Rut 3

Mangkato ma’kadami Naomi, matusanna, nakua lako: E anakku, ma’apai angku tang la undakarangko kamanamanan, ammu maupa’?

Tang sangdadiantaraka tu Boas, tu musisolan bang tu mai baine to sumarona? Manassa bongi iate la unta’pii dalle sisikan dio to’ panglulluran.

Iamoto mendio’moko, ammu minna’i pandere’ tu kalemu sia ma’pakeammoko, ammu male rokko to’ panglulluran. Apa da naissan lenko Boaz, ke tae’pi napura kumande sia mangiru’.

Ianna umbambangammo kalena, la mutiro melo tu naninna mamma’; ammu male urreke’i lako, mubungka’i tu parramba’ diong to’ lentekna, ammu bambangan kalemu diong. Attu iato la napokadangko tu apa sipatu la mupogau’.

Ma’kadami Rut lako nakua: Mintu’ tu mipasananna’ la kupogau’.

Malemi rokko to’ panglulluran, napogau’i tu mintu’ apa napasananni matusanna.

Iatonna mangkamo tu Boas kumande sia mangiru’ sia parannumo tu penaanna, malemi umbambangan kalena dio to’ garonto’ patuku. Napela’-pela’mi tu Rut sae, nabungka’i tu parramba’ diong to’ lentekna, anna mamma’ dio.

Iatonna ma’tangngamo bongi, pakalan tirambanmi tu Boaz, nakaka’i tiku lao, manassa den misa’ baine mamma’ diong to’ lentekna.

Mekutanami nakua: Mindarako? Mebalimi nakua: Akumo Rut, tu taummi: balla’i tu pani’mi dao te taummi, belanna kamumo tu to mangla’bak.

Ma’kadami tu Boaz nakua: Napamasakke-sakkemoroko PUANG, e anakku, iatu pa’kaboro’mu tu mupasombo undinna mandu mala’bi’ na iatu dolona, belanna tang untuntunko to mangura, ba’tu to sugi’, ba’tu to bongko.

Iamoto, e anakku, da mumataku’; mintu’ tu mupokada la kupogaurangko; belanna iatu mai bangsaku dio babangan unnissanni kumua misa’ko baine lambu’.

Iate aku tongannamo aku to mangla’bak, apa denpa misa’ to mangla’bak mandu marengke’ na aku.

Torromoko ma’bongi indete; masiangpa, ke morai siai la ulla’bakko, melo ke nala’bakko, apa iake tang naalai penaanna ulla’bakko, la lelukraka tuoNa PUANG, manassa la kula’bakko. Mamma’ bangmoko sae lako masiangna.

Mamma’ bangmi diong to’ lentekna sae lako masiangna; millikmi tonna la sisarakmo masiang, belanna ma’kada tu Boas nakua: Da naissanni tau kumua den baine sae lako to’ panglulluran.

Sia ma’kadapa nakua: Baai mai tu lullungmu ammu patadoi. Napatadomi. Nasuka’mi annan bakku’ tu dalle sisikan, anna parokkoi. Malemi tu Boas lako kota.

Rampomi tu Rut lako matusanna, anna ma’kada tu matusanna lako nakua: Ma’patumbamoroko, e anakku? Nauleleanmi lako tu mintu’ apa napogau’ muane iato lako kalena,

anna ma’kada nakua: Pennannan bakku’ te dalle sisikan nabenna’, belanna nakua: Da musule lo’bang lako matusammu.

Ma’kadami tu Naomi nakua: Kappa bangmoko ma’peagi, e anakku, sae lako muranginna, umba nakua dadinna te apa iate; belanna iatu tau iato tae’ narapa’, ke tae’pi naupu’ te apa iate lan allo ia bangsiamote.