Ulangan 11

La mukamali’ tu PUANG, Kapenombammu, sia lan mintu’ allo la mukaritutui tu apa Napapassanangko sia iatu aluk Napondok sia atoranNa sia iatu pepasanNa.

Belanna iatu kamu miissan – tangia anakmi, tu tang untandai sia tang untiroi tu peada’Na PUANG, Kapenombammi, – tu kapasareonganNa sia lima mawatangNa sia takia’ tie’te’Na,

sia tanda kalle-kallean sia penggauran, tu mangka Napogau’ Puang lako Firaun datu Mesir, lan Mesir sia lako mintu’ tondokna.

Sia apa Napogau’ Puang lako surodadu Mesir sola darangna sia karetana. Umba Nakua umpatu’ba’i uainna tasik Teberau tu tau iato mai, tonna undi unnula’komi sia umba Nakua PUANG untallananni sae lako allo iate.

Sia apa Napogau’ lako kalemi lan padang pangallaran sae lako kasaeammi inde te inan iate.

Sia ia duka tu apa Napogau’ lako Datan, na Abiram, anakna Eliab, anakna Ruben, iamotu umba nakua menganga tu padang sia unnampello’i tu tau iato mai sola to lan banuanna sia tendana sia mintu’ barang apanna tu nabaa, lan lu tangngana mintu’ to Israel.

Belanna mitiromo tu penggauran tarompo’, tu mangka Napogau’ PUANG.

Iamoto la mikaritutui tu mintu’ pepasan, tu kupapassanangkomi totemo, kumua mimatoto’, ammi tama tondok sia la miala ammi poapai, tu minii lamban kumua ammi alai mipoapa,

sia kumua ammi malambe’ sunga’ lan tondok, tu Naallu’ PUANG lako nene’ to dolomi Napalaoan sumpa, kumua la Nakamasei tu tau iato sia iatu mai bati’na, iamotu misa’ tondok sebo pangandu’ sia tani’ enoan.

Belanna iatu tondok, tu minii male lako la muala mupoapa, tae’ nasusi tondok Mesir, tu minii tassu’ lan mai, tu muambo’i namane buda sara’mu ussakka’i susi misa’ pa’lak utan.

Apa iatu tondok tu minii ke’de’ la miala mipoapa, iamo misa’ tondok ma’buntu sia ma’lombok, tu unniru’ uai uran dao mai langi’.

Iamotu misa’ tondok Nakaduttu’ PUANG, Kapenombammu; tontong Napemaranga PUANG, Kapenombammu, randuk pamulanna taun sae lako upu’na taun.

Iake miperangii tonganni tu pepasan, tu kupapassanangkomi totemo, miurungan ungkamali’i tu PUANG, Kapenombammi, sia ponno penaammi sia kalebu deatammi umpengkaolai:

manassa la Kupasaean uran tu tondokmi, ke attunnai, iamotu uran bunga’ sia uran tampak, naurungan ma’dinko urrampun gandungmu sia uai anggoro’ ba’rummu sia minna’mu,

sia Aku la umpatuoi tu riu dao padangmu la napokande patuoammu, ammu ma’din ungkandei sadia’mu.

Kanandai tu penaammi, da midinaran, miurungan memboko’ sia umpengkaolai kapenomban senga’ sia tukkukomi umpenombai.

Iake susito, iatu kare’dekanNa PUANG dukku ullaoikomi sia Puang untampunni tu langi’, naurungan tang sae tu uran, sia tang membura tu padang sia madomi’komi sanggang lan tondok melo, tu la Nabenkomi PUANG.

Sangadinna la mipalan penaammi te kadangku sia lan ba’tengmi sia la mupemporian dio limammi la dipotanda sia la mipentalian dio kidemi dio kasitammuan matammi.

La miadaran tu mai anakmi sia la mipokada tu iannato, ke unno’ko’komi lan banuammi sia iake diokomi lu lalan sia iake matindokomi sia iake millikkomi.

Sia la musura’ dio ampang ba’ba banuammu sia dio babanganmu,

kumua nakamu sia iatu anakmi la malambe’ sunga’ pada masainna tu langi’ ussamboi kuli’na padang, lan tondok tu Naallu’ PUANG lako nene’ to dolomu Napalaoi sumpa, kumua la Naben tau iato mai.

Belanna iake mikaritutui tonganni te mintu’ pepasan, tu kupapassanangkomi totemo, sia ungkamali’komi PUANG, Kapenombammi, sia mituru’ tu mintu’ lalanNa sia la’ka’komi lako,

manassa la Naula’i PUANG te mintu’ bangsa dio tingayomi, ammi alai mipoapa tu lili’na tu mai bangsa, mandu tarompo’ sia kuasa na kamu.

Mintu’ inan tu milesemo la mipoapa; dio mai padang pangallaran sae lako Libanon, dio mai salu, iamotu salu Efrat, sae lako tasik rampe matampu’, la nanii tu angge lili’mi.

Moi misa’ tau tae’ unnattai unneakomi; iatu PUANG, Kapenombammi, la umparampoi katirambanan sia kamatakuran tu mintu’ tondok milese, susitu mangka Naallu’ lako kalemi.

Manassa allo iate Kupatingoikomi kamasakkean sia tampak ropu,

iamotu kamasakkean, ke miperangii tu pepasanNa PUANG, Kapenombammi, tu kupapassanangkomi totemo;

apa tampak ropu, ke tae’i miperangii tu mintu’ pepasanNa PUANG, Kapenombammi, sia sumepangkomi dio mai lalan, tu kupepasanan lako kalemi totemo, kemenombakomi unturu’ kapenomban senga’, tu tae’ mitandai.

Iake dadimi tu PUANG, Kapenombammu, ussolangko tama tondok, tu muala mupoapa, manassa la musa’bu’ tu pa’passakke dao buntu Gerizim, sia pa’tampak ropu dao buntu Ebal.

Tang dioraka sambalinna lu Yordan dio rampe matampu’na batatta, lan tondok to Kanaan, tu ma’tondok dio padang Araba-Yordan, sitingoan Gilgal sikandappi’ kayu tarpin dio More?

Belanna la sakka’komi la ullamban Yordan la malekomi lako tondok tu la miala mipoapa, tu la Nabenkomi PUANG, Kapenombammi, ammi alai mipoapa sia minii ma’tondok.

Attu iato la mikaritutui tongan tu mintu’ aluk dipondok sia atoran, tu kupepasanan lako kalemi totemo.