Yehezkiel 18

Rampomi tu kadanNa PUANG lako kaleku nakua:

Umbara mikua ammi poparumbasanni te parumbasan iate dio tondok Israel kumua: Mintu’ ambe’ ungkande bua anggoro’ mamata, anna anakna langgang issinna?

La lelukraka tuoKu, kadanNa Puangta PUANG, damo mipoparumbasanni te parumbassan iate lan lu Israel.

Tonganna mintu’ mendeata, Aku puangna, la mendeatanna ambe’, la mendeatanna anak, Aku puangna; iatu mendeata kasalan, la mate.

Iake bulo sanglampai tu tau sia umpogau’i tu salunna sia kamololoan,

sia tae’ napasakka’ kande pemala’ dao buntu sia tae’ namentiro lu lako rapang-rapang dipodeatanna to Israel, tae’ nagau’ sala bainena solana sia tae’ nasangampa’ baine nalambi’ bulanna,

tang umpakario-rio tau, umpasulean apa napa’pentoean to kaindanan, tae’ namangrampa, naben rotinna tu to topo sia napaluangi tamangkale tu to ma’kambelang,

tae’ napalaku denne’, ke ma’peindanni sia tae’ nasanta’ denne’, tae’ narumbui limanna tu apanna tau, sia malambu’ ma’paolai salu, ke den tau sisakka,

lolang unturu’ apa Kupondok sia ungkaritutui atorangKu umpa’pekitanan kamarurusan, iatu tau susito malambu’; manassa la tuo, kadanNa Puangta PUANG.

Apa iake denni anakna misa’ muane, to masa’ga’ sia umpatibollo rara, a’a, tu umpogau’i misa’ te apa iate,

– moi na ia kalena tu ambe’na tae’ napogau’i tu apa iato – sia umpasakka’ duka kande pemala’ dao buntu, sia unggau’ sala bainena solana,

umpakario-rio to mandasa sia to mase-mase, mangrampa, tae’ napasule apa dipa’pentoean, na mentiro lako rapang-rapang dipodeata sia umpogau’ apa megallian,

na umpalaku denne’, ke ma’peindanni sia ussanta’ denne’, la tuo siaraka tu tau susito? Tae’ nala tuo, belanna mangkamo umpogau’i te mintu’na apa megallian iato. Manassa la mate dipatei. La sule lako kalena tu rara mangka napatibollo.

Tiromi, undadiammo, misa’ pia muane, na iate untiro mintu’ kasalan napogau’ ambe’na; natiro tu iannato, apa tae’ nama’gau’ susito.

Tae’ napasakka’ kande pemala’ dao buntu sia tae’ namentiro lako rapang-rapang dipodeatanna to Israel, tae’ nagau’ sala bainena solana,

tae’ napakario-rio tau, tae’ natarima apa dipa’pentoean sia tae’ namangrampa; naben rotinna tu to topo sia napaluangi tamangkale tu to ma’kambelang,

tae’ narumbui limanna tu apanna tau, tae’ napalaku denne’ sia tae’ nasanta’ denne’, ungkaritutui atorangKu sia lolang unturu’ apa Kupondok tae’ nala mate belanna kakadakeanna ambe’na, manassa la tuo.

Iatu ambe’na, belanna umpandasa tau, urrampa apanna solana sia umpogau’ apa tang melo dio lu sangtondokna, manassa la mate natumang katangmalamburanna.

Apa mikua: Ma’apai anna tae’ natanggungi anakna tu kakadakeanna ambe’na? Tonganna iatu anak iato umpogau’i tu salunna sia kamaloloan, nakaritutui tu mintu’ apa Kupondok sia naturu’; manassa la tuo.

Iatu to umpogau’ kasalan, ia siamo ia la mate. Tae’ naanakna la untanggungi tu kakadakeanna ambe’na, sia misa’ ambe’ tae’ nala untanggungi tu kakadakeanna anakna. Iatu kamalamburanna to malambu’ la dipakkan lu lako ia kalena na iatu katangmekaalukanna to tang mekaaluk la dipakkan lu lako ia kalena.

Apa ianna den to tang mekaaluk mengkatoba’ dio mai mintu’ kasalanna, tu mangka napogau’ anna karitutui tu mintu apa Kupondok, sia umpogau’i tu salunna sia kamaloloan, manassa la tuo, tae’ nala mate.

Tae’mo misa’ tu kasalanna tu mangka napogau’ la dibilang lako kalena tete dio kamaloloan mangka napogau’ manassa la tuo.

Ma’apai anna la unnalai penaangKu tu kamateanna to tang mekaaluk?, kadanNa Puangta PUANG. Tang ia raka naala penaangKu te, kumua anna mengkatoba’ dio mai lalanna, anna tuo?

Apa ianna balik dio mai gau’ malambu’na tu to malambu’, anna umpogau’ tang malambu’ unturu mintu’ apa megallian, tu napogau’ to tang mekaaluk – la tuoraka? Moi misa’ tu mintu’ apa malambu’ mangka napogau’ tae’mo nala dibilang. Belanna diona katangmarurusan tu mangka napalalo sia diona kasalan mangka napogau’, iamoto nala mate.

Apa mikua: Tae’ namalambu’ tu lalanNa Puang. Perangii, e to Israel, tae’raka namalambu’ tu lalanKu? Ondong pissan ia tu lalanmi tang malambu’.

Iake denni to malambu’ balik dio mai gau’ malambu’na, anna pogau’ tang malambu’, napobannangi mate, iatu kamateanna to natumang apa tang malambu’ tu mangka napogau’.

Apa iake denni misa’ to tang mekaaluk mengkatoba’ dio mai gau’ kadakena, anna pogau’i tu salunna sia kamaloloan, manassa la ungkaritutui katuoanna.

Belanna mengkilalamo sia mengkatoba’mo dio mai mintu’ salana tu mangka napogau’. Manassa la tuo: tae’ nala mate.

Apa ma’kada tu to Israel nakua: Iatu lalanNa Puang tang melambu’. Tae’raka namalambu’ tu mintu’ lalanKu, e to Israel? Ondong pissan ia tu mintu’ lalanmi tang malambu’.

Iamoto angKu la umpaolaikomi salunna pantan sitinaya penggauranmi, e to Israel, kadanNa Puangta PUANG. Mengkatoba’komi sia balikkomi dio mai mintu’ salami, da mipobannangi titodo sae lako tobang rokko kakadakean.

Tibei dio mai kalemi tu sala mangka mipogau’, ammi ba’rui tu ba’tengmi sola penaammi. Ma’apari ammi la matera, e to Israel?

Belanna tae’ naalai penaangKu tu kamateanna to la mate, kadanNa Puangta PUANG; iamoto balikkomi, ammi tuo.