Ulangan 22

Iake mutiroi tu misa’ sapi ba’tu misa’ domba ba’tu bembe’na siulu’mu pusa, la mukaritutui da musa’bianganni, sangadinna manassa la mubaa sule lako siulu’mu.

Sia iake tae’i musikandappi’ siulu’mu sia tae’ mutandai, manassa la mupalan banuammu sia la dio bang kalemu tu apa iato sae lako nadaka’na siulu’mu; attu iato la mupasule lako kalena.

Susi dukato la mugauranni tu keledainna, susi duka la mugauranni tu pakeanna; susimoto la mupogau’ tu diona mintu’ apa pa’dena siulu’mu, tu kapa’dean ammu kabu’tui; da musa’bianganni to.

Iake mutiroi tu keledainna siulu’mu ba’tu sapinna tibambang dio lu lalan, la mukaritutui da musa’bianganni; manassa la muntundui unnangkaranni sule.

Misa’ baine tae’ nala sipatu ma’pakean muane sia misa’ muane tae’ nala sipatu umpopake pakean baine, belanna minda-minda umpogau’i tu iannato, iamo megallian lako PUANG, Kapenombammu.

Iake mutiroi misa’ serang manuk-manuk dio lu lalan dao sala umbanna kayu ba’tu dio lu padang, tu nanii anakna ba’tu tallunna, na iatu indo’na unnarranni tu anakna ba’tu tallunna, manassa da mualai tu indo’na sola anakna.

Manassa iatu indo’na la murampanan, apa iatu anakna ma’din muala, ammu malaga’-laga’ sia malambe’ sunga’.

Iake umbangunko misa’ banua ba’ru, la murompo tu soto banuammu, da muparampoi to’doan rara tu banuammu, ke denni misa’ tau tobang dao mai.

Da muambo’i duang rupa banne tu pa’lakmu, da nadipa’pemalii tu polean pangambo’mu sia bua pa’lak anggoro’mu sia da nadisorong lako inan maindan.

Da mupa’tengkoanni tu misa’ sapi mupasiayoka misa’ keledai.

Da mupotamangkale misa’ pakean tannun duang rupa, iamotu bulu domba dipasitannun lenang.

La mugaragai tu pa’karidi’ dio a’pa’ biring bayu lamba’, tu mupennammu’.

Iake den misa’ muane umpobaine misa’ baine anna mangka sangampa’to, nakagi’gi’mi,

sia napasala anna pakadake lelei tu sanganna kumua: Iate baine mangka kupobaine, apa iatongku sangampa’ kukanassai kumua tae’mo naanak dara,

attu iato iatu ambe’na sia indo’na tu baine mangura iato la unnalai tu sampin dipotanda kumua anak darapa sia la nabaa lako pekaamberanna kota dio to’ babangan.

Iatu ambe’na baine mangura iato la ma’kada lako pekaamberan nakua: Iatu anakku baine kupakemuanemo lako muane iate, apa nakagi’gi’,

na totemo napasala kumua: Kuappa’mo iatu anakmi baine tae’mo na anak dara; apa iamote tu dipotanda kumua anak darapa tu anakku baine. Pakalan naampa’mi tu sampin iato dio tingayona pekaamberan kota.

Attu iato naalami pekaamberan kota tu muane iato, anna pandasai,

sia nadosa saratu’ sikele’ salaka la naben ambe’na baine iato – belanna napakadake lele tu sanganna misa’ anak dara Israel; sia tontong napobaine, sia tae’ nama’din untantangi tempon tuona.

Apa iake tonganni tu pa’pasala iato sia tae’ nadiappa’ tu napotandana anak dara dio baine mangura iato,

manassa iatu baine mangura iato la nabaa tau lako to’ ba’ba banuanna ambe’na, anna sileba’i batu muane lan kotana, naurungan mate – belanna umpogau’ kabagan mesirisan dio lu Israel, iamotu ma’gau’ sala lan banuanna ambe’na. Susimoto la munii umpa’dei tu kakadakean dio mai kamu.

Iake diappa’i tu misa’ muane marassan sangampa’ baine kemuanemo, manassa la mate dipongko sola duai, tu muane mangka sangampa’ baine iato, sia ia duka tu baine. Susimoto la munii umpa’dei tu kakadakean dio mai Israel.

Iake den misa’ muane sitammu misa’ baine lan kota, tu anak darapa, anna sangampa’ sola, anna baine iato sikampamo misa’ muane,

manassa la misolan sola duai lako babangan kota iato, ammi sileba’i batu naurungan mate; iatu baine, belanna tae’ nametamba umpalaku pa’tunduan sia iatu muane, belanna ullamban bainena solana. Susimoto la munii umpa’dei tu kakadakean dio mai kamu.

Apa iake den misa’ muane sitammu dio lu padang misa’ baine, tu denmo sikampana, nala’ka’i anna sangampa’ sola, manassa ia manna tu muane, tu mangka sangampa’ baine iato, la mate dipongko.

Apa iatu pia baine iato da mupatumba lenni, belanna tae’ kasalanna, tu sipatu la dinii umpatei, belanna iatu apa urrampoi susi ke misa’ tau ullaoi solana anna alai tu sunga’na.

Belanna sitammu dio lu padang, na iatu anak dara denmo sikampana, metamba umpalaku pa’tunduan, apa moi misa’ tau tae’ sae untundui.

Iake den misa’ muane sitammu misa’ pia baine, tu anak darapa, sia tae’pa sikampana, nala’ka’i sia sangampa’ sola, anna diapparan sola duai;

manassa iatu muane, tu mangkamo sangampa’, la ussorong limangpulo sikele’ salaka lako ambe’na pia baine iato sia la napobaine, belanna mangkamo naparuku; tae’ nama’din untantangi tempon tuona.

Misa’ tau da naala bainena ambe’na, sia da nakillang inan mammaranna ambe’na.