Pengkhotbah 12
Iamoto, kilalai tu Totumampamu lan attu kamangurammu, namane sae tu allo kadake sia taun, tu la mupokada diona a’ganna: Tae’ naalai penaangkuto.
Iake tae’pi mata allo sia arrang sia bulan sia mintu’ bintoen la malillin, sia iatu salebu’ sae sule, ke mangkai uran.
Allo iato la ma’parondo tu pa’kampa banua sia bukku’ tu to mawatang sia iatu baine manglelu’ torro manglelu’, belanna sosso’mo tu bilanganna, sia iatu mentirona dao mai pentiroan maraunmo.
Sia iake titutu’mi tu da’dua papan ba’ba ma’palulako lalan, sia iake tang malesomi tu oni pangleluran sia ma’kissak-kissak tu gamara susi oni manuk-manuk sia tang maseromo tu mintu’ oni dirangi.
Iake nakataku’i tau tu inan matande sia den apa napotiramban dio lu lalan; to ke menta’bimi tu garonto’ badam sia iatu batik napela’-pela’ bang lumingka sia iatu bunga kappari’ tae’mo gai’na –, belanna iatu tolino sule lako banua matontonganna sia mintu’ to umbating lu lako lu dio mai dio lu batatta.
Iake tae’pi nadibukai tu rante-rante salaka sia sanggang tu palita bulaan, ke tae’pi natesse tu busso dio to’ kalimbuang sia le’to tu lentenan petimba diong to’ bubun,
sia iatu litak sule rokko padang, susi a’gan dolona, sia iatu penaa sule lako Puang Matua, tu mangka ungkamaseanni.
Tae’ liu gai’na, kadanna Tomangada’, mintu’na tae’ nasang gai’na!
Tangia manna kinaa tu Tomangada’, sangadinna naada’i duka ba’tu pira-pira kapaissanan tu to buda; anna ma’timbang sia ma’nannung sia untono’ buda kada peada’.
Napengkaolai Tomangada’ la ullolongan kada mammi’, sia ussura’ misa’ sura’ tongan sia kada matappa’.
Iatu kadanna to kinaa susito panusuk; iatu pa’pulung kadanna susito petangki’ manda’ dilammak; mintu’nato nakamaseanni tu to mangkambi’ misa’ri.
Na iatu senga’nato, e anakku, kana’nai tu kalemu, belanna iatu untono’ buda sura’, tae’ upu’na, sia iatu umparessa buda apa, umpalangga’ kaleta.
Inde sia tu kada ma’katampakanna tu mintu’ apa narangimo tau, iamotu kataku’i tu Puang Matua sia karitutui tu mintu’ pepasanNa, belanna iamoto tu sipatu lako mintu’ tolino.
Belanna iatu simisa’-misa’ penggauranna tau la Napopennolo Puang Matua tama pa’paolaian salu diona tu mintu’ apa membuni, la melona, la kadakena.