:
← Pengkhotbah 3 Pengkhotbah 5 →

Pengkhotbah 4

1

Kutiro pole’omi tu mintu’ pa’pakario-rio tu dipogau’ lan naarrang matanna allo, tiromi tu uai matanna mintu’ to dipakario-rio, namoi misa’ tae’ tau umpakatanai tu tau iato mai; rampe dio tu to ma’pakario-rio den kakuasan – namoi misa’ tae’ tau umpakatanai tu tau iato mai.

2

Iamoto kupudii tu mintu’ tomate, tu masaimo ka’tu sunga’na, kumua losong upa’na na mintu’ to tuo, tu tuopa sae lako totemo.

3

Sia kumua losong pole’pa ia upa’na na mintu’ tau iato tu to tae’pa nadadi sia tae’pa natiroi tu penggauran kadake tu dipogau’ lan naarrang matanna allo.

4

Kutiro duka, kumua iatu mintu’ sara’ sia mintu’ kamalintaran mengkarang, umpabu’tu kamangimburuanna misa’ tau lako solana; ia duka tu apa iato tae’ gai’na sia susito unnula’ angin.

5

Iatu to baga ma’koko kalepak sia ungkande duku’ kalena.

6

Iatu kamanamanan sangraku’ losong melona na iatu duang ka’pan ponno sara’ sia unnula’ angin.

Iatu sara’na to tang kesola tae’ gai’na 7

Kutiro pole’omi tu misa’ apa tae’ gai’na lan naarrang matanna allo;

8

iamotu misa’ tau tae’ solana, moi anakna ba’tu siulu’na tae’ duka, apa moi susito tae’ duka upu’na tu mintu’ sara’na; sia tae’ namangingngi’ tu matanna untiroi tu mintu’ kasugiranna; – mindara la umpomaupa’i angku mara’ta’ bangra sia tang unneloran kaleku umperasai tu melona? Ia duka tu iannato tae’ gai’na sia misa’ apa kadake.

9

Iatu tau ke da’duai, melo na ia ke misa’ri, belanna melo lako sola duai tu poleanna pengkaranganna.

10

Iake songkai sola duai, iatu misa’na ma’din umbangunan pole’i tu misa’na, apa upu’ dikka’ allona tu to misa-misari, ke songkai, belanna tae’ tu sangayokanna la umbangunan pole’i sule.

11

Susi dukato, ke denni da’dua tau siammu’ mamma’, malassu tu kalena sola duai, apa iatu to misa’ri, umba la nakua umpamalassu kalena?

12

Iake ma’dinni misa’ tau untalo tau misa’, manassa iatu tau da’dua nakullepa bendan unneai; sia iatu tallu ulang dipasiulang, tae’ namadomi’ dika’tuan.

Tae’ gai’na tu pa’poraianna to buda 13

Misa’ pia muane kinaa, moi anna bongko, mandu melo na iatu misa’ datu matua, apa baga, tu tang umperangii pa’pakilala.

14

Belanna iatu pia muane tassu’ lan mai pa’tarungkuan la diangka’ datu, moi anna dadi dio mai to bongko tonna lanpa kadatuanna tu datu iato.

15

Kutiro tu to tuo lan naarrang matanna allo, unturu’ to mangura, tu la ussondai tu datu iato.

16

Tae’ bang upu’na tu to buda, iamotu mintu’ to undi unturu’i. Apa iatu to dadi undi tae’mo naposendei. Tonganna ia duka tu apa iato tae’ gai’na sia susito unnula’ angin.

Link:
← Pengkhotbah 3 Pengkhotbah 5 →