Ulangan 17
Da mupemalaran misa’ sapi ba’tu domba sia bembe’ tu den tattanna, ba’tu sayuan lako PUANG, Kapenombammu, belanna iatu iannato Nakagalli PUANG, Kapenombammu.
Iake denni dio lu kamu, lan sala umbanna kotamu, tu la Nabenko PUANG, Kapenombammu, tu misa’ muane ba’tu misa’ baine diapparan umpogau’ apa kadake dio pentiroNa PUANG, Kapenombammu, untengkai bassena;
anna male umpengkaolai kapenomban senga’ sia tukku umpenombai, iamotu dio olona mata allo, ba’tu bulan ba’tu iatu mintu’ ma’dandan maritik dao langi’, tu apa mangka Kupa’gagai;
sia dipokadammoko sia murangimo, iamoto la muparessa tongan tu apa iato. Iake manassami tongan, sia maleso, kumua iatu apa megallian iate dipogau’mo lan Israel,
la musolan lako babangan tu muane ba’tu baine, tu umpogau’i te apa kadake, ammu leba’i batu tu muane ba’tu baine iato sae lako matena.
Dio kasa’bianna da’dua ba’tu tallu tau manassa la dipatei tu to sipatu dipongko, apa dio kasa’bianna misa’ tau tae’ na la dipatei tu tau iato.
Iatu to sa’bi iamo dolo umpata’pai limanna la umpatei, namane limanna mintu’ bangsa. Susimoto la mupa’dei tu apa kadake dio lu kamu.
Iake den misa’ kara-kara mandu masang, la mura’ta’, diona kaindanan rara, sia kasikara-karan ba’tu to dikambei – napobannangi ma’kara-kara tu tau lan kotamu – manassa la ke’de’ko lako inan, tu la Napilei PUANG, Kapenombammu.
La maleko lako to minaa to Lewi, sia lako to mangra’ta’, tu den attu iato, tu la munii umpalaku pangra’ta’ na iatu tau iato mai la umpokada pangra’ta’na lako kalemu.
Sia la muturu’ tu pangra’ta’na, tu napokadangko dio inan, tu la Napilei PUANG, sia muturu’ tongan tu mintu’na apa naadarangko.
Susitu pa’patudu nabenko sia iatu pangra’ta’ napokadangko, la muturu’; iatu pangra’ta’ napokadangko da musepang kanan ba’tu sepang kairi.
Iatu muane, tu matampo gau’na, anna tang umperangii tu to minaa, tu untoe pentoean dio PUANG, Kapenombammu, ba’tu to mangra’ta’, tau iato la mate. Susimoto la mupa’dei tu apa kadake lan mai Israel.
Attu iato anna rangii mintu’ bangsa te iannate sia mataku’ sia tae’mo na la matampo.
Iake rampomoko tama tondok, tu la Nabenko PUANG, Kapenombammu, sia mualamo mupoapa, ammu nii ma’tondok, ammu ma’kada mukua: La moraina’ unnangka’, misa’ datu undatuina’, susi tu mintu’ bangsa untikuina’,
attu iato la unnangka’ko datu anna datuiko, tu la Napilei PUANG, Kapenombammu; dio mai siulu’mu la munii unnangka’ misa’ datu undatuiko; tangia to salian bangsa, tu tangia siulu’mu, la ma’din muangka’ undatuiko.
Apa tae’ nama’din la umpatuo buda darang sia iatu bangsa tae’ na la ussolanni sule lako Mesir, kumua anna allii buda tu darang, belanna mangkamo Napokada PUANG, Nakua: Iate lalan iate tae’mo mila unnola lenni sule.
Sia da duka napebudai tu baine napobaine, da nasepang tu penaanna sia da duka narampunan kalena salaka sia bulaan tarru’ buda.
Iake unnisungimi isungan kapayungan, manassa la napopeokiran kalena tu pallemba’na sukaran aluk iate, tu nananna tu mai to minaa to Lewi.
Iamoto na la dio bang kalena, sia la nabasa lan mintu’ allo katuoanna, anna pelada’i la ungkataku’ PUANG, Kapenombanna, ke nakaritutui tonganni te mintu’ kadanna sukaran aluk iate sia mintu’ aluk dipondok,
kumua da anna pamadao penaanna dio lu siulu’na sia da nasepang lako kanan ba’tu kairi dio mai pepasan, anna marendeng lan kadatuanna, la kalena la iatu mai anakna dio lu to Israel.