Nehemia 9

Iatonna allo ma’penduangpulona nna’pa’ bulan iato saemi sirampun tu mintu’ to Israel nama’puasa sia ma’pote dibolong sia nanii barra’-barra’ tu ulunna.

Umpatoyangmo kalena tu bati’na Israel dio mai mintu’ to sae sia bendan unnaku kasalanna sia kakelokanna nene’ to dolona.

Iatonna bendanmo tu tau iato mai dio inanna, nabasami tau lan mai sura’ Sukaran alukNa PUANG, Kapenombanna, sangtepo allo, anna mangaku sala sangtepo allo sia tukku menomba dio oloNa PUANG, Kapenombanna.

Dao lempo to Lewi bendammi tu Yesua, Bani, Kadmiel, Sebanya, Buni, Serebya, Bani na Kenani; anna metamba umpekapuai gamaranna lako PUANG, Kapenombanna.

Ma’kadami tu to Lewi Yesua, Kadmiel, Bani, Hasabneya, Serebya, Hodia, Sebanya na Petahya, nakua: Ke’de’komi, pudii tu PUANG, Kapenombammi, tempon dio mai landa’ lako attu situran; la napudi tau tu sanga mala’bi’Mi, tu ussamboi mintu’ kadipudian sia kadipangkeran.

Kamu mannari tu PUANG, Kamumo tu mangka umpadadi langi’, ondongpi langi’ tu daona lu mintu’ langi’ sia mintu’ ma’dandan maritikna, sia lino sola mintu’ tu untongkonni sia tasik sia mintu’ tu apa lan; sia Kamu umpatuoi tu mintu’na sia mintu’ ma’dandan maritik dao langi’ tukku menomba dio oloMi.

Kamumo tu Kapenomban, tu mangka untonno’ Abram sia ussolanni tassu’ lan mai Ur-Kasdim sia ussangai Abraham.

Sia Mitandaimo tu penaanna maruru’ dio oloMi sia mangkamoKomi sibasse la umbenni tu padang to Kanaan, to Het, to Amori, to Feris, to Yebus na to Girgasi lako bati’na. Sia Mipalanda’ tu mintu’ kadamMi, belanna malambu’Komi.

Sia Mitiro dukamo tu kamandasanna nene’ to doloki lan Mesir sia Mirangimo tu sarrona tau iato mai dio biring tasik Teberau.

Sia miparampomo tu ba’tu pira-pira tanda kalle-kallean sia tanda mangnga lako Firaun, sia mintu’ taunna sia mintu’ tau lan tondokna, belanna Miissan tu kedona tau iato mai matampo lako taumMi, sia Mipadenammo Kalemi tu misa’ sanga susitu den allo iate.

Sia mipa’dua tu tasik dio tingayona tau iato mai, naurunganni lumingka lan tangnga tasik unnola karangkeanna, na iatu mintu’ tau unnula’i tu tau iato mai Mipembuangan tama malikunna susito misa’ batu tama to’ uai mandirri’.

Iake allona Mianta’ lentong gaun na iake bonginna Mianta’ lentong api la unnarrangi tu tau iato mai dio lu lalan naolai.

Songlo’moKomi dao buntu Sinai sia ma’kadamoKomi lako tau iato mai dao mai langi’, sia Mibenmo atoran malambu’ tu tau iato mai, sukaran aluk tang tileluk, apa dipondok sia pepasan maelo.

Sia Mipaissanni dukamo tu allo katorroan maindanMi sia Mipepasanammo tu pepasan sia apa dipondok sia sukaran aluk nalopian Musa, taumMi.

Sia Mibenmo tau iato mai tu roti dao mai langi’ la umpa’dei tangdia’na sia Mipatassuran uai lan mai buntu batu la nasa’poan ma’rangna. Sia Mipa’parentan dukamo lako tau iato mai la unnalai tu padang iato la napomana’, tu mangkaKomi umpalao sumpa la ungkamaseanni.

Apa iatu kedona tau iato mai, iamotu nene’ to doloki matampo sia umpabattuk penaanna sia manoka umperangii tu pepasanMi.

Mengkailing tu tau iato mai ma’perangi sia tae’ nakilalai tu mintu’ tanda mangnga mangka Mipogau’ dio lu tau iato mai sia napabattuk tu penaanna sia unnangka’ misa’ pangulu lan kapabali-balianna la sule lako kakaunananna. Apa Kamumo tu Kapenomban ma’pagarri’ sia maturu-turu, sia mamase sia kalando pesuka’ sia kapua kamasokanamMi sia tae’ Mitampei tu tau iato mai.

Moi iatonna garagan kalena misa’ anak sapi dipati’no’ tu tau iato mai sia ma’kada nakua: Iamote tu Kapenombammu, tu ussolangko tassu’ lan mai Mesir, sia iatonna umpogau’ apa tarru’ megi’giran,

tae’ duka Mitampei tu tau iato mai lan lu padang pangallaran, belanna kakapuanna kamamaseamMi. Iatu lentong gaun tae’ natoyang dio mai tau iato mai, ke allona la umpadulluanni lalan, sia iatu lentong api, ke bonginna la unnarrangi tau iato mai dio lu lalan tu la naolai.

Sia Miben Penaa meloMi la umpakinaai tu tau iato mai sia tae’ Mipaka’tui tu mannaMi dio mai pudukna sia Miben uai ussa’poi ma’rangna.

Ondongpi, patangpulo taunna Minii ungkaduttu’i lan padang pangallaran, naurunganni tang kapu’duran sia tang buruk pakeanna sia tang kambang lette’na.

Sia Miben tau iato mai tu ba’tu pira-pira kadatuan sia bangsa sia Mitaa-taa tu kadatuan iato lako tau iato mai susi tampak padang, anna alai napomana’ tu tondokna Sihon, datu Hesbon, sia tondokna Og, datu Basan.

Sia Mipopemba’ka’ kalle-kalleammo tu bati’na tau iato mai susi bintoen dao langi’ sia Misolammo tama tondok tu mangka Mipa’parentan lako nene’ to dolona la unnalai napomana’.

Rampomi tu anakna tau iato mai anna alai tu tondok iato napomana’ sia Mipopengkanorongmo tu pa’tondokanna, iamotu to Kanaan dio tingayona tau iato mai, amMi sorongi tama limanna la datunna la mintu’ bangsa lan tondok iato, anna pogau’i lako tau iato mai tu lalan penaanna.

Natalomi tu tau iato mai tu ba’tu pira-pira kota ditambakuku sia padang malompo sia unnala ba’tu pira-pira banua ponno ma’rupa-rupa apa maelo sia ba’tu pira-pira bubun batu, pa’lak anggoro’, garonto’ saitun sia kayu membua lendu’ ia budanna napomana’. Nakandei tau iato mai sadia’na anna malompo sia manaman katuoanna tete dio kakapuanna kamasokanamMi.

Apa iatu tau iato mai pabali-bali sia naeaKomi sia natibe lako boko’na tu sukaran alukMi sia napatei tu mai nabimMi, tu unnada’i la umpasulei tu tau iato mai lako Kalemi, sia umpogau’ apa tarru’ megi’giran.

Iamoto Misorongi tu tau iato mai tama limanna ualinna tu umpapussakki. Apa iatonna lan attu kapussakanna meongli’mi lako Kalemi, amMi perangii dao mai suruga, amMi kamasei to parampanan tete dio kamamasean kapuaMi, tu urrampanan tau iato mai lan mai limanna ualinna.

Apa iake rapa’omi, umpogau’omi kadake dio oloMi, iamoto Mieloranni tu tau iato mai tama limanna ualinna, naurungan umpopengkanorongi tu tau iato mai. Apa iake meongli’omi tu tau iato mai lako Kalemi, Miperangiimi dao mai suruga sia pembuda Mirampanan tete dio kamamaseamMi.

Miada’i tu tau iato mai la umpasulei lako sukaran alukMi, apa matampo, manoka umperangii tu pepasanMi sia untengkai atoramMi. Iake naturu’i tau la napotuo. Apa napopenggega’ tu palempengna tau iato mai sia napabattuk tu penaanna sia manoka ma’perangi.

Masai allomoKomi kalando pesuka’ lako tau iato mai sia Miada’i tete dio PenaamMi nalopian nabimMi, apa tae’ natananni talinga tu dionato. Attu iato Misorongmi tu tau iato mai tama limanna ba’tu pira-pira bangsa dio lu tondok iato.

Apa tete dio kamamasean kapuaMi natae’ sia Misabu’i sia Miboko’i, belanna Kamumo tu Kapenomban maturu-turu sia mamase.

Totemo, o Kapenombangki, Kapenomban pasareongan, mawatang sia dikabangnga’, tu ungkaritutui basse sia kamasokanan, da Misanga maringanni tu mintu’ kamandasan urruakanni, la datungki la pangulungki, la tominaangki la nabingki la nene’ todoloki sia mintu’ taumMi, randuk dio mai linona datu Asyur sae lako allo iate.

Apa Kamumo tu malambu’ lan mintu’ apa urrampoikan, belanna Mipa’petiroammo tu kamarurusamMi, apa kami lolang tang mekaalukkanni.

Iatu mai datungki sia pangulungki sia to minaangki sia nene’ to doloki tae’ nakariritui tu sukaran alukMi sia tae’ napalan penaai tu pepasanMi sia iatu pa’pakilala tu Mipokadanni.

Moi anna unnampui misa’ kadatuan tu tau iato mai, moi amMi benni pa’kamase kapua, sia moi amMi benni padang kalua’ sia malompo, apa tae’ napengkaolaiKomi sia tae’ namorai mengkatoba’ dio mai gau’ kadakena.

Manassa allo iate kaunanmokan, sia iatu padang mangka Mikamasean nene’ todoloki, kumua nakandei tu alanna sia burana – tonganna lanmo kinii dadi kaunan.

Padang iate umpopemba’karan mintu’ datu burana, tu Miangkarangkanni belanna kasalangki, anna parentai tu kaleki sia iatu patuoangki unturu’ lalan penaanna; iamoto angki lan kapussakan kapua.

Bannang diomote mintu’nate untananmoki’ basse tang leluk anta patamai sura’, anna ca’i pangulunta sia to Lewinta sia to minaanta.