Nehemia 7

Iatonna sundunmo dibangun sule tu rinding tembo’, kupalakoimi ba’bana sia kuangka’ tu mai to ma’kampa babangan, to menani sia to Lewi.

Kuangka’mi tu Hanani siulu’ku sia Hananya, kamandang benteng, ungkampai Yerusalem, belanna iatu Hananya misa’ to matappa’ sia to ungkataku’ Puang Matua buda tau nalosongi.

Ma’kadamo’ lako kukua: Da’pa mibungka’i tu babangan Yerusalem, ke tae’pi nakulla’ allo; sia la ditutu’ tu ba’ba, ke bendanmi tu to ma’kampa dio inanna; sia la migonting. Sia pa’tondokan Yerusalem la miato’ tu to ma’kampa, pantan dio inanna sia pantan sipatu banuanna.

Iatu kota iato kalua’ sia kapua, apa sidi’ri tu tau torro lan sia tae’pa nadibangun tu mai banua.

Attu iato Napatiakka’mi Kapenombangku tu penaangku, angku rampunni tu mintu’ to la’bi’ sia pangulu sia to buda, anna disua ussura’i tama luntara’ tu sanganna. Sia kuappa’tu luntara’ dinii ussura’ sanganna tau iato mai tu bunga’na ke’de’, angku apparanni disura’ lan susite, nakua:

Inde sia tu pa’tondokan propinsi, tu ke’de’ lu dio mai padanna to dipali’, tu napali’ Nebukadnezar, datu Babel, sia sulemo lako Yerusalem sia lako Yehuda, pantan umpeloloi kotana;

tu sae nasolan Zerubabel, Yesua, Nehemia, Azarya, Raamya, Nahamani, Mordekhai, Bilsan, Misperet, Bigwai, Nehum na Baana. Inde sia tu iaranna mintu’ muane to Israel:

Bati’na Paros: duangsa’bu ssaratu’ pitungpulo ndua;

bati’na Sefaca: talluratu’ pitungpulo ndua;

bati’na Arakh: annanratu’ limangpulo ndua;

bati’na Pahat-Moab, iamotu bati’na Yesua sia Yoab: duangsa’bu karua ratu’na ssangpulo karua;

bati’na Elam: sangsa’bu duaratu’ limangpulo nna’pa’;

bati’na Zatu: karua ratu’na patangpulo llima;

bati’na Zakai: pituratu’ annan pulona;

bati’na Binui: annanratu’ patangpulo ngkarua;

bati’na Bebai: annanratu’ duangpulo ngkarua;

bati’na Azgad: duangsa’bu talluratu’ duangpulo ndua;

bati’na Adonikam: annanratu’ annan pulona mpitu;

bati’na Bigwai: duangsa’bu annan pulona mpitu;

bati’na Adin: annanratu’ limangpulo llima;

bati’na Ater, iamotu bati’na Hizkia: kasera pulona ngkarua;

bati’na Hasum: talluratu’ duangpulo ngkarua;

bati’na Bezai talluratu’ duangpulo nna’pa’;

bati’na Harif: saratu’ sangpulo dua;

bati’na Gibeon: kasera pulona llima;

iatu muane umpa’tondokki Betlehem sia Netofa: saratu’ karua pulona ngkarua;

iatu muane umpa’tondokki Anatot: saratu’ duangpulo ngkarua;

iatu muane umpa’tondokki Bet-Azmawet: patangpulo ndua;

iatu muane umpa’tondokki Kiryat-Yearim, Kefira na Beerot: pituratu’ patangpulo ntallu;

iatu muane, umpa’tondokki Rama sia Gaba: annanratu’ duangpulo mmisa;

iatu muane umpa’tondokki Mikhmas: saratu’ duangpulo ndua;

iatu muane umpa’tondokki Betel sia Ai: saratu’ duangpulo ntallu;

iatu muane umpa’tondokki Nebo senga’: limangpulo ndua;

iatu muane umpa’tondokki Elam senga’: sangsa’bu duaratu’ limangpulo nna’pa’;

bati’na Harim: talluratu’ nduangpulo;

to Yerikho: talluratu’ patangpulo llima;

to Lod, Hadid sia Ono: pituratu’ duangpulo mmisa;

to Senaa: tallungsa’bu kasera ratu’na ntallungpulo.

Mintu’ to minaa: Bati’na Yedaya, iamotu tongkonanna Yesua: kasera ratu’na pitungpulo ntallu;

bati’na Imer: sangsa’bu limangpulo ndua;

bati’na Pasyhur: sangsa’bu duaratu’ patangpulo mpitu;

bati’na Harim: sangsa’bu sangpulo pitu.

Mintu’ to Lewi: Bati’na Yesua, iamotu bati’na Kadmiel sia bati’na Hodewa: pitungpulo nna’pa’.

Mintu’ to menani: Bati’na Asaf: saratu’ patangpulo ngkarua.

Mintu’ to ma’kampa babangan: Bati’na Salum, bati’na Ater, bati’na Talmon, bati’na Akub, bati’na Hatita, na bati’na Sobai: saratu’ tallungpulo ngkarua.

Mintu’ to pabali-balian lan Banua Kabusungan: Bati’na Ziha, bati’na Hasufa, bati’na Tabaot;

bati’na Keros, bati’na Sia, bati’na Padon;

bati’na Lebana, bati’na Hagaba, bati’na Salmai;

bati’na Hanan, bati’na Gidel, bati’na Gahar;

bati’na Reaya, bati’na Rezin, bati’na Nekoda;

bati’na Gazam, bati’na Uza, bati’na Paseah;

bati’na Besai, to Meunim, to Nefusim;

bati’na Bakbuk, bati’na Hakufa, bati’na Harhur;

bati’na Bazlit, bati’na Mehida, bati’na Harsa;

bati’na Barkos, bati’na Sisera, bati’na Temah;

bati’na Neziah na bati’na Hatifa.

Mintu’ bati’na taunna Salomo: Bati’na Sotai, bati’na Soferet, bati’na Perida;

bati’na Yaala, bati’na Darkon, bati’na Gidel;

bati’na Sefaca, bati’na Hatil, bati’na Pokheret-Hazebaim, na bati’na Amon.

Mintu’ tu to pabali-balian lan Banua Kabusungan sia bati’na taunna Salomo talluratu’ kasera pulona ndua.

Inde sia tu ke’de’ dio mai Tel-Melah, Tel-Harsa, Kerub, Adon na Imer – apa iatu tau iato mai tae’ naissan untuna’i, kumua iatu rapunna sia bati’na ba’tu naala siai bilanganna to Israel –:

bati’na Delaya, bati’na Tobia na bati’na Nekoda: annanratu’ patangpulo ndua;

sia dio mai mintu’ to minaa: bati’na Habaya, bati’na Hakos na bati’na Barzilai tu mangka unnala misa’ baine, bati’na Barzilai to Gilead, napobainei sia naala tu sanganna tau iato naposangai.

Mintu’ tau iato undaka’ sura’ tanda kumua mangkamo disura’ lan luntara’, apa tae’ nadiappa’, iamoto naditassu’i lan mai pangka’ katominaan,

Nagagaimi to maraa lompo tu tau iato mai ungkandei tu kande tarru’ masero sae lako bendan misa’ to minaa ontoe Urim sola Tumim.

Mintu’ tu kombongan iato den patangpulo ndua sa’bu talluratu’ nnannan pulona,

senga’ ia tu mintu’ kaunanna muane sia kaunanna baine tau iato mai, tu mintu’na pitungsa’bu talluratu’ tallungpulo mpitu; den dukapa to menaninna muane sia baine duaratu’ patangpulo llima.

Iatu untana: a’pa’ratu’ tallungpulo llima na keledainna annan sa’bunna pituratu’ nduangpulo.

Denmi pirai tu pangulu rapu ussorong pamengan lako pengkarangan iato. Iatu to maraa lompo ussorong pamengan tama pangrampunan doi’; sangsa’bu dirhan bulaan, limangpulo pindan pa’pi’pikan, sia limaratu’ tallungpulo bayu to minaa.

Ba’tu pira-pira pangulu rapu ussorong pamengan tama pangrampunan doi’ la diangkosoran pengkarangan iato: bulaan duangpulo sa’bu dirhan, salaka duangsa’bu nduaratu’ mina.

Iatu mintu’ apa nasorong to kamban, iamotu bulaan duangpulo sa’bu dirhan, salaka duangsa’bu mina sia bayu to minaa annan pulona mpitu.

Iatu mintu’ to minaa sia to Lewi sia to ma’kampa babangan sia to menani, sia ba’tu pira-pirai tu to buda sia to pabali-balian lan Banua Kabusungan sia mintu’i tu to Israel senga’, male ma’tondok lan lu kotana.

(7:72)