Obaja 1

Patiro mendeatanna Obaja. Inde sia tu kadanNa Puangta PUANG diona Edom – diori mai PUANG kinii urrangi kareba, iamotu misa’ pesua disua ullelei mintu’ bangsa, tu ma’kada nakua, Maikomi, take’de’ urrariis-

Tonganna la Kupabitti’ko dio lu mintu’ bangsa sia dipamatuna tonganko.

Kamatampoammu umpakenamoko, e to untorroi lo’ko’ buntu batu, iamotu inan madaoammu, sia iatu ma’kada lan penaammu, kumua: Mindara umbelai la untua’na’ rokko padang?

Moi unggaragaiko serangmu pada langka’ serangna langkan maega, ondongpi napetangngai mintu’ bintoen, inde dukato dio mai la Kunii untua’ko, kadanNa PUANG.

Iake denni to boko sae lako kalemu, ba’tu to mangrampa bongi, a’a! lendu’ ia nasanggangmu! tae’raka na ia manna naala tu silasanna lako kalena? Iake saei lako kelemu tu to mebua anggoro’, tae’raka nala untampeangko pira?

Tumbai kadiparessanna tu Esau sia didaka’ tu barang apanna sadiappa’na.

Mintu’ solamu musibassean ussuako sorong boko’ lako katonan tondok, sia mintu’ sangmuanemu umpakenako sia ussau’ko, sia iatu musolan kumande untananniko poya, tae’ tu tangnga’ kinaanna.

Tae’raka naallo iato, kadanNa PUANG, Kula umputtai tu mintu’ to paissan lan mai Edom sia iatu tangnga’ kinaa dao mai buntunna Esau?

Mintu’ to lalongmu, e Téman, la naala sumangnga, anna mintu’ muane dao mai buntunna Esau sabu’ nakande padang.

Belanna penggauran masa’ga’ tu mupogau’ lako siulu’mu Yakub, iamoto la natodingko siri’, sia la dipisanniko tontong sae lakona.

Iatu allo munii bendan mentiro-tiro, iamotu allo nanii untingkanni to tama sae tu surodadunna sia tama babanganna to salian lembang, anna loterei tu Yerusalem, attu iato susiko to misa’ solana tau iato mai.

Da musende untiroi tu allona siulu’mu, iamo allo kamandasanna, sia da muparannu diona to Yehuda ke allo kasangganganna tau iato mai, da mupakapua kada ke allo kapu’duranna.

Da mutama babanganna taungKu ke allo kamandasanna, na iko da musende untiroi tu kamaparrisanna ke allo kamandasanna; sia da muparampoi limammu tu barang apanna ke allo kamandasanna.

Da mubendan dio kasepangan lalan la ussabu’i tu mintu’ taunna, tu umpallaian kalena, sia da’ musorongi tu mintu’ to tilendokna, ke allo kamaparrisanna.

Belanna mandappi’mo tu alloNa PUANG la urrampoi mintu’ bangsa; susitu penggaurammu, susi dukamo la dipogau’ lako kalemu, sia iatu penggaurammu la sule langngan ulummu.

Manassa, susitu kamangkammi mangiru’ dao buntu maindanKu, susi dukato tu mintu’ bangsa tang tore mangiru’; ondongpi nabarakki mangiru’, naurunganni iatu tau iato mai butung to tae’ lenpa natuo.

Apa dao buntu Sion la den katilendokan, sia iamo la dadi inan maindan; na iatu bati’na Yakub la umpoapa pole’i sule tu apanna.

Iatu bati’na Yakub la susi api na iatu bati’na Yusuf la susi dukku api, na iatu bati’na Esau la susi dalame; la natutungi sia pura naballa, na moi misa’ tu bati’na Esau tae’ natilendok, belanna susimo kadanNa PUANG.

Iatu tau lo’ padang rampe Lo’na lu la unnala buntunna Esau napobuntu, sia iatu tau dio padang Merrantena la unnala tondok to Filistin napotondok; iatu tau iato mai la umpopadang padang Efraim sia padang Samaria, sia Benyamin la umpopadang Gilead.

Iatu sangtuntunanna to Israel, tu dipali’ la umpotondok tondok to Kanaan sae lako Zarfat; na iatu to dipali’ dio mai Yerusalem, tu dio Sefarad, la umpokotai tu mintu’ kota rampe Lo’na lu.

Iatu to mangrampanan la kendek langngan buntu Sion, sia la unnukung buntunna Esau, na iatu kadatuan iato PUANG umpoissanni.