Ratapan 5
O PUANG, kilalai tu mai apa urrampoikanni; tiroi sia mantai tu kadilo’boangki.
Iatu taa mana’ki tobangmo tama limanna to salian, sia mintu’ banuangki tilelemo tama limanna to tama sae.
Dadimokan to biung, tang keambe’ sia iatu indo’ki butungmo to balu.
Iatu uai kiiru’ kialli doi’, iatu kayu tutungan kiappa’ kibaya’mo.
Nati’tin to unnula’kan tu sokkongki, bo’yo’mokan ma’diama, natae’ napopelayokan.
Kipopandaka’ tu limangki lako Mesir, sia lako Asyur, kinii ma’pedia’ roti.
Iatu mai ambe’ki kasalammo, totemo pa’demo, na iatu mintu’ salana, kami nasang umpassanni.
Kaunanmo umparentakan, natae’ tau ussabakkan lan mai limanna.
Umburukangkan sunga’ki male undaka’ roti, napobua’ kandean pa’dang dio lu padang pangallaran.
Iatu kuli’ki dukku susi ruaya lan dapo’, napobua’ kamapannanganna karorian.
Tau iato mai untoro’-buku mintu’ baine lan Sion, sia mintu’ anak dara lan kota Yehuda.
Natoke’ tu mintu’ arung dao kayu, sia tae’ nakasiri’i tu lindona to matua.
Iatu to mangura nasua umbaa batu pangrissoan, iatu mai pia tipa’re’ba len umbaa kayu.
Tae’mo to matua lan lu babangan tondok, natoreimo pia muane umpannoni katapinna.
Pa’demo tu kasendean penaangki, membalimo passanda bolong tu pa’gellu’ki.
Iatu makota tobangmo dao mai ulungki, upu’ alloki, belanna umpogau’mokan kasalan!
Iamote tu bannangna anna mapa’di’ tu penaangki, iamote tu bannangna anna tang maseromo kitiro:
Tu belanna buntu Sion mempadang talomo, napourungi naolai sindallung dio lu.
O PUANG, Kamu tu unnisung tontong sae lakona, iatu isungan kapayungamMi landa’ lako disituran-turananni.
Ma’apai amMi tontong tang ungkilalaikan, sia ma’apai amMi tampe tarru’kan sae lakona?
O PUANG, solammokan sule lako Kalemi, manassa la sulekan mati’. Ba’rui tu alloki susi tonna dolona!
La Mitampe tarru’ morakannika? La mandu liuraka tu kare’dekan ara’Mi lako kaleki?