Pengkhotbah 7
Mandu melo tu sanga melo na iatu minna’ pandere’ busarungngu’, sia melo iatu allo kamateanna tau na iatu allo kadadianna.
Melo tu tama banua nanii passanda bolong na iatu tama banua nanii pa’maruasan; belanna iatu iannato iamo ma’katampakanna katuoanna mintu’ tolino, sia melo ke napalan penaai to tuo tu iannato.
Melo tu karossoan penaa na iatu metaa, belanna iatu kamaru’gunan napotanda kamaloloan penaa.
Iatu penaanna to kinaa lan ia banua nanii passanda bolong, apa iatu penaanna to baga lan ia banua nanii kaparannuan.
Melo ia tu umperangii peta’tanna to kinaa na iatu umperangi sengona to baga.
Belanna susi duri mema’tu diongna lu kurin, susi dukato tu pelale’ to baga. Ia duka tu apa iato, tae’ gai’na.
Tonganna iatu pa’pakario-rio umpopendadi baga to kinaa sia iatu pappe’ ungkadakei penaa.
Melo ia ma’katampakanna tu misa’ apa na iatu pamulanna; melo iatu to kalando pesuka’, na iatu to madao penaa.
Da mumadomi’ umpatiludakki tu ara’mu, belanna iatu ara’na to baga, iamo inan saki inaa.
Da muma’kada kumua: Matumbari anna melo ia tu mintu’ attu dolo na iatu attu totemo? Belanna tae’ nabannang dio kakinaan munii umpekutananni tu iannato.
Iatu kakinaan pada melona mana’ sia napoupa’ tu to untiro mata allo.
Belanna iatu kakinaan dipopentionganan, susi duka tu doi’, apa tapoupa’ ke taissanni kumua iatu kakinaan napotuo mintu’ to unnampui.
Nannungi tu mintu’ pengkaranganna Puang Matua, belanna mindara ma’din umpamaloloi tu apa Napakelok?
La paiman penaammu lan attu kamauparan, apa kilalai dukai lan allo kamasussan, kumua pada Napadadi Puang Matua tu iannato; belanna moi misa’ apa tae’ nalambi’i natandai tau tu apa la dadi undinna.
Sanda rupannamo tu apa kutiro lan mintu’ allo katuoangku tu tae’ gai’na: Den tu to malambu’ sanggang moi naden kamaloloanna sia den tu to tang mekaaluk malambe’ sunga’na moi naden kakadakeanna.
Da mutarru’ malambu’ sia da mutarru’ ma’gau’ kinaa, ma’apai mula umpabuyu’ kalemu?
Da mutarru’ tang mekaaluk sia da mubaga; ma’apai mula matemo, natae’pa nalambi’i attunna?
Melo ke mukaritutui tu misa’ sia da murampananni tu misa’na, belanna minda-minda ungkataku’ Puang Matua la tilendok dio mai mintu’nato.
Iatu kakinaan umpabu’tuan kuasa to kinaa losong na iatu kuasa naampui sangpulo to paa lan misa’ kota.
Belanna tae’ misa’ to malambu’ susito dao kuli’na padang, naurunganni melona manna napogau’ sia tae’ nakasalan.
Da duka mupalan penaai tu mintu’na napokada tau, kumua da murangii tu taummu kalena unggataiko.
Belanna pembudamo tuo lan penaammu, kumua unggatai dukako to senga’.
Mintu’nate kusudi, angku appa’ kakinaan sia ma’kadana’, kukua: moraina’ la unnappa’ kakinaan, apa tae’ kulambi’i.
Mintu’ apa den tang dilambi’ dirundunan, sia tang dilambi’ disandak, mindara ma’din untarru’i?
Kupapatui penaa tu iannato sia naparinaamo penaangku la unnappa’ kapaissanan, la ma’paressa sia la undaka’i tu pa’rampoananna situang kakinaan sia la untandai, kumua iatu katangmekaalukan iamo kabagan sia iatu katangpaissanan iamo kapusan.
Kuappa’mi tu misa’ apa mapai’na kamatean, iamotu baine tu susi poya sia penaanna susi bunde sia iatu limanna sangtinti pepungo. Minda-minda tu naala penaanNa Puang Matua, tilendok dio mai, apa minda-minda tang naala penaanNa Puang Matua la nala’ka’i.
Tonganna, indemo tu kuappa’, kadanna Tomangada’ – kupasitimbang tu misa’ na iatu misa’na, la ungkabu’tui tu misa’ pa’rampoanna,
tu tontongpa kudaka’, apa tae’ kuappa’i –: dio lu to sangsa’bu, kuappa’ misa’ to tongan, apa misa’ baine tongan tae’ bang kuappa’ dio lu tau iato mai.
Ia manna mitandaite, iamotu kuappa’mo kumua mangkamo Napadadi malolo Puang Matua tu tolino, apa undaka’mo buda kira-kira tu tau iato mai.