Ulangan 19
Iake Nasabu’imi PUANG, Kapenombammu, tu mintu’ bangsa, la Nakamaseangko PUANG, Kapenombammu, tu tondokna sia iake mualai mupoapa tu lili’na sia munii ma’tondok tu kotana sia banuanna,
manassa la mupamarimbangan tu tallu kota lan tondok tu la Nakamaseangko PUANG, Kapenombammu, la mupoapa.
La mupamanassa tu alla’na sia iatu lili’ tondok, tu la Nakamaseangko PUANG, Kapenombammu, la mupotaa mana’, la mutaa tallu, kumua napantan tu to papatean ma’din mallai lako.
Inde sia tu a’ganna to papatean mallai lako, nanii tuo, iamotu ketang naangga’i umpatei solana, anna tae’ duka nakabiri’i dolona.
Iake susinna misa’ tau tama pangala’ sola tu mai solana, la manglelleng kayu, anna popangaakki tu limanna la ullelleng misa’ garonto’ kayu, anna tassu’ tu uasena lan mai batangna, anna ruai tu solana, naurunganni mate, manassa tau iato ma’din mallai lako misa’ kota iato, anna tuo.
La dipamanassa susito, kumua da nalambi’i to mangala puli tu to papatean, ke naula’i, sia re’dekpi tu ara’na, belanna mambela tongan tu lalan, anna patei, moi anna tae’ nasipatu dipatei, belanna tae’ nakabiri’i dolona.
Iamoto kupasanko susite, kumua: Tallu tu kota la mupamarimbangan.
Iake Napakalua’i PUANG, Kapenombammu, tu lili’mu, susitu mangka Naallu’ lako nene’ to dolomu Napalaoan sumpa sia Nasorong lako kalemu tu mintu’ tondok, tu mangka Napokada, kumua la Nasorong lako nene’ to dolomu,
– sia iake mukaritutui tonganni te pepasan, tu kupapassanangko totemo, sia iake ungkamali’ko PUANG, Kapenombammu, sia tontongko unturu’ lalanNa –, manassa la murangngannipa tallu kota te kota tallu,
kumua da napatibolloi tu rara tang kasalan lan tondok, tu la Nasorongangko PUANG, Kapenombammu, mupotaa mana’, sia da ammu dipa’tuntunni to’doan rara.
Apa iake misa’ tau nakabiri’ solana, anna odo’i sia nalaoi sia napata’pai namate, namallai lako sala umbanna misa’ kota iate,
manassa iatu pekaamberanna kota iato mesua unnalai dio mai, nasorongi lako to mangala puli, kumua anna mate.
Da mukasayangi, sangadinna iatu rarana to tang kasalan la mupa’dei dio mai Israel, ammu malaga’-laga’.
Da mupalelei tu passaparan padangna solamu, tu napantok nene’ to dolomu lan taa mana’, tu la mumana’ lan tondok, tu Nabenko PUANG, Kapenombammu, la mupoapa.
Iake misa’ri to sa’bi, tae’ nama’din bendan umpasala misa’ tau diona sala umbanna kakadakean ba’tu kasalan, tu disanga napogau’; tete dio kasa’bianna da’dua ba’tu tallu tau la manassamo to tu misa’ kara-kara.
Iake misa’ to sa’bi bulituk bendan umpasala misa’ tau la umparapa’ diona misa’ kapatodo-tintingan,
la mennolo dio oloNa PUANG tu da’dua tau sikara-kara, dio olona to minaa sia to ma’paolai salu, tu la den attu iato.
Attu iato iatu to ma’paolai salu la umparessa tonganni sia iake manassai, kumua tang tongan tu to sa’bi iato, sia umpa’parampoan tang tongan siulu’na,
la mupogau’ lako kalena, susitu natangnga’ la umpogau’i lako siulu’na. Susimoto la munii umpa’dei tu kakadakean dio lu kamu,
belanna iatu to senga’ la urrangii te sia mataku’ sia tae’mo napogau’i tu kakadakean susito dio lu kamu.
Da mukasayangi, sangadinna iake papateanni la dipatei duka, pabutanni la dibutai duka, pasimpoanni la disimpoi duka, pata’takan limai la dita’takki duka tu limanna, pale’toan lentekki la dile’to duka tu lentekna.