iato. Apa iatu aku tae’ kupogau’i susito, belanna mataku’na’ lako Puang Matua.

Sia mengkarang dukana’ dio te rinding tembo’, apa moi sangteppe’ pa’lak tae’ kupotaa, susi duka bangsia mintu’ taungku sirampun inde to dio pengkarangan iato.

Iatu to Yahudi sia mintu’ pangulu agi-agi saratu’ limangpulo tau sia iatu to sae lako kaleki dio mai tu mintu’ bangsa tiku lao, kupakande.

Iatu apa dipasakka’ ke sangallooi, iamotu misa’ sapi laki, annan domba malompo, sia ba’tu pira-pira manuk-manuk, aku nasang umpadenni, na iake sisangpulooi allona sebo ma’rupa-rupa anggoro’. Moi nasusi to tae’ra kutuntun pa’kasian to maraa, belanna iatu pa’diaman iate, umpamatana’mo te bangsa iate.

O Kapenombangku, kilalaina’ tu kupomelona sitinaya tu mintu’ apa mangka kupogau’ lako bangsa iate.